Isikeli 17 - Vakavakadewa Vou kei na iVola tale eso

Na Ikeli e Rua kei na Vuni Vaini

¹ A yaco mai vei au na vosa ni Kalou o Jiova, ka vaka,

² “Luve ni tamata, mo solia mada e dua na vatavatairalago, ka cavuta e dua na vosa vakatautauvata ki na mataqali i Isireli;

³ ka kaya, Sa vosa vakaoqo na Kalou o Jiova: E dua na ikeli levu, sa vakatabana lelevu, sa balavu na lawena, ka rairai vinaka na vutina, sa vuka yani ki na veiulunivanua mai Lepanoni, ka kauta tani e dua na taba ni sitari;

⁴ a sa covuta na sovuna e cake sara, ka vukataka yani ki na dua na vanua ni veivoli, ka la'ki tea ki na dua na kena koro.

⁵ A kauta talega eso na sore ni kau ni nomu vanua ka la'ki tea ena qele bulabula; volekata na bati ni wai levu, ka tea me vaka na vu ni kuta.

⁶ A tubu ka yaco me vaini leka ka dau tete yani, ka ra tubu cake na veitabana vua na ikeli, ia na wakana sa titobu sobu sa yaco me vaini, ka vakatabana mai, ka tubu na tabana lalai kei na drauna.

⁷ “A sa dua tale na ikeli levu sa vakatabana lelevu, ka levu na lawena kei na vutina. A sa qai vakabalea yani na wakana na vunivaini vua, me sala talega yani na tabana vua, me vakasuasuataka. A qai cavuta tale o koya mai na tovatova ka a tea taumada kina,

⁸ ka la'ki tea ena qele vinaka ena bati ni wai levu, me rawa ni kadre ka tubu mai na tabana eso, ka vuataka na qerepi, ka me dua na vunivaini yaga.

⁹ “Mo kaya, ‘Sa vosa vakaoqo o Jiova na Kalou: Ena tubu vinaka tiko li? Ena sega beka li ni cavuta tani na wakana na i matai ni ikeli, ka drutilaka laivi na kena qerepi, ka musuka na veitabana me malai kece vakadua? Ena sega ni ganita sara na liga kaukauwa se me ra lewe vuqa cake na tamata me ra cavuta laivi mai na wakana.

¹⁰ Ia raica, ni sa la'ki tei tale, ena tubu vinaka li? Ena sega li ni malai laivi yani ni liwava na cagi mai na tokalau ka me malai laivi yani ena tova ka tei kina?’ ”

¹¹ A yaco mai vei au na vosa i Jiova, ka vaka,

¹² “Mo kaya ki na mataqali dau talaidredre oqo, o ni sega li ni kila na i balebale ni ka oqo? Mo tukuna vei ira, raica, sa lako mai ki Papiloni o tui Jerusalemi, ka tauri koya na kena tui, kei ira na kena turaga, ka kauti ira vata kaya ki Papiloni.

¹³ A kauta e dua vei ira na kawa vakatui, ka ia na veiyalayalati kaya, ka vakabubuluitaki koya ka kauti ira talega na qaqa ni vanua,

¹⁴ ka me malumalumu na matanitu me kakua ni vueta cake na nona i tutu, ia me sa vakabau ga na nona veiyalayalati me tudei kina.

¹⁵ Ia a qai vuki tani mai vua o koya ni sa talai ira na nona mata ki Ijipita me rawa ni solia vua na ose kei na dua na mataivalu levu. Ena rawata li o koya? Ena rawata vakacava li e dua na ka vakaoqo e dua na tamata sa vesuki tu? Ena rawa li me vakacacana na nona veiyalayalati, ka dro bula?”

¹⁶ A kaya na Kalou o Jiova, ka vaka, “Me vaka na dina ni noqu bula, e Papiloni ena yasa i koya na tui ka buli koya me tui, ka sa beca na nona bubului, o koya ka vakacacana na nona veiyalayalati kaya, sa na mate ga o koya ni sa tiko mai Papiloni.

¹⁷ Ena sega talega ni yaga vua o tui Ijipita, kei na nona i valu kaukauwa kei na nona i vavakoso levu, ni ra viri suva, ka viria na bai ni buku druadrua me muduki laivi kina na bula ni lewe vuqa.

¹⁸ E baleta ni sa beca o koya na bubului ena nona vakacacana na veiyalayalati, io, ni sa solia oti na ligana, a cakava na ka kecega oqo: ena sega ni dro bula o koya.

¹⁹ O koya oqo, e sa kaya kina na Kalou o Jiova, “Me vaka na dina ni noqu bula, ni sa beca o koya na noqu bubului, ka vakacacana na noqu veiyalayalati, ka'u na sauma vakaidina vua.

²⁰ Ia ka'u na tevuka na noqu lawa, ena coriti talega ena noqu i cori, ia ka'u na kauti koya ki Papiloni, ka ia na veilewai kaya mai kea ena vuku ni nona veidabui ka lasutaki au kina.

²¹ Ia era bale ena i seleiwau o ira na nona tamata i valu digitaki, ka ra na vakasavi, ki na mata ni cagi kecega, ia o ni na kila kina ni sai au o Jiova, ka'u sa vosa.”

²² Sa kaya vakaoqo na Kalou o Jiova: “Sa i au ka'u na kauta na vuso ni sitari cecere, ka'u na musuka mai ka'u sa na la'ki tea ga vaka i au ena dua na ulunivanua cecere ka rewa i cake;

²³ ia ka'u na tea ena ulunivanua cecere i Isireli, ka me tubu cake na kena veitabana, ka vuataka na vuana, me sa vu ni sitari vinaka sara; ena tiko talega e rukuna na veimataqali yavusa manumanu vuka kecega.

²⁴ Era na kila na kau kecega ni vanua ni sai au o Jiova ka'u vakabalea na veivunikau cecere, ka vakalevulevuya na vunikau leleka, ka vakamalaitaka na kau bulabula, ka vakabulabulataka na kau sa malai. Oi au o Jiova ka'u sa vosa tiko, ka'u sa na cakava talega.”