Isikeli 12 - Vakavakadewa Vou kei na iVola tale eso

Dusimaki na Kau Vakabobula i Juta

¹ A yaco tale vei au na vosa i Jiova, ka vaka,

² “Luve ni tamata, o sa tiko ena kedra maliwa na tamata talaidredre. E tiko na matadra, ia era sa sega ga ni rai; e tiko na daligadra, ia era sa sega ga ni rogo; ni ra sa kawatamata dautalaidredre.

³ Ia oqo, o iko na luve ni tamata, mo vakarautaka na nomu i yaya ni toki vakabobula, ka vakayacora oqo e matadra ni se bera ni bogi na vanua. Me ra raici iko ni o sa biu vanua ka lako yani ki na dua tale na vanua. De ra na qai kila kina o ira ni ra sa tamata talaidredre.

⁴ Mo kauta ki tautuba e matadra na nomu i yaya ni se siga na vanua me vaka na i yaya ni toki; ia mo lako tani yani e matadra ena yakavi me vaka na nodra sa dau kau yani na tamata me ra la'ki bobula.

⁵ Ni ra vakaraici voli, mo kelia basikata na bai, ka curutaka yani ki tautuba na nomu i yaya.

⁶ Laiva me ra saravi iko ni o sa colata yani na nomu i yaya e tabamu, ka lako yani ki na vanua buto; mo qai ubia na matamu mo kakua kina ni raica rawa na vanua o sa lako tiko kina; ni'u sa digitaki iko mo i dusidusi vei ira na mataqali i Isireli.”

⁷ Ia ka'u a cakava me vaka ka'u sa vakaroti kina. Au sa yauta ki tautuba na noqu i yaya ena siga, me vaka na i yaya ni toki vakabobula, ia ena yakavi, ka'u sa kelia na bai ena ligaqu; ni sa buto na vanua ka'u sa qai yauta tani, ka'u a colata yani e matadra.

⁸ A yaco vei au na vosa i Jiova ena mataka, ka vaka,

⁹ “Luve ni tamata, era sa bau liaci iko li na mataqali i Isireli, o ira na tamata dautalaidredre, me ra tarogi iko, ka kaya, “A cava li o sa cakava tiko oqo?”

¹⁰ Mo kaya vei ira, “Sa kaya vakaoqo na Kalou o Jiova: Na vosa ni parofisai bibi oqo sa bale vua na tui mai Jerusalemi, vei ira kece talega na mataqali i Isireli era tiko kaya.”

¹¹ Mo kaya, “Sa i au na i dusidusi bula vei kemuni: me vaka na ka au sa cakava, ena caka vakakina vei ira; era na toki yani, ka lako vakabobula yani.”

¹² Ia na tui sa tiko kei ira ena colata na nona i colacola e tabana ni sa yakavi sobu, ka lako yani; sa na kelia basikata na lalaga ka lako yani; me ubia na matana me kakua ni raica na qele.

¹³ Ia ka'u sa tevuka vua na noqu lawa, ena coriti koya talega na noqu i cori: ka'u na kauti koya ki Papiloni ki na nodra vanua na kai Kalidia, ia ena sega ni raica na vanua o ya, ka ni na mate kina o koya.

¹⁴ Ia ka'u na veibiuyaki ira ki na veimata ni cagi o ira kecega ka ra tiko vakavolivoliti koya, ka ra dau vukei koya kei ira na nona mataivalu; ia ka'u na ucuna na i seleiwau ka muri ira.

¹⁵ “Era na kila ni sai au o Jiova, ni'u sa vakasavi ira ki na veimatanitu.

¹⁶ Ia ka'u na vakalaiva me ra dro bula eso vei ira mai na i seleiwau, mai na dausiga kei na mate dauveitauvi, ka me rawa ni ra tusanaka kina na nodra veika vakasisila kece ki na veimatanitu era dui yaco kina, ka ra na kila ni sai au o Jiova.”

¹⁷ A yaco tale mai vei au na vosa i Jiova, ka vaka,

¹⁸ “Luve ni tamata, mo sautaninini ni o sa kania na kemu kakana, ka yavavala ena rere ni o sa gunuva na memu wai.

¹⁹ Mo tukuna vei ira na lewe ni vanua, Sa kaya vakaoqo na Kalou o Jiova ena vukudra na lewe i Jerusalemi mai na vanua o Isireli: Era na sautaninini ni ra sa kana, ka yavavala ena rere ni ra gunu wai. Ena kau laivi kece na veika sa tu ena nodra vanua, ena vuku ni nodra i valavala kaukauwa o ira kecega sa tiko kina.

²⁰ Ena lala mai na veikoro sa tawa, ka rusa na vanua; ia o ni na qai kila kina ni sai au o Jiova.”

²¹ A sa kaya vei au o Jiova,

²² “Luve ni tamata, a cava era cavuta vakawasoma tiko kina na Isireli na vosa vakaibalebale oqo, ‘Sa vakadedetaki na gauna, ka sa sega na raivotu me yaco’?

²³ Mo qai tukuna sara vei ira oqo, Sa kaya vakaoqo na Kalou o Jiova: Au na muduka sara na vosa vakaibalebale o ya. Ena sega tale ni cavuti wasoma e Isireli. Ia mo tukuna vei ira me qai kaya ga na kena oqo, ‘Sa yaco mai oqo na kena gauna, ka sa yaco vakaidina na veika sa yalataki!’

²⁴ “Ni sa na sega tale na raivotu lasu se na vosa ni parofisai dauveicavilaki vei ira na Isireli.

²⁵ Ni sai au o Jiova, au na vosa vei ira, ia na vosa au na cavuta ena yaco vakaidina. Ena sega ni vakaberaberataki tale. Ia ena nomuni gauna ga, oi kemuni na tamata talaidredre, ka'u na cavuta kina na vosa ka vakayacora sara,” a sa kaya na Kalou o Jiova.

²⁶ Sa yaco tale vei au na vosa i Jiova, ka vaka,

²⁷ “Luve ni tamata, raica, era sa nanuma na Isireli ni raivotu o sa raica oqo sa baleta e dua na gauna e se bera mai ka se yawa sara ki liu.

²⁸ O koya oqo mo kaya kina vei ira, sa kaya vakaoqo na Kalou o Jiova: ‘Ena sega ni vakaberaberataki tale e dua na noqu vosa, ia na vosa au sa cavuta ena vakayacori ga, sa kaya na Kalou o Jiova.’ ”