Isikeli 16 - Vakavakadewa Vou kei na iVola tale eso

Na Sega ni Yalodina nei Jerusalemi

¹ A sa vosa tale vei au o Jiova, ka kaya,

² “Luve ni tamata, mo vakatakila ki Jerusalemi na nona veivalavala vakasisila, ka kaya,

³ Sa kaya vakaoqo o Jiova na Kalou ni Jerusalemi: ‘Na nomu i tubutubu kei na nomu sucu sa vu mai na vanua o Kenani; na tamamu na Amoraiti, ia na tinamu na Itaiti.

⁴ Ia ena vuku ni nomu sucu, a sega ni musu na nomu vicovico ena siga o a sucu kina; o a sega talega ni vui ena wai mo savasava, ka sega talega ni masiraki ena masima, e a sega talega ni viviraki vei iko na i sulu ni gone.

⁵ A sega ni dua e lomani iko, ka me cakava vei iko e dua na ka vakaoqo, me vaka sa yalo vinaka vei iko; ia o a biu tani ga ki na i bili ni koro ena siga o a sucu kina ni o a vakasisilataki.’

⁶ “Ia ni'u lako voli yani, ka raici iko tale ni o sa moqe tu ena dra, ka sa kaya vei iko ni o sa davo ena nomu dra,

⁷ ‘Mo bula ka tubu cake me vaka e dua na i tei bulabula ena lomanivanua.’ O a qai tubu cake mo balavu ka yacova mai na gauna o sa gone yalewa mai kina; na sucumu sa levu vinaka mai, kei na drau ni ulumu sa tubu sara, ia o sa luvawale ga ka sega ni vakaisulu.

⁸ “Ia ni'u a lako voli yani ka raici iko, raica, sa qai nomu gauna mai, na gauna mo dodomo kina, ia ka'u a tevuka yani vei iko na noqu i tutuvi ka vakaisulutaki iko: io, ka'u a bubului vei iko, ka ia na veiyalayalati vei iko, ia o sa noqu, sa kaya na Kalou o Jiova.

⁹ “Au a qai vakasilimi iko ena wai, ka savuya tani na nomu dra, ka lumuti iko ena i lumu.

¹⁰ Au sa vakaisulutaki iko talega ena i sulu ukutaki, ka vakaivavataki iko ena i vava kuli-ni-manumanu, ka vauci iko ena lineni matailalai, ka tutuvitaki iko ena i tutuvi silika.

¹¹ Au a vakaiukuukutaki iko talega ena i ukuuku ni sasauni, ka daramaka na qato ena ligamu, ka vakaitaubetaki iko ena i taube sinucodo matailalai,

¹² Au a vakaiukuukutaki iko ena sau ni ucu, kei na sau ni daliga, ka vakaisalataki iko ena i sala lagilagi.

¹³ Ia o a vakaiukuukutaki ena koula kei na siliva; ia na nomu i sulu lineni matailalai, na silika, na i sulu veivolavolai; a kemu madrai droka vinaka, na oni, kei na waiwai ni kakana. Ka o sa matavinaka sara mai, ka sa yaco mo vanua matanitu.

¹⁴ A rogo yani na yacamu ki na veimatanitu tani ena vuku ni nomu mata vinaka, ni o sa totoka vakaoti, ka lagilagi, ena vuku ni ukuuku ka'u a solia vei iko,” sa kaya na Kalou o Jiova.

¹⁵ “Ia o a vakararavi ga ki na kemu i rairai totoka, ka o sa volitaka kina na yagomu ena i vakarau vakasisila eso ena vuku ni kemu i rogorogo, ka sa ka levu na nomu dautagane kei ira kecega era lako voli yani.

¹⁶ Ia o a qai kauta eso na nomu i sulu ka ukutaka kina na nomu veiyasana cecere ena ka e veivolavolai, ka sa ia kina na dautagane. A veika oqo e sega ni dodonu me a vakayacori, se me na vakayacori.

¹⁷ O sa kauta talega na nomu i ukuuku talei mai na noqu i yaya koula kei na siliva ka'u a solia vei iko, ka cakava kina na nomu i vakatakarakara ni tagane, ka ia kaya na dautagane.

¹⁸ O sa kauta vakakina na nomu i sulu wa-talitali totoka ka vakaisulutaki ira kina na matakau, ka cabora vua na matakau na noqu waiwai olive kei na noqu ka ni vakaboi vinaka.

¹⁹ A kequ kakana talega ka'u a solia vei iko, na madrai droka vinaka, na waiwai olive kei na oni ka'u a solia me kemu — ia o qai cabora talega e matadra me ka boi vinaka ka me ra vakalomavinakataki kina.” Oqo na ka sa kaya na Kalou o Jiova.

²⁰ “Ia o a kauta talega na luvemu tagane kei na luvemu yalewa, o ira o a vakasucuma vei au, ka o sa vakacabora vei ira me ra kania. E sega li ni se rauti iko na nomu dautagane?

²¹ O sa qai vakuria ena nomu a vakamatei ira talega na luvequ ka soli ira me ra vakacabori e loma ni bukawaqa vei ira na kalou matakau?

