Filimoni 1 - Vakavakadewa Vou kei na iVola tale eso

¹ Mai vei Paula, na kaivesu ena vuku i Karisito Jisu, vata kei Timoci na wekada. Kivei Filimoni na weka i keirau, ka neirau i tokani ena cakacaka,

² kei na i soqosoqo lotu sa dau soqoni tiko ena nomu vale, vata kei rau talega o Afia na ganeda kei Akipa na noda i tokani ena i valu oqo.

³ Me nomuni na vakacegu mai vua na Kalou o Tamada kei na Turaga o Jisu Karisito.

Na Loloma kei na Vakabauta nei Filimoni

⁴ Au sa dau vakavinavinaka tikoga vua na Kalou ena gauna au dau cavuti iko kina ena noqu masu

⁵ ni'u sa mai rogoca tiko na nomu lomani ira kecega na tamata ni Kalou kei na nomu vakabauta na Turaga o Jisu.

⁶ Au sa masulaka ni na vakatitobutaki na noda kila na veika vinaka eda sa taukena ena noda tu vata kei Karisito mai na noda veitokani ena vakabauta.

⁷ Ni sa ka levu na noqu reki kei na vakacegu ena vuku ni nomu loloma, na wekaqu, ka ni sa vakabulabulataki na lomadra na tamata ni Kalou ena vukumu.

Na Vakamamasu me Baleti Onisimo

⁸ Me vaka ni'u sa wekamu ena vuku i Karisito, sa rawa me'u doudou kina me'u vakarota vei iko na ka e dodonu mo vakayacora.

⁹ Ia ena vuku ga ni noqu lomani iko, e vinaka cake kina vei au me'u vakamamasu ga vei iko, oi au o Paula na i talai i Karisito Jisu, ka'u sa vesu tu edaidai ena vukuna.

¹⁰ Au sa vakamasuti iko kina ena vuku i Onisimo, o koya na luvequ ena vuku i Karisito; ni'u sa yaco oi au me'u tamana vakayalo ena gauna ka'u sa vesu voli kina oqo.

¹¹ E a tamata tawayaga vei iko eliu o koya, ia sa qai tamata yaga sara vei iko oqo, ka vakakina vei au.

¹² Au sa talai koya lesu tale yani oqo vei iko, ka sa salavata yani kei koya na yaloqu.

¹³ Au a via tauri koya me keirau sa tiko ga me kemu i sosomi, me qaravi au tikoga ena noqu tu vakavesu tu oqo ena vuku ni tukutuku vinaka.

¹⁴ Ia, au sa sega ni via vakasaurarataki iko mo vukei au; ni ka'u sa vinakata mo vakayacora ga o iko ena yalo e galala. O koya oqo au sa sega kina ni cakava e dua na ka kevaka o se sega mada ni vakadonuya.

¹⁵ De sai koya beka oqo na vuna e biuti iko kina vakalekaleka o Onisimo, o ya me na qai tiko vata tale kei iko ena vo ni nona gauna kece ni bula sa vo.

¹⁶ Ni sa sega ni tamata bobula walega o koya, ia sa uasivi cake mai na bobula baleta ni sa tacida ena vuku i Karisito. Sa bibi dina vei au o koya! Ia ena yaga vakalevu cake sara vei iko o koya, ni sa nomu bobula ka tacimu ena vuku ni Turaga.

¹⁷ Ia kevaka o sa okati au dina me'u nomu i tokani, mo qai ciqomi koya sara me vaka na nomu ciqomi au.

¹⁸ Ia ke a cakava e dua na ka ca vei iko, se a dinautaka e dua na ka, mo qai vola vei au.

¹⁹ Oi au o Paula, au sa vola vei iko na ka oqo ena ligaqu dina, au na sauma lesu vei iko. Ia e sega beka ni yaga me'u tukuna tale vei iko ni o dinautaka tu na nomu bula vakayalo vei au.

²⁰ O koya oqo, na wekaqu, mo yalovinaka ka vakayacora mada na noqu kerekere oqo ena vuku ni Turaga; me vaka ni o sa taciqu vakayalo ena vuku i Karisito — vakamarautaki au mada!

²¹ Au sa nuidei kina, ena noqu sa volavola tiko yani oqo, ni o na vakayacora na noqu kerekere malumalumu — ka'u sa kila talega ni na uasivi cake sara na ka o na kitaka.

²² Mo qai vakarautaka tale tikoga e dua na rumu me'u na tiko kina, baleta ni'u sa nuitaka ni'u na vakasukai tale yani vei kemuni ena vuku ni nomuni masu.

Tini ena Loloma

²³ Sa loloma tu yani vei iko o Epafiro, o koya keirau vesu vata tu ena vuku i Karisito Jisu,

²⁴ kei iratou na noqu i tokani ena cakacaka o Marika, Arisitako, Timasa, kei Luke.

²⁵ Me tikoga kei kemuni kece na loloma-savu ni Turaga o Jisu Karisito.