Iperiu 3 - Vakavakadewa Vou kei na iVola tale eso

Sa Cecere Cake vei Mosese o Jisu

¹ Kemuni na wekaqu lotu Vakarisito, oi kemuni sa kacivi mai vua na Kalou! Ni vakasamataki Jisu mada, o koya sa tala mai na Kalou me mai Bete Levu ni vakabauta eda sa vakatusa tiko.

² A sa yalodina o koya vua na Kalou, ka sa digitaki kina me qarava na cakacaka ni Kalou, me vaka sa yalodina o Mosese ena qaravi ni vale ni Kalou.

³ Na tamata sa tara na vale sa dokai vakalevu cake mai na vale vakataki koya. Sa vakakina o Jisu, ni sa dokai vakalevu cake o koya mai vei Mosese.

⁴ Na vale kecega e tara sa tara ga na tamata, ia sai koya ga na Kalou sa tara na ka kecega.

⁵ A sa yalodina o Mosese ki na nona i tavi ni dauveiqaravi ena vale ni Kalou, ka sa vakaraitaka na veika ena qai tukuna emuri na Kalou.

⁶ Ia sa yalodina o Karisito ena qaravi ni vale ni Kalou me vaka ni sa Luvena. Eda sa nona vale oi keda kevaka eda sa tudei ka yalodina tiko ki na ka eda sa vakanuinui tiko kina.

A Nodra Vakacegu na Tamata ni Kalou

⁷ O koya oqo me vaka sa kaya na Yalo Tabu: “Edaidai, kevaka o ni sa rogoca na domona,

⁸ Ni kakua ni vakaukauwataka na lomamuni, Me vaka o ni a kitaka ena nomuni a vakacudruya na Kalou, Na nomuni a vakatovolei koya ena loma ni lekutu.

⁹ ‘E kea era a veretaki au ka vakatovolei au kina o ira na nomuni qase,’ a kaya na Kalou, E dina ga ni ra a sa raica tiko na ka au cakava ena vasagavulu na yabaki.

¹⁰ O koya oqo au a cudruvi ira kina na i tabatamata o ya, ka kaya, ‘Sa dau cala tu ga na nodra vakasama, Ka ra sa sega ni muria na noqu i valavala.’

¹¹ Au a bubului kina ena noqu cudru, ka kaya: ‘Era na sega sara ni curu mai ka mai vakacegu vata kei au!’ ”

¹² Kemuni na wekaqu, ni qarauna me kakua ni dua vei kemuni e tiko vua na yalo ca ka sega ni vakabauta ka me biuta laivi kina na Kalou Bula.

¹³ Ia mo ni dau veivakayaloqaqataki tikoga vakai kemuni ena veisiga, ena gauna kece sara sa okati kina vei keda na vosa “edaidai” ena i Vola Tabu, ka me kakua kina ni dua vei kemuni e vakayalokaukauwataki ena i lawaki qaseqase ni valavala ca.

¹⁴ Eda sai tokani i Karisito kevaka eda sa taura dei tiko me yacova na i vakataotioti na yalo sa nuidei ka sa tiko vei keda ena i vakatekivu ni gauna.

¹⁵ Oqo na ka sa kaya na i Vola Tabu: “E daidai, kevaka o ni sa rogoca na domona, Ni kakua ni vakaukauwataka na yalomuni, Me vaka o ni a kitaka ena nomuni a vakacudruya na Kalou.”

¹⁶ O cei li o ira era a rogoca na domo ni Kalou, ka ra qai sega ni muria? E sega li ni sai ira kecega ka a liutaki ira tani mai Ijipita o Mosese?

¹⁷ O ira li o cei sa cudruvi ira na Kalou me vasagavulu na yabaki? E sega li ni o ira na caka cala, ka ra bale na yagodra mate ena vanua lala?

¹⁸ Se kivei cei li sa bubului kina na Kalou ni ra na sega ni curu ki na nona vakacegu? E sega li ni vakayacori oqo vei ira ga era sa talaidredre?

¹⁹ Eda sa qai raica, ni ra sa sega ni curu rawa ki na vanua, ena vuku ni tawa vakabauta.