Iperiu 4 - Vakavakadewa Vou kei na iVola tale eso

Eda na Vakacegu Vata kei na Kalou

¹ Sa solia vei keda na Kalou ena gauna oqo na nona vosa ni yalayala ni sa rawa vei keda me da curu ki na nona vakacegu. O koya oqo me da sa qaqarauni vakavinaka sara kina, de lakolako ena qai sega ni vakaivotavota kina eso vei kemuni.

² Ni a yaco mai vei keda na i Tukutuku Vinaka, me vakataki ira talega, ia sa sega ga ni yaga vei ira baleta ni ra a sega ni ciqoma ena vakabauta na ka era rogoca.

³ Ia vei keda eda sa vakabauta, eda sa ciqoma na vakacegu sa vosa ni yalayala oti kina na Kalou. Io, me vaka ga na nona vosa: “Ena dela ni noqu cudru ka'u sa yalataka kina oqo: ‘Era na sega sara ni curuma na vanua sa tiko kina na noqu vakacegu!’ ” A sa tukuna vakaoqo ka dina ga ni a sa oti na nona cakacaka ena gauna sa bulia kina na vuravura.

⁴ Ni sa tukuni oti talega ena i Vola Tabu na tikina me baleta na i kavitu ni siga: “A sa vakacegu mai na nona cakacaka kecega na Kalou ena i kavitu ni siga.”

⁵ A sa kaya talega ena tikina o ya o koya: “Era na sega sara ni curu ki na noqu vakacegu.”

⁶ O ira era a rogoca taumada na i Tukutuku Vinaka era sa sega ni vakaivotavota ena vakacegu o ya, baleta ni ra sa sega ni vakabauta ena vuku ni talaidredre. Ia eso tale sa qai soli vei ira me ra ciqoma.

⁷ Sa qai vakaraitaki oqo ni sa qai lokuca tale na Kalou e dua na siga ka vakatoka me “Edaidai”. A sa tukuna ena gusu i Tevita ena dua na gauna sara emuri na vosa sa kainaki oti: “Edaidai, kevaka o ni sa rogoca na domona, Ni kakua ni vakaukauwataka na yalomuni.”

⁸ Ia kevaka sa solia vei ira na tamata o Josua na vakacegu ni Kalou, ke a sega ni tukuna na Kalou e dua tale na siga emuri.

⁹ Ia oqo, sa tikoga vei ira na tamata ni Kalou na vakacegu ka sa vaka na nona vakacegu na Kalou ena i kavitu ni siga.

¹⁰ Ni o koya yadua sa rawata na vakacegu o ya sa yalataka na Kalou ena vakacegu mai na nona cakacaka, me vaka na nona a vakacegu na Kalou mai na nona cakacaka.

¹¹ O koya oqo me da gumatua sara kina me da rawata na vakacegu o ya, me kakua kina ni dua e bale me vakataki ira ena vuku ni tawa vakabauta.

¹² Ni sa bula ka kaukauwa na vosa ni Kalou, ka sa gata cake mai na i seleiwau batirua. Sa suwaka rawa na vanua e rau sota kina na lomada kei na yaloda, na i sema ni yago kei na uto ni sui, ka sa dau vakalewa rawa na nanuma kei na i naki ni lomadra na tamata.

¹³ Sa sega ni dua na ka me vunitaki rawa vua na Kalou; ia sa laurai ga e matana votu na veika buli kecega, ka sa tevuki vakavinaka sara e matana. Ni sai koya ga eda na vakatusa vua na veika me baleti keda.

O Jisu na Bete Levu

¹⁴ O koya oqo, me da taura matua kina na vakabauta eda sa vakatusa, ni sa tiko ena keda maliwa e dua na Bete Levu ka sa curuma oti na i tikotiko lagilagi ni Kalou — o Jisu, na Luve ni Kalou.

¹⁵ Na noda Bete Levu oqo sa sega ni vaka e dua ka sega ni daulomani keda ena noda malumalumu; ia sa veretaki oti ena ka kece sara o koya me vakataki keda ga, ia sa sega ga na nona i valavala ca.

¹⁶ O koya oqo, me da ia ka toro vakadoudou sara kina ki na nona i tikotiko vakaturaga ni loloma-savu na Kalou, me da ciqoma kina na nona yalololoma ka vota vakakina na i votavota ni loloma-savu eda dui gadreva me yaga vei keda.