²² Ena nomu i valavala vakasisila kece sara ni dautagane, o a sega vakadua ni bau nanuma na gauna o a gone kina — ni o a se luvawale tu kina ka sega ni vakaisulu, ka veimoqeyaki ena nomu dra.

²³ A sa kaya na Kalou o Jiova, “Ia mai na nomu i valavala ca kecega, me nomu na ca, me nomu na ca o iko!”

²⁴ O sa qai tara na nomu bure cecere, ka cakava na nomu vale cecere ena saqata ni koro kecega.

²⁵ O sa tara na nomu vale cecere ena mua ni veisala kecega, ka volitaka kina na nomu mata vinaka, ka soli iko vakarawarawa yani vei ira sa takoso mai, me vakalevutaki kina na nomu dautagane.

²⁶ Ia o sa ia na dautagane vei ira na kai Ijipita, o ira na kai nomu daugarogaro, ka vakalevutaka kina na nomu i tovo vakasisila mo vakacudrui au kina.

²⁷ “Ia raica, au na dodoka yani kina na ligaqu vei iko, ka na vakalailaitaka na kemu kakana, ka soli iko ki na nodra yalo kocokoco na kemu meca, na luvedra yalewa na kai Filisitia, o ira ka ra madualaka na nomu i valavala vakasisila.

²⁸ “O sa ia na dautagane kei ira na kai Asiria, ni o sa sega ni mamau rawa; o iko, o ia na dautagane kei ira, ka o sa sega ga ni vakacegu kina.

²⁹ Ia o sa vakalevutaka na nomu dautagane ena vanua ni veivoli o Kalidia; ia ka sa sega ga ni rauti iko oqo.”

³⁰ “Sa dodomo vakalevu soti li vakacava na lomamu,” sa kaya o Jiova, “ka o sa cakava na ka kece oqo; sai valavala ni yalewa dautagane yalo levu;

³¹ ni o sa tara na nomu bure cecere ena ulu ni veisala kecega, ka tara na nomu yasana cecere ena veisaqata ni koro kecega. Ia o sa sega sara ni vakataki ira na yalewa dautagane ni o sa cata na saumi!

³² O tautauvata ga kei ira na yalewa vakawati dauveibutakoci ka ra dau moce kei ira na vulagi me i sosomi ni watidra!

³³ Era dau soli i loloma o ira na tagane vei ira na yalewa dautagane; ia o iko o dau qai soso i loloma tale vei ira o domoni ira, ka soli lavo vei ira na tagane me ra lako mai vei iko mai na veiyasana kecega me ra mai veibutakoci kei iko.

³⁴ Sa dua tani na nomu dautagane ena nomu cakacaka vakadautagane mai vei ira na yalewa tani: ni sa sega ni dua me muri iko me ia na veibutakoci; ka ni o saumi ira tale na tagane, ka soli lavo vei ira; o koya oqo o sa dua tani kina mai vei ira.”

³⁵ O koya oqo, o iko na dautagane, mo rogoca kina na vosa i Jiova:

³⁶ Sa kaya vakaoqo na Kalou o Jiova, “Ni o sa vakalevutaka na nomu velavela, ka vakaraitaka na nomu luvawale ena nomu dautagane kei ira na nomu i tau, kei na nomu matakau kecega, ena vuku talega ni nodra dra na luvemu, o a solia vei ira, kei ira vata talega o sa cata;

³⁷ io, ka'u na vakasoqoni ira vata mai me veisa kei iko mai na veiyasana kecega, ka na vakavotuya vei ira na nomu luvawale kei ira, me ra raica kecega na nomu luvawale.

³⁸ Ia ka'u na vakataulewa vei iko me vaka na lewa e tau vei ira na yalewa vakamau ka ra veibutakoci, kei na vakadave dra, ka'u na sauma vei iko na dra ni cudru kei na vuvu.

³⁹ Ka'u na soli iko ki ligadra na nomu i tau, ka ra na talaraka sobu na nomu bure cecere, ka basuka sobu na nomu yasana cecere; ka ra na luvata tani mai vei iko na nomu i sulu, ka kauta tani na nomu i yaya vakaiukuuku, ka biuti iko mo luvawale tu ka sega ni vakaisulu.”

⁴⁰ “Ka ra na kauta cake mai na kemu i valu, ka vakaviriki iko ena vatu ka tatalaki iko vakamatailalai ena nodra i seleiwau.

⁴¹ Era na vakama na nomu veivale, ka vakataulewa vei iko e matadra era lewe vuqa na yalewa; ia ka'u na muduka sara na nomu dautagane, ia o na sega tale ni soli lavo ena dua na gauna mai muri.

⁴² Ia au na vakamalumalumutaka na noqu cudru katakata vei iko, ka na lako tani talega mai vei iko na noqu vuvu; ka'u na qai cegu, ka na sega ni cudru tale.

⁴³ Baleta ni o sa sega walega ni o vakananuma na gauna o se gone kina, ka sa vakacudrui au tikoga ena ka kecega oqo, raica ka'u na sauma oi au, na nomu i valavala kecega ki na ulumu, sa kaya na Kalou o Jiova. O a sega li ni cakava tiko na i valavala ca oqori me i kuri ni nomu i valavala vakasisila kecega?

