Isikeli 18 - Vakavakadewa Vou kei na iVola tale eso

Na i Tavi ni Tamata Yadua

¹ Sa yaco tale vei au na vosa i Jiova, ka vaka:

² A cava li na kena i balebale na nomu mai cavuta tale tiko na vosa vakaibalebale oqo me baleta na vanua o Isireli? ‘O ira na qase sa kania na qerepi wiwi, Ia, sa wiwi ga kina na batidra na luvedra.’

³ A kaya o Jiova, “Me vaka na dina ni noqu bula, me kakua ni taurivaki tale na vosa vakaibalebale oqo e Isireli.

⁴ Raica, era sa noqu na yalo bula kecega; na yalo i tamana, ka vakakina na yalo i luvena, sa noqu; ia na yalo ga sai valavala ca ena mate.

⁵ “Kevaka sa yalo dodonu e dua na tamata, ka cakava na ka sa dodonu ka vinaka

⁶ ka sega ni la'ki kana ena veiulunivanua, se tacake ki na nodra matakau na mataqali i Isireli, se veibutakoci vata kaya na watina na kai nona, se mocera e dua na yalewa sa tauva na kena mate vakamarama,

⁷ ka sega ni vakasaurarataka e dua, ka vakauta tale na kena i vakadinadina vua a kerea e dua na ka me i vakadei, ka sega ni butako, soli kakana vua sa viakana, ka vakaisulutaki koya ena i sulu e dua sa luvawale,

⁸ ka sega ni soli i lavo me dinautaki ka vakatubu i lavo se taura na tubu e sivia, ka sa tarova na ligana mai na caka cala, ka sa lewa vakadodonu, vei ira na tamata,

⁹ sa muria na noqu vunau, ka sa vakabauta na noqu lewa ni sa yalo dodonu: e sa na bula vakaidina o koya, sa kaya na Kalou o Jiova.

¹⁰ “Kevaka ena sucu na luvena tagane ka daubutako, ka dau vakadave dra,

¹¹ ka sega ni cakava e dua vei ira na veicakacaka oqo, ia ka sa na kana ena veiulunivanua, ka butakoca na watina na kai nona,

¹² ka vakasaurarataka na dravudravua kei na luveniyali, ka na butako; ka sega ni vakasuka na i vakadei ni yalayala, tacake na matana ki na veimatakau, cakava na ka vakasisila, ka solia na dinau ka vakatubu vakailavo,

¹³ se tubu levu sivia; ena bula li o koya? Ena sega ni bula. Sa cakava o koya na veika vakasisila kecega oqo; ena baleti koya ga na nona mate.

¹⁴ “Ia kevaka sa sucu e dua na luvena tagane, ka sa raica kecega na i valavala ca sa cakava o tamana, ka sa vakasamataka ka sega ni vakamurimuri tamana ena nona i valavala ca,

¹⁵ ka sa sega ni kana ena veiulunivanua, se tacake na matana ki na veimatakau ni mataqali i Isireli, se butakoca na watina na kai nona,

¹⁶ se sega ni vakacacana e dua, se vakasuka tale na i vakadinadina ni vakadei, se sega ni butako, ia ka solia ga na kakana vua sa viakana, ka vakaisulutaki koya sa luvawale,

¹⁷ ka tarova na ligana mai na caka cala ka sega ni taura na tubu vakailavo, se tubu sivia; ka sa vakayacora na noqu lewa, ka sa muria na noqu vunau; ena sega ni mate o koya oqo ena vuku ni caka cala i tamana; sa na bula vakaidina.

¹⁸ Ia na tamana, ena vuku ni nona dauveivakasaurarataki, butakoca na i yau i tacina, ka cakava na veika tawa dodonu vei ira na kai nona, raica, ena mate vakaidina o koya ena vuku ni nona caka cala.

¹⁹ “Ia o ni qai kaya, ‘A cava li me la'ki sega kina ni nona na kena ca na luvena ena vuku ni cala i tamana?’ Kevaka sa cakava na luvena na ka dodonu ka vinaka, ka qarauna ka vakabauta kecega na noqu vunau, ka cakava: ena bula vakaidina o koya.

²⁰ Na yalo sai valavala ca ena mate ga. Ena sega ni cudruvi na gone ena vuku ni cala i tamana; na tamana talega ena sega ni cudruvi ena vuku ni caka cala i na luvena. A nona caka dodonu na nona yalo dodonu ena tu ga vua, kei na nona cala na tamata ca ena tu ga vua.

²¹ “Ia kevaka ena saumaki mai na tamata ca mai na i valavala ca kecega sa kitaka, ka vakabauta kecega na noqu vunau, ka cakava na ka sa dodonu ka vinaka, ena bula vakaidina o koya, ena sega ni mate.

²² Na nona talaidredre kecega ena sega ni nanumi mai me baleti koya; ena bula ga o koya ena vuku ni nona i valavala dodonu.

²³ Au bau marautaka li na nona sa mate e dua na tamata ca?” sa kaya o Jiova. E vinaka cake vei au me saumaki mai o koya mai na nona sala ca ka me bula.

²⁴ “Ia ni sa gole tani na tamata yalo dodonu, mai na nona caka dodonu, ka kitaka na ka ca me vaka na i valavala vakasisila kecega sa cakava na tamata ca, ena bula li o koya? A nona i valavala dodonu kece sa cakava oti, ena sega ni nanumi tale: na talaidredre a talaidredre kina, kei na nona i valavala ca sai valavala ca kina, ena mate ga kina o koya.

²⁵ “Ia, o ni kaya, ‘Sa sega ni dodonu na lewa i Jiova.’ Ni rogoca mada, oi kemuni na mataqali i Isireli: Sa sega li ni dodonu na noqu lewa?

²⁶ Ni sa vuki na tamata yalo dodonu mai na nona caka dodonu, ka sa la'ki cakava na ka ca, ena mate ena vuku ni ka ca sa cakava.

²⁷ Ia ni sa saumaki mai na tamata ca mai na nona ca a kitaka, ka cakava na ka dodonu, ena vakabulai o koya.

²⁸ Ni sa vakasamataka, ka saumaki mai na nona i valavala ca kecega, ena bula vakaidina o koya; ena sega ni mate.

²⁹ Ia oqo o ni qai kaya tikoga na mataqali i Isireli, ‘Sa sega ni dodonu na lewa i Jiova.’ Oi kemuni na mataqali i Isireli, E sega beka li ni tawa dodonu na nomuni lewa?

³⁰ “O koya oqo ka'u sa vakataulewa yadudua kina vei kemuni na mataqali i Isireli, me vaka na nomuni i valavala yadudua, sa kaya na Kalou o Jiova. Ni veivutuni ka saumaki mada mai na nomuni i valavala ca kecega, de o ni na qai rusa ena vuku ni nomuni cala.

³¹ Biuta laivi sara na nomu i valavala ca kecega o ni a cala kina vei au, ka vakavouia na lomamuni kei na yalomuni! A cava li o ni via mate kina, oi kemuni na mataqali i Isireli?

³² Ni'u sa sega ni taleitaka se marautaka na nona mate e dua na tamata, sa kaya na Kalou o Jiova. “O koya oqo, mo ni saumaki mada mai, mo ni bula kina.”