Iperiu 5 - Vakavakadewa Vou kei na iVola tale eso

¹ Sa dau digitaki na bete levu mai vei ira na tamata ka sa lesi o koya me qarava na Kalou ena vukudra. Sa nona i tavi me dau vakacabora na i madrali kei na i soro ni valavala ca.

² Sa rawarawa vua me tauri ira toka vakamalua na tamata viavialevu kei ira era caka cala, me vaka ni sa malumalumu talega o koya ena vuqa na ka.

³ Me vaka ni sa tu talega vua na malumalumu, sa ganita kina me vakacabora na i soro ni nodra i valavala ca na tamata kei na nona i valavala ca vakai koya.

⁴ Sa sega ni dua e digitaki koya ga vakai koya me qarava na i tavi dokai ni cakacaka vakabete levu, ia sa kacivi koya ka lesi koya duadua ga na Kalou — me vakataki Eroni.

⁵ Sa vaka talega kina o Karisito, ni a sega ni vakacerecerei koya vakai koya me buli me bete levu, ia sa lesi koya ga na Kalou ka kaya vua: “Sa i iko na Luvequ; Sa yaco oqo edaidai me'u Tamamu.”

⁶ E a kaya talega ena dua na tikina: “O na yaco o iko mo bete tawamudu, Ena matabete i Melikiseteki.”

⁷ E na gauna ni bula vakatamata i Jisu, a sa dau vakacabora o koya na nona masu kei na kerekere ena vakamamasu ena domoilevu kei na tagi vua na Kalou, o koya sa rawata me vakabulai koya mai na mate. Ia ena vuku ni nona yalomalumalumu kei na nona yalodina, a sa rogoci koya na Kalou.

⁸ E dina ga ni sa Luve ni Kalou o koya, a sa vulica ga na bula ni talairawarawa mai na veika rarawa e sota kaya.

⁹ Ni sa vakayacori oti o koya me vinaka taucoko sara, a sa yaco me vu ni bula tawamudu vei ira kecega sa talairawarawa vua,

¹⁰ ka sa lesi koya na Kalou me bete levu, io ena matabete i Melikiseteki.

Me Kakua na Suka ki Muri

¹¹ E vuqa na ka e tu me keitou vakaraitaka me baleta na ka oqo, ia sa dredre ga me vakamacalataki vei kemuni ni sa rui berabera na nomuni kila rawa.

¹² Sa dodonu mo ni sa dauveivakatavulici tiko ena gauna oqo, ia o ni se gadreva voli ga e dua me mai vakavulici kemuni tale ena i matai ni lesoni me baleta na vosa ni Kalou. Sa yaga ga vei kemuni mo ni gunu sucu, ka segai na kakana dina.

¹³ O koya yadua e se gunu sucu tikoga sa sega ni vakaduiduitaka rawa na vinaka mai na ca, ka ni se gone lailai ga.

¹⁴ Ia na kakana dina sa ganiti ira sa qase cake, o ira era sa vakavulica na lomadra ka sa rawa me ra vakaduiduitaka na vinaka mai na ca.