Iperiu 9 - Vakavakadewa Vou kei na iVola tale eso

Na Sokalou Vakavuravura kei na Sokalou Vakalomalagi

¹ Na i matai ni veiyalayalati sa vakotori tu kina na i vakarau ni sokalou kei na vanua me qaravi kina na sokalou e vuravura.

² A sa biriki cake e dua na valelaca, na kena e taudaku, ka sa vakatokai na Tikina Tabu. E tiko e loma na i tutu ni cina, na teveli, kei na madrai e dau vakacabori vua na Kalou.

³ E na daku ni i karua ni latilati, e tara toka kina na valelaca sa vakatokai na Tikina Tabu Sara.

⁴ Sa tu kina na miqa koula ka i cabocabo ni veika boi vinaka kei na Kato ni Veiyalayalati sa bonoti wavoki ena koula, ka sa tiko e loma e dua na sedre koula lailai ka tu kina na mana, kei na i titoko i Eroni ka sa yaco me vakadrauna, kei na vatu raraba e rua sa volai kina na veiyalayalati.

⁵ E rau toka ena dela ni Kato na jerupi e rua, ka rau vakatetaba ka vakaruruga na vanua sa dau buluti kina na i valavala ca. Ia sa sega ni kena gauna oqo me vakamacalataki kina vakamatailalai na veika kece oqo.

⁶ Sa i koya oqo na i tuvatuva ni veika sa vakayacori. Era sa dau lako yani ki na valelaca e taudaku o ira na bete ena veisiga me ra qarava na nodra i tavi,

⁷ ia sa dau curu duadua ga na Bete Levu ki na valelaca e loma, ka sa vakayacora vakadua ga oqo ena loma ni dua na yabaki. A sa kauta vata yani kina na dra me vakacabora vua na Kalou ena vuku ni nona i valavala ca vakai koya kei na vuku talega ni nodra caka cala vakacalaka na tamata.

⁸ Sa vakatavulica vakamatata sara kina na Yalo Tabu mai na i tuvatuva oqo ni sa sega ni dolavi rawa na sala ki na Tikina Tabu Sara kevaka e se duri cake tikoga na valelaca e taudaku.

⁹ Oqo e dua na i dusidusi me baleta na gauna edaidai. A kena i balebale ga ni veika kece sara sa vakacabori oqo vua na Kalou era sa sega ni rawa ni vakasavasavataka sara na yalodra kei na nodra lewa-e-loma na tamata era sa qarava na Kalou,

¹⁰ ka ni sa baleta ga na kakana kei na ka-ni-gunu, kei na veimataqali valavala ni veivakasavasavataki e vuqa. Na lawa eso oqo sa baleta ga na ka e taudaku, ka sa yaga ga me yacova na gauna sa vakataudeitaka vou kina na Kalou na i tuvatuva vou.

O Karisito na Noda Bete Levu

¹¹ Ia sa lako oti mai na Karisito me noda Bete Levu me baleta na veika vinaka era sa yaco oti mai. Na valelaca sa veiqaravi kina o koya sa uasivi vakalevu cake ka vinaka sara; a sa sega ni caka ena liga na valelaca oqo, ka kena i balebale ni sa sega ni tiki ni vuravura oqo.

¹² Ena gauna sa lako kina o Karisito ki na valelaca ka curuma vakadua ga me baleta na tamata kecega na Tikina Tabu Sara, a sa sega ni kauta na dra ni me kei na dra ni luve ni bulumakau me la'ki vakacabora; ia sa kauta ga na nona dra vakai koya ka sa rawata kina me solia vei keda na bula tawamudu.

¹³ Na dra ni me kei na bulumakau kei na dravusa ni luve ni bulumakau vakamai sa dau kureitaki vei ira na tamata tawa savasava me ra vakasavasavataki kina.

