Isikeli 13 - Vakavakadewa Vou kei na iVola tale eso

Vunauci o Ira na Parofita Lasulasu

¹ A yaco vei au na vosa i Jiova, ka vaka,

² “Luve ni tamata, mo parofisaitaka na ca vei ira na parofita i Isireli. Mo vunauci ira na dau bulia ga vakataki ira na nodra vosa ni parofisai. Tukuna vei ira me ra rogoca na vosa i Jiova.”

³ Sa kaya vakaoqo na Kalou o Jiova, “Ena cudruvi o ira na parofita yalowai ka lialia, era sa muria na yalodra, ka vakabulia ga na nodra raivotu.

⁴ I Isireli, o ira na nomu parofita era sa vaka na fokisi ni veikau sa lako voli ena rusarusa ni dua na koro.

⁵ Era sa sega ni lako cake ki na tiki ni bai sa basuki, se viria e dua na bai ni mataqali i Isireli me ra tu rawa tu ni sa ia na i valu ena siga i Jiova.

⁶ Sa ka wale ga na nodra raivotu, ka rui calacala na nodra parofisai. Era sa dautukuna tiko ni ra sa vakadewataka voli na noqu i tukutuku, ia ka'u a sega ni talai ira yani. Ia era sa namaka ga me yaco vakaidina na nodra vosa!

⁷ Au sa kaya vei ira: sa sega ni dina na raivotu eso o ni sa raica, ka sa rui calacala vakalevu na nomuni vosa ni parofisai. O ni sa kaya ni ra sa noqu vosa, ia au a sega ni se bau tukuna e dua na ka vei kemuni!”

⁸ A sa qai kaya kina vakaoqo vei au na Kalou o Jiova, “Me vaka ni o ni sa dauvosa lasu ka sa sega ni dina na nomuni raivotu, au sa saqati kemuni kina.

⁹ Na ligaqu ena saqati ira na parofita era sa raica na ka wale, a vosataka na vosa mana lasu; era sega ni tiko ena nodra i soqosoqo na noqu tamata, era na sega ni volai ena i vola ni mataqali ni Isireli. Era na sega talega ni curuma na vanua o Isireli; ia o ni na kila ni sai au na Kalou o Jiova.

¹⁰ “Ena vuku ni ka oqo, io, ni ra sa vakacalai ira na noqu tamata, ka kaya, ‘Na tiko vakacegu,’ ia sa sega na tiko vakacegu, ka baleta talega ni ra sa viria na bai vatu na tamata, era qai boroya ena i boro vulavula na parofita.

¹¹ Mo kaya vei ira era sa boroya ena i boro vulavula, ni na bale ga! Ena tau bi mai na uca ka na lutu mai na uca cevata matai lelevu, ka na liwa mai e dua na cava levu;

¹² ia ni sa bale sobu na bai vatu, ena sega ni kainaki tale vei kemuni, ‘Sa evei li na i boro vulavula o ni a boroya kina?’

¹³ O koya oqo, sa vosa kina vakaoqo na Kalou o Jiova: Au na vakavuna e dua na cava levu me liwa mai ena dela ni noqu cudru kaukauwa; ia ena yaco mai na noqu yalo katakata ena uca tau bi, kei na uca cevata matai lelevu ni cudru me kena i vakarusa.

¹⁴ Ia ka'u na basuraka sobu na bai vatu o ni a boroya ena i boro vulavula, ka biuta sobu ki na qele, me rairai mai na kena yavu; ia ni sa bale sobu, o ni na mate e lomadonu; ia o ni na qai kila ni sai au o Jiova.

¹⁵ “Au na vakayacora oqo na noqu cudru ki na bai vatu, vei ira talega era sa boroya ena i boro vulavula; ia ka'u na kaya vei kemuni, Sa yali na bai vatu, ka ra sa yali talega o ira era a boroya;

¹⁶ io, o ira na parofita ni Isireli ka ra parofisaitaki Jerusalemi, ka raica na kena raivotu ni vakacegu ki na koro oqo; ia e sa sega sara kina na vakacegu, sa kaya na Kalou o Jiova.

¹⁷ “Ia o iko na luve ni tamata, mo rai vakacudrucudru vei ira na luvedra yalewa na kai nomu, o ira ka ra a parofisai ni vu mai na lomadra ga; ia mo parofisaitaka na ca vei ira,

¹⁸ ka kaya, a kaya vakaoqo na Kalou o Jiova, “Ena ca o ira na yalewa ka cula na i vau qato ki na liga kece, ka cakava na i ubi ni ulu vei ira na veimataqali tamata kecega ka duidui na kedra i tuvaki me ra rawa yalo kina! Mo ni vakasasataka li na yalodra na noqu tamata, ka taqomaka na yalodra eso tale me yaga vei kemuni?

¹⁹ O ni sa vosa vakacacataki au e matadra na noqu tamata mo ni rawata kina eso na kemuni barile kei na madrai. O ni sa dau vakamatei ira na tamata era se sega ni dodonu me ra mate, ka vakabula tiko eso na tamata ka sega ni dodonu me ra bula. Sa levu kina na nomuni lasutaki ira na noqu tamata, ka ra sa vakabauti kemuni.”

²⁰ O koya oqo, sa kaya kina vakaoqo na Kalou o Jiova: “Raica, au sa cata na nomuni vau ni caka mana, o ni dau rawa yalo kina, ka'u na dresulaka tani mai na ligamuni, ka sereki ira na yalo o ni sa rawa voli me ra galala me vakataki ira na manumanu vuka.

²¹ Au na dresulaka talega na nomuni ubi ni ulu, ka kaliraki ira na noqu tamata mai na ligamuni, ka ra na sega ni tiko tale me ra i toki ni valu, ia o ni na kila ni sai au o Jiova.

²² “Ena vuku ni nomuni a vakayalolailaitaki ira na yalo dodonu ena nomuni lasu, ka vakauqeti ira na tamata ca, me kakua ni ra gole tani mai na nodra sala ca me ra vakabulai ira kina;

²³ ia oqo o ni sa na sega ni raica tale na raivotu lasu ni veivakasesei, ka sega talega ni cakava tale na ka mana lasu; ka'u na kaliraki ira tani na noqu tamata mai na ligamuni. Ia o ni na kila ni sai au o Jiova.”