⁴⁴ Raica, o ira kecega era taurivaka na vosa vakaibalebale, era na taurivaka na kena oqo me baleti iko, ‘E rau veiucui na tinana kei na luvena yalewa.’

⁴⁵ Sa i iko na luve i tinamu, sai iko talega dou veitacini kei tacimu, era sa cata na watina kei ira na luvena. Sa tinamu na Itaiti, na tamamu na Amoraiti.

⁴⁶ “Sa tuakamu o Samaria, o ira ka ra tiko kei ira na luvena vaka ki na vualiku ni nomu i tikotiko; kei na tacimu yalewa ka tiko vaka ki na ceva mai vei iko, o Sotoma kei ira na luvena yalewa.

⁴⁷ Ia o a sega ni muria na nodra i valavala, se cakava na nodra i valavala vakasisila; ia ena loma ni gauna lekaleka wale, o sa vakacacataki iko vakalevu cake ena nomu i valavala kecega mai vei ira.”

⁴⁸ Sa kaya na Kalou o Jiova, “Me vaka na dina ni noqu bula, sa sega ni bau cakava o Sotoma na tacimu, kei ira na luvena yalewa, me vaka ni o sa cakava kei ira na luvemu yalewa.

⁴⁹ Raica oqo, sa caka cala i Sotoma na ganemu, na viavialevu, na daumamau sivia ena kakana, na dauvakacegu wale ni tu vinaka, ia ka sega ga ni vukei ira na malumalumu kei na dravudravua.

⁵⁰ Era sa viavia marama, ka ra cakava na ka vakasisila e mataqu; o koya oqo ka'u sa kauti ira tani kina; ni'u a raici ira.

⁵¹ “Ia sa sega mada ni veimamataka na levu ni nomu i valavala ca kecega; ka levu cake na veika vakasisila o ni cakava mai vei ira, ka sa vakadonui ira na tacimu me ra rairai yalo dodonu ena vuku ni valavala vakasisila kecega o sa cakava.

⁵² Ia o iko talega, mo kakua ni kurabui ni na mamada na kedra i totogi na ganemu. Ena vuku ni sa rui sivia na ca ni cala o cakava, ka sa mani rui vakasisila vakalevu cake mai na ka era vakayacora: era sa yalo dodonu cake kina mai vei iko. Mo colata talega o iko na nomu madua, ka colata na kena vakaloloma, ni ko sa vakadonui ira na tacimu me rairai vaka ni ra yalo dodonu.

⁵³ “Au na vakasuka tale na nodra veika vinaka; vei rau o Sotoma kei ira na luvena yalewa, kei Samaria kei ira na luvena yalewa, ka'u na vakasuka talega na nodra veika vinaka ena kedra maliwa,

⁵⁴ mo luvuci kina ena nomu madua, ena veika kecega o sa cakava, ni o sa vakacegui ira.

⁵⁵ Mo ni dui lesu tale ka la'ki tiko me vaka e liu o Sotoma kei ira na luvena yalewa, me lesu o Samaria kei ira na luvena yalewa, ka me ra la'ki tiko me vaka e liu; ka mo ni qai lesu talega kei ira na luvemu yalewa mo ni la'ki tiko me vaka e liu.

⁵⁶ E a sega li ni dau wewe ni gusumu na ganemu o Sotoma ena veisiga ni nomu viavialevu,

⁵⁷ ni bera ni vakavotui na nomu ca? Ia oqo o sa yaco mo vakataki koya, me ka ni veibeitaki vei ira na luve i Itomi kei na veivanua e volekata, kei ira na luvedra yalewa na kai Filisitia, o ira ka ra tu volivoliti iko ka ra beci iko.

⁵⁸ Mo colata na i totogi ni nomu cakava na ka vakasisila kei na ka velavela,” sa kaya o Jiova.

⁵⁹ Ni sa kaya vakaoqo o koya na Turaga, “Io, ka'u na cakava vei iko me vaka na ka o sa cakava, ni o sa beca na kena bubului, ka o sa vakacacana na kena veiyalayalati.

⁶⁰ Ia ka'u na nanuma na noqu veiyalayalati kei iko ena gauna o gone kina, ka vakataudeitaka vei iko na veiyalayalati tawa mudu.

⁶¹ O na qai nanuma na noqu i valavala, ka madua sara kina, ni o na ciqomi ira lesu na tacimu, o ira era qase kei ira era gone vei iko: ia ka'u na soli ira vei iko me ra luvemu yalewa; ka sega ga ni vakayacori oqo ni'u a veiyalayalati kei iko; ia o na kila ni sai au o Jiova.

⁶² Au na vakavouia na noqu veiyalayalati kei iko o na qai kila ni'u sa nomu Kalou.

⁶³ Mo nanuma kina, ka taqaya, ka kakua ni dolava tale na gusumu ena vuku ni nomu madua, ni'u sa na vosoti iko ena veika ca kecega o sa cakava oti,” sa kaya na Kalou o Jiova.