¹⁴ Me vaka sa dina sara oqo, sa na levu cake sara vakaidina na ka ena cakava rawa na dra i Karisito! Ni sa soli koya na Karisito me i soro sa vinaka sara vua na Kalou ena vuku ni Yalo Tabu. Na nona dra ena vakasavasavataka na noda lewa-e-loma mai na i valavala makawa sa tawayaga, me da rawa kina ni qarava na Kalou bula.

¹⁵ Oqo na vuna sa yaco kina na Karisito me mata ni kena vakarautaki na veiyalayalati vou, ka me ra ciqoma kina o ira sa kacivi na veivakalougatataki tawamudu sa yalataka na Kalou. Sa rawa ni vakayacori oqo baleta ni sa yaco oti e dua na mate ka sa sereki ira na tamata mai na nodra caka cala, ka yaco oqo ena gauna e se vakabibitaki tiko kina na i matai ni veiyalayalati.

¹⁶ Me baleta na i vola ni veiyalayalati ena vuku ni kena dau veiwaseyaki na nona i yau e dua na tamata ni sa mate, sa ganita me na dau vakadinadinataki taumada ni sa mate oti o koya ka vola,

¹⁷ ka ni sa qai dau rawa walega ni vakayacori na veika e tu kina ni sa yaco oti na mate; ni sa sega na kena yaga kevaka e se bula tikoga o koya ka vola.

¹⁸ Sa i koya oqori na vuna sa vakataudeitaki kina na i matai ni veiyalayalati mai na kena vakayagataki na dra.

¹⁹ Sa liu taumada na nona tukuna o Mosese vei ira na tamata na i vakaro kece mai na Lawa. A sa qai kauta na dra ni luve ni bulumakau kei na me kei na wai, ka kureitaka ki na i vola ni Lawa kei ira na tamata kecega, ka sa vakayagataka na vutinisipi roka damudamu kei na isopi.

²⁰ A sa kaya, “Oqo na dra sa vakadeitaka na veiyalayalati sa vakarota na Kalou vei kemuni mo ni muria.”

²¹ A sa kureitaka talega vakakina na dra o Mosese ki na Valelaca Tabu kei na veiyaya kecega ni sokalou.

²² Sa vakadinadinataki mai na Lawa ni sa voleka ni vakasavasavataka na ka kece sara na dra; ni sa bokoci walega na i valavala ca kevaka sa vakadavei na dra.

Sa Kauta Tani na i Valavala Ca na i Soro i Karisito

²³ Sa dodonu kina me ra vakasavasavataki vaka o ya o ira na i vakatakarakara se i yaloyalo ni veika oqo mai lomalagi; ia na veika vakalomalagi sa ganiti ira ga na i soro sa uasivi cake mai vei ira oqo.

²⁴ Ni sa sega ni curu na Karisito ki na Tikina Tabu sa caka ena liga ni tamata, ka i vakatakarakara ga ni kena ka dina; ia sa curu vakadodonu sara ga ki lomalagi, me rairai ki na mata ni Kalou ena vukuda.

²⁵ O koya na nodra Bete Levu na Jiu sa dau curu ki na Tikina Tabu Sara ena veiyabaki ka kauta kina na dra ni manumanu. Ia sa sega ga ni curu kina o Karisito me la'ki cabori koya vakavuqa;

²⁶ ni kevaka sa vakaoqo, sa dodonu kina me na mate vakavuqa o koya me tekivu sara mai na i vakatekivu ni vuravura. Ia oqo, ni sa voleka na i vakataotioti ni ka kecega, a sa basika mai kina o koya vakadua ga ena vuku ni tamata kecega, me kauta laivi na i valavala ca ena vuku ni nona cabori koya me i soro.

²⁷ Ni sa lesi me ra na mate ga vakadua na tamata, ka me qai muri na nodra lewai mai vua na Kalou.

²⁸ Sa vaka talega kina vei Karisito, ni sa vakacabori ga vakadua me kauta laivi na nodra i valavala ca na lewe vuqa. Ena rairai tale mai o koya ena i karua ni gauna, ka sega ni baleta na i valavala ca, ia me mai vakabulai ira ga era sa waraki koya.