Filipai 1 - Vakavakadewa Vou kei na iVola tale eso

¹ Oqo na nodrau i vola o Paula kei Timoci na bobula i Jisu Karisito — Ki vei ira kece mai Filipai era sa nona na Kalou ka ra sa tu vata kei Karisito Jisu, kei ira na qase ni lotu kei ira na tuirara.

² Me sobuti kemuni mada ga na loloma kei na vakacegu ni Kalou o Tamada kei na Turaga o Jisu Karisito.

Na Masu i Paula Baleti Ira Mai Filipai

³ Au sa vakavinavinaka tikoga vua na Kalou ena veigauna kece au vakananumi kemuni kina.

⁴ Ena veigauna kece au masulaki kemuni kina, au dau masulaki kemuni kece ena marau,

⁵ ena vuku ni nomuni a vukei au ena cakacaka ni tukutuku vinaka mai na kena i vakatekivu me yacova mai oqo.

⁶ Au sa vakadinata ni o koya na Kalou ka a tekivutaka na cakacaka vinaka oqo e lomamuni, ena kitaka tikoga me yacova sara ni sa oti, ena Siga sa na lesu tale mai kina o Jisu Karisito.

⁷ Au sa dau nanumi kemuni vakalevu! O koya oqo sa dodonu kina me vakaoqo na i vakarau ni yaloqu vei kemuni. Ni o ni sa vakaivotavota vata kei au ena loloma-savu ni Kalou ena noqu tiko e valeniveivesu kei na gauna talega au bula galala tu kina, ka me'u taqomaka ka vakadeitaka na kosipeli.

⁸ Sa noqu i vakadinadina na Kalou me baleta na dina ni noqu i tukutuku, ni'u sa kaya vakaoqo ni kena titobu na noqu kauwaitaki kemuni sa vu ga mai vei Karisito Jisu.

⁹ Au sa masulaka me na tubu cake tikoga na nomuni loloma ka me maucokona vinaka kina na nomuni kila-ka kei na nomuni rai,

¹⁰ me rawa kina vei kemuni mo ni dau digitaka na veika e uasivi sara. O ni na qai galala kina mai na veika dukadukali kecega ka na sega ni beitaki ena Siga sa lako mai kina na Karisito.

¹¹ Ena vakasinaiti talega kina na nomuni bula ena veika vinaka sa cakava rawa duadua ga o Jisu Karisito, ka me vakalagilagi ka vakacaucautaki kina na Kalou.

Na Vesu i Paula sa Toso Kina na Kosipeli

¹² Au gadreva mo ni kila na wekaqu ni veika e yaco vei au era sa vukea vakalevu sara na kena vakatetei na kosipeli.

¹³ A sa yaco kina me ra kila kece na yadra e valenitui kei ira kece eke ni'u a biu ki na valeniveivesu baleta ni'u sa nona dauveiqaravi o Karisito.

¹⁴ Na noqu tiko ena valeniveivesu sa qai kaukauwa vakalevu cake ga kina na nodra yalo dina na veiwekani vua na Turaga, ka sa tubu cake vaka talega kina na nodra yalo doudou me ra vunautaka na i tukutuku vinaka ka sega ni rere.

¹⁵ E dina ga ni so vei ira sa vunautaki Karisito baleta ni ra sa dauvuvu ka dauveileti, ia eso tale era sa vunau ena yalodra dina.

¹⁶ Sa yavutaki ena loloma na nodra vunau o ira oqo, ni ra sa kila ni a solia vei au na Kalou na i tavi me'u tutaka ka taqomaka na kosipeli.

¹⁷ Eso era sa sega ni vunautaki Karisito ena yalodra dina, ia ena yalo ga ni nanumi koya vakai koya. Era sa nanuma me ra vakalevutaka na noqu leqa ena gauna au tiko kina e valeniveivesu.

¹⁸ Ia sa sega na betena o ya! Au sa marau ga ni sa vunautaki kina na Karisito, veitalia ga se caka ena yalodina se ena yalo e veivakaisini. Ia, au na marau tikoga

¹⁹ ni'u sa kila ni sa rawa me'u sereki ena vuku ni nomuni masu kei na veivuke ni Yalo i Jisu Karisito.

²⁰ Na noqu gagadre kei na vakanuinui levu sai koya me'u kakua ni malumalumu vakadua ena vuku ni kena qaravi na noqu i tavi, ia me'u yaloqaqa ga ena veigauna kece, ka vakauasivi ena gauna oqo, me rawa kina ni vakacerecerei ga na Karisito ena yagoqu, se'u sa bula tiko se mate.

²¹ Vei au, sai Karisito ka'u sa bula tiko kina, ia ke'u sa mate, sa na qai vinaka cake sara vakalevu vei au.

²² Ia kevaka au bula tikoga, au na cakava tale kina e vuqa na ka vinaka, au sa na sega ni kila na ka me'u digitaka.

²³ Au sa dreti mai na rua na yasana. Au sa gadreva vakalevu sara me'u biuta na bula oqo ka la'ki tiko vata kei Karisito, ni sa uasivi cake sara o ya;

²⁴ ia ena vukumuni ga sa yaga vakalevu cake kina me'u se tei bula tiko mada ga.

²⁵ Au sa vakadinata ni na vakakina, ka'u sa kila kina ni'u na tiko ga vata kei kemuni ka vukei kemuni mo ni tubu cake tikoga ka reki ena vakabauta,

²⁶ ka me levu cake kina na nomuni cibitaka ena vukuqu na nomuni bula ni veiwekani kei Karisito Jisu ena gauna eda sa tiko vata tale kina.

²⁷ O koya oqo sa ka bibi kina me veidonui na nomuni i tovo ni bula vata kei na veika sa gadrevi ena kosipeli i Karisito, ka me na rawa kina vei au, ke'u mani lako yani se sega, me'u rogoca ni o ni sa tudei tikoga ena i naki e duabau kei na gagadre e duabau ka vala vata tiko ena vuku ni vakabauta ni kosipeli.

²⁸ Ni kakua ni rerevaki ira na nomuni meca; ni tamata yaloqaqa ga, ni oqo ena vakadinadinataka vei ira ni ra na druka o ira ka ni o ni na qaqa oi kemuni, baleta ni sai koya na Kalou ka sa solia vei kemuni na qaqa.

²⁹ Ni sa soli vei kemuni na i tutu dokai ena vuku i Karisito mo ni sega walega kina ni vakabauti koya, ia mo ni vosota talega na veika rarawa ena vukuna.

³⁰ Sa qai rawa kina oqo mo ni vakaitavi vata kei au ena i valu. Sa i koya ga oqo na i valu vata ga o ni a raica ni'u sa vala tiko kina mailiu, ka'u se ia tikoga oqo edaidai, me vaka na veika o ni sa rogoca.