Iperiu 13 - Vakavakadewa Vou kei na iVola tale eso

Na Sala me Da Vinaka Kina Vua na Kalou

¹ Me ia tiko ga na veilomani vakaveiwekani ena vuku i Karisito.

² Ni kakua ni guilecava mo ni dau veikidavaki ka vakacegui ira na vulagi ena nomuni vale. Eso era a kitaka vakakina ka ra sega tiko ni kila ni ra sa kidavaka ka vakacegui ira tiko eso na agilosi.

³ Ni nanumi ira era sa tiko e valeniveivesu, me vaka ga o ni sa tiko vakavesu kei ira. Ni nanumi ira sa vakararawataki, me vaka ga o ni sa vakararawataki tiko vakakina.

⁴ Sa dodonu me ra doka na tamata kecega na vakawati, ka me rau yalodina tikoga na veiwatini ena kena maroroi na savasava ni nodrau i mocemoce. Ni na lewai ira ga na dau kitaka na i tovo vakasisila ni yago kei ira na dauveibutakoci na Kalou.

⁵ Ni sereki kemuni mo ni galala mai na kena domoni na i lavo, ka mo ni yalovakacegu ga ena vuku ni veika o ni sa rawata, ni sa rauti kemuni vinaka. Ni sa kaya vakaoqo na Kalou, “Au na sega ni biuti iko, se cakitaki iko.”

⁶ O koya oqo me da sa kaya kina ena yalo doudou, “Sa noqu dauniveivukei na Turaga, Ka'u na sega kina ni rere. A cava na ka ena kitaka vei au na tamata?”

⁷ Ni nanumi ira na nomuni dauveiliutaki, o ira era a tukuna vei kemuni na vosa ni Kalou. Ni vakasamataka lesu na i tovo ni bula era a bulataka me yacova na nodra mate, ka vakadamurimuria na nodra vakabauta.

⁸ Sa i koyakoya tiko o Jisu Karisito ena siga sa oti, kei na siga edaidai ka tawamudu.

⁹ Ni kakua ni vakatara me ra vagolei kemuni tani mai na sala dodonu na veimataqali i vakavuvuli tani e vuqa. Ni sa ka vinaka me vakaukauwataki na yaloda mai na loloma-savu ni Kalou, ka segai ena vuku ni noda muria tiko na veivakaro me baleta na kakana; ni sa sega na kena yaga oqo vei ira era sa muria tiko.

¹⁰ O ira na bete era sa veiqaravi ena nodra vale ni sokalou na Jiu sa sega vei ira e dua na dodonu me ra kania na i soro sa vakacabori ena noda i cabocabonisoro.

¹¹ Sa dau kauta mai na nodra Bete Levu na Jiu na dra ni manumanu ki na Tikina Tabu Sara me i soro ni valavala ca; ia na yago ni manumanu sa vakamai ga ena taudaku ni nodra i tikotiko.

¹² Oqo na vuna sa mate talega vakakina o Jisu ena taudaku ni matamata-ni-koro, ka me vakasavasavataki ira kina na tamata mai na nodra i valavala ca ena nona dra.

¹³ O koya oqo, me da qai ia ka lako yani vua ki na taudaku ni i tikotiko ka wasea vata kaya na veika rarawa sa vosota oti.

¹⁴ Ni sa sega ni dua na koro tudei ena vuravura oqo me noda, ia eda sa vakasaqara ga na koro ena muri mai.

¹⁵ O koya oqo me da cabora tikoga kina vua na Kalou na noda i madrali ni vakavinavinaka ena vuku i Jisu, na i madrali sa cabori mai na tebe ni gusu sa vakatusa tiko na yaca ni Turaga.

¹⁶ Ni kua ni guilecava mo ni dau caka vinaka ka dau veivukei, baleta ni sai ira oqo na i madrali sa vakalomavinakataka na Kalou.

¹⁷ Ni talairawarawa vei ira na nomuni i liuliu ka vakayalomalumalumu vei ira. Era sa yadrava tiko na yalomuni ka sega ni cegu, ka ni ra na tarogi kina emuri mai vua na Kalou. Kevaka o ni muria na nodra vosa, era na vakayacora na nodra i tavi ena yalo marau; kevaka e sega, era na vakayacora ga ena yalo rarawa, ka sa sega ni yaga oqo vei kemuni.

¹⁸ Ni masulaki keitou tikoga. Keitou sa vakadinata ni sa vinaka sara na neitou lewa-e-loma, baleta ni keitou sa via vakayacora na ka dodonu ena veigauna kecega.

¹⁹ Au sa vakauqeti kemuni vagumatua sara mo ni masulaki au, me rawa ni'u vakasukai tale kina vakatotolo kivei kemuni.

Na Masu ni Veivakalougatataki

²⁰ Ia na Kalou dauveivakacegui, o koya sa vakatura cake tale mai na mate na noda Turaga o Jisu, ka nodra i Vakatawa Cecere na sipi ena vuku nona dra sa dregati kina na veiyalayalati tawamudu —

²¹ me qai vakaiyaragitaki kemuni sara o koya ena veika vinaka kecega mo ni vakayacora rawa kina na lomana, ka me qai cakacakataka o koya e vu-ni-lomada na veika sa vinaka vua, ena vuku i Jisu Karisito, o koya me ia vua na vakarokoroko ka sega ni mudu. Emeni.

Ai Tinitini

²² Au sa vakamamasu kina vakaoqo, kemuni na wekaqu, mo ni rogoca vakavinaka sara na vosa ni veivakauqeti oqo; ni sa sega soti sara ni balavu na i vola ka'u sa vola yani vei kemuni.

²³ Au vinakata mo ni kila ni sa sereki mai valeniveivesu na wekada o Timoci. Kevaka ena lako totolo mai, keirau na lako vata yani vei kemuni.

²⁴ Ni qai vakadewataka na neitou i loloma vei ira kece na nomuni i liuliu kei ira kece na tamata ni Kalou. Era sa loloma tale tu ga yani vei kemuni na wekamuni mai Itali.

²⁵ Me tiko vei kemuni kecega na loloma ni Kalou.