Isikeli 11 - Vakavakadewa Vou kei na iVola tale eso

Sa Cudruvi o Jerusalemi

¹ A sa laveti au cake na Yalo ni Kalou ka kauti au ki na matamata vaka ki na tokalau ni Valenisoro i Jiova. Au a qai raica ni ra sa tu mai na matamata ni koro e lewe ruasagavulu kalima na tamata, ka tiko vata kei ira o Jesenaia na luve i Asuri kei Pelataia na luve i Penaia, e rua na vakailesilesi liu ni matanitu.

² A kaya vei au na Kalou, “Luve ni tamata, o ira na tamata oqo era sa vakasamataka ka vukutaka na ca, ka ra vakavuvulitaka na ka ca ena koro oqo.

³ Ni ra a kaya, ‘Sa sega ni voleka mai na gauna me da tara vale kina; na koro oqo sa vaka e dua na kuro levu, eda sa lewe ni kuro ga oi keda.’

⁴ O koya oqo, mo parofisaitaka kina na ka ca ena yaco vei ira. Luve ni tamata, mo parofisaitaka sara!”

⁵ A sa curumi au na Yalo i Jiova, a sa kaya vei au, “Mo qai tukuna, ‘Sa kaya vakaoqo o Jiova: Oi kemuni na Isireli, oqo na veika o ni sa dau vakananuma, ni'u sa kila na ka sa tiko e lomamuni.

⁶ O ni sa vakamatea oti e lewe vuqa na tamata ena koro oqo, ka vakasinaita na kena sala ena yago ni tamata mate.

⁷ Sa i koya ga oqo na ka sa tukuna tiko vei kemuni na Kalou o Jiova. Na koro oqo sa vaka dina na kuro ni vakasaqa, ia na cava na lewe ni kuro? Na yagodra mate ga na tamata o ni sa vakamatea! O ni na sega tale ni tiko eke — au na viritaki kemuni tani ga mai na koro!

⁸ O ni a rerevaka na i seleiwau; ia ka'u na kauti ira mai na tamata era sa vakaiseleiwau me ra valuti kemuni, sa kaya na Turaga o Jiova.

⁹ Au na kauti kemuni tani mai kina, ka soli kemuni ki na ligadra na kai tani, me ra lewai kemuni.

¹⁰ O ni na bale ena i seleiwau; ka'u na veilewaitaki kemuni ena i yalayala ni vanua o Isireli; ia o ni na qai kila kina ni sai au o Jiova.

¹¹ Ena sega ni yaco me nomuni kuro na koro oqo, ka o ni na sega talega ni lewe ni kuro; ia ka'u na lewai kemuni ga ena i yalayala kei Isireli.

¹² O ni na qai kila kina ni sai au o Jiova, o koya o ni sa sega ni via muria na nona lawa kei na nona i vakaro, ia o ni sa muria ga na nodra i tovo na veimatanitu sa tiko voliti kemuni.”

¹³ Ena gauna ka'u a parofisai tiko kina, a qai cibati koya vakasauri o Pelataia na luve i Penaia. Au a qai bale vakatoboicu, ka tagi vakadomoilevu, ka kaya, “Isa, Jiova na noqu Kalou! O ni na vakamatei ira kece li na vo-ni-bula i Isireli?”

Na Yalayala ni Kalou vei Ira na Tiko Vakabobula

¹⁴ A yaco tale vei au na vosa i Jiova, ka vaka,

¹⁵ “Luve ni tamata, o ira na wekamu e Jerusalemi era sa veitalanoataki iko tiko kei ira na wekamu na Isireli era sa tiko vakabobula. Era sa kaya, ‘Era sa lako tani vakayawa mai vei Jiova na tiko vakabobula; sa solia ga vei keimami na vanua oqo me keimami taukena.’

¹⁶ O koya oqo mo qai tukuna kina, ‘Sa kaya vakaoqo na Kalou o Jiova: E dina ga ni'u a toki ira vakayawa mai vei ira na veimatanitu ka sega talega ni'u vakasavi ira ki na veivanua, ia au na dau tiko ga kei ira ena vanua duidui eso era sa lako yani kina ena gauna mada ga oqo.’

¹⁷ Mo qai kaya kina, ‘Sa kaya vakaoqo na Kalou o Jiova: Au na vakasoqoni kemuni mai vei ira na tamata, kei ira na veivanua ka'u a vakasavi kemuni kina, ia ka'u na solia vei kemuni na vanua o Isireli.’

¹⁸ Ena gauna era sa lako yani kina ki kea, me ra na kauta tani na nodra i valavala velavela kei na i valavala vakasisila kecega.

¹⁹ Au na solia vei ira e dua na yalo vou ka vakavouia na lomadra. Ia ka'u na kauta tani na yalo vatu ni lomadra ka solia vei ira na yalo ni talairawarawa;

²⁰ me ra muria na noqu vunau, ka vakabauta na noqu lewa, ka cakava. Era na qai noqu tamata, ka'u na qai nodra Kalou oi au.

²¹ Ia o ira sa lomadra me ra muria na nodra i valavala beci ka velavela kei na nodra i valavala vakasisila, ka'u na qai sauma ga vei ira,” sa kaya na Kalou o Jiova.

²² A sa talave cake na tabadratou na jerupi ka vakatateba, ka kabi e tutudratou na qiqi. A sa sobuti iratou na rarama ni lagilagi ni Kalou i Isireli.

²³ A sa qai biuta na koro na rarama ni lagilagi i Jiova ka la'ki toka ena ulunivanua mai na yasa ni koro vaka ki na tokalau.

²⁴ A qai laveti au cake na Yalo ni Kalou ka kauti au yani ki Papilonia, ena raivotu, vei ira sa tiko vakabobula. A sa qai lako tani mai vei au na raivotu,

²⁵ ka'u a qai tukuna vei ira na tiko vakabobula na veika kece sa vakaraitaka vei au o Jiova.