Isikeli 19 - Vakavakadewa Vou kei na iVola tale eso

E Dua na Sere ni Lolosi

¹ Ia o iko, Mo taurivaka e dua na sere ni lolosi ena vukudra na turaga ni Isireli,

² Ka kaya: Sa laione yalewa vakacava o tinamu ena kedra maliwa na laione! Sa davo ena kedra maliwa na luve ni laione, Ka susugi ira na luvena lalai.

³ A sa susuga cake mai e dua vei ira na luvena lalai; Ka tubu cake me dua na laione cauravou, A sa vakavulici koya me toboka na kena; Ka sa dau kana tamata.

⁴ Era sa veitukutukunitaka na nona ca na veimatanitu; Ka toboki koya ena nodra i keli; Era sa vesuki koya ena i cori, Ka kauti koya ki Ijipita.

⁵ Ia ni sa raica ni sa veilecayaki o koya, Ka sa yali na nona i nuinui. A sa taura tale e dua vei ira na luvena lalai, Ka susuga cake me dua vei ira na laione cauravou,

⁶ A sa veilakoyaki ena kedra maliwa na laione, Ka sa tubu cake me levu. A sa vulica me toboka na kena Ka sa dau kana tamata.

⁷ A sa vakarusa o koya na nodra bainivalu, Sa vakalala na nodra veikoro lelevu; A sa domobula na vanua Kei ira kece sa tiko kina Ena vuku ni domo ni nona tagi.

⁸ Ia era qai vala kaya na veimatanitu Ka tu na i cori ena veiyasana kecega; Era sa tevuka vua na nodra lawa; Ka sa tobo o koya ena nodra dai.

⁹ Era sa sogolati koya ena dua na bai, Ka kauti koya yani vei tui Papiloni; Era sa kauti koya yani vakavesu, Me kakua tale kina ni rogo na domona ena dela ni veiulunivanua e Isireli.

¹⁰ O tinamu sa vaka e dua na vaini Ena loganivaini sa tei ena bati ni wai, Sa vuavuai vinaka ka levu na tabana Ena vuku ni levu ni wai.

¹¹ Na tabana kaukauwa sara Sa yaco me nona matanakilagi na daulewa Sa cere vakaidina ki lagi Ena kedra maliwa na tabana lelevu; A sa raici ena kena cecere sara Ni sa vuqa na kena veitabana.

¹² Ia sa cavuraki na vaini ena dela ni cudru katakata, Ka sa biu sobu ki na qele; A sa vakaraqosataka na cagi tokalau; Ka sa betilaki laivi na vuana, A sa malai sobu na tuvukana kaukauwa; Ka sa kania na bukawaqa.

¹³ A la'ki tei tale oqo ena vanua talasiga, Ena vanua mamaca ka sigasiga.

¹⁴ A sa tete yani na bukawaqa mai na vuna, Ka sa kama kina na tabana kei na vuana, Ena sega tale na tabana kaukauwa me vo kina, Me nodra matanakilagi na daulewa. Sa vakaoqo na sere ni lolosi, ka sa lagata wasoma me vaka na sere ni vakaloloku.