Esiteri 9 - Vakavakadewa Vou kei na iVola tale eso

Vakarusai na Kedra Meca na Jiu

¹ Ia ena i katini katolu ni siga ni katini karua ni vula, o ya na vula o Ata, ni a vakarau tu me vakayacori na i vakaro kei na lawa vakaturi ni tui, io, na siga dina sara ga o ya era a nuitaka tu kina na kedra meca na Jiu ni sa na nodra kina na qaqa, a qai veisau na vakanuinui o ya me ra qaqa na Jiu vei ira na kedra meca.

² Ena siga o ya era a soqoni vata kina na Jiu ena veikoro lelevu ena veiyasana era dui tu kina ena matanitu levu o Perisia me ra valuti ira kina na tamata era via vakacacani ira tiko. Ia, a sega sara ga ni dua, ni a qai saqati ira rawa ni ra a sinai ena rere na tamata kecega.

³ O ira na turaga mai na veiyasana, na vakailesilesi kei na kovana ka vaka sara talega kina na vakailesilesi ena valenitui, era a vukei ira tale na Jiu ni ra a rerevaki Motekai.

⁴ Ena vuku ni sa dua na ka levu o koya ena valenitui. A toro cake tale tikoga na nona kaukauwa ka teteva yani na veiyasana kecega ena matanitu o Perisia na kena i rogorogo.

⁵ Era a mani valuti ira ka vakarusai ira na kedra meca o ira na Jiu, ka cakava vei ira na ka ga era vinakata.

⁶ Ena koro turaga mada ga o Susa, era a vakamatea kina na Jiu e lewe lima na drau na tagane;

⁷ ka ratou mani moku mate kina o Parasanidata, o Talifone, o Asepaca,

⁸ o Paraca, o Atelia, o Aritara,

⁹ o Pamasita, o Arisai, o Aritai kei Vaisaca,

¹⁰ o iratou na lewe tini na cauravou na luve i Amani, o koya na kedra meca levu na Jiu ka luve i Emitaca. Ia era a sega sara ni bau taura e dua na i yau o ira na Jiu.

¹¹ Ena siga tikoga o ya sa la'ki tukuni sara vua na tui na kedra i wiliwili era moku mate ena koro turaga o Susa.

¹² A qai tukutuku na tui vua na Ranadi, ka vaka: “Ena koro turaga ga o Susa era a vakamatea kina na Jiu e lewe 500 na tagane kei na lewe tini na luve i Amani tagane. Sa na qai wacava li na levu ni veika era cakava ena vo ni veiyasana ena noqu matanitu. Kevaka e dua tale na ka o vinakata ena soli ga vei iko. Tukuna ga mai ka'u na vakayacora.”

¹³ A qai kaya o Esiteri vua na tui, “Kevaka o ni lomadonu kina na tui, ia me ra vakatarai tale mada na Jiu ena koro o Susa me ra kitaka tale ena siga ni mataka na veika era vakayacora edaidai. Me vakaliligi talega ena kau ni veikuna na yagodratou e lewe tini na luve i Amani.”

¹⁴ A mani vakadonuya na tui na ka ruarua o ya, ka a tabaki ka kacivaki sara vakalawa mai Susa. A qai vakaliligi talega na yagodratou na luve i Amani tagane tini me ra raica na tamata.

¹⁵ Ena mataka cake, o ya na i katinikava ni siga ni vula o Ata, era a soqoni vata o ira na Jiu ena koro levu o Susa ka ra vakamatea kina e lewe 300 na tamata. Era a sega sara ni taura e dua na i yau.

¹⁶ Ia o ira na Jiu mai na veiyasana ena matanitu o Perisia, e ra a sosoqoni vata me ra taqomaka na nodra bula. Era a vakabulai ira rawa mai vei ira na kedra meca ena nodra vakamatea e lewe 75,000 vei ira era a cati ira era a sega ni taura e dua na i yau.

¹⁷ A yaco na ravuravu levu oqo ena i katini katolu ni siga ni vula o Ata. Ia ena i ka tini ka va ni siga era a cegu kina na vala. Era a caka magiti ka solevu kina.

¹⁸ Ia o ira na Jiu ena koro levu o Susa era a soqoni vata ka vala kei ira na kedra meca ena i 13 kei na i 14 ni siga, ka ra vakacegu ena i katini kalima ni siga me ra ia kina na kana magiti kei na solevu.

¹⁹ O ya na vuna era a ia kina na Jiu era tu ena veikoro lalai na marau kei na kana magiti ka ra vakacegu mai na cakacaka ena soli loloma.

Na Solevu ni Purimi

²⁰ A qai vola o Motekai e dua na i tukutuku ni veika a yaco oqo. A vola talega e dua na i vola veikauyaki vei ira na Jiu mai na veiyasana - o ira na yasana era tu voleka kei ira era tu yawa, ena matanitu o Perisia.

²¹ Ena i vola o ya a vakaroti ira kina na Jiu o Motekai me ra dau marautaka vakayabaki ena veigauna mai muri na i 14 kei na i 15 ni siga ni vula o Eta,

²² ka ni siga e rua oqori era a rawata kina na Jiu na nodra galala mai vei ira na kedra meca, kei na vula a vukici kina na nodra rarawa ki na marau kei na nodra tagi ki na siga ni vakacegu. Ena siga e rua o ya, me ra dau ia kina na kana magiti kei na mamarau ka me ra dau veisoli loloma kina ka vakakina vei ira na dravudravua.

²³ Era a mani muria na i vakaro nei Motekai na Jiu, ka a yaco na solevu o ya me dau vakayacori ena veiyabaki.

²⁴ Oqo me vakananumi kina na bukivere i Amani na luve i Emitaca, na kawa i Akaki, na kedra meca levu na Jiu, ena nona a cakava na Puri o ya me wirimadigitaka na tiki ni siga me vakarusai ira kina vakadua na Jiu,

²⁵ ka me vakananumi talega kina na gauna sa kauta cake kina o Esiteri vua na tui na ka o ya kei na nona a qai vakarota ena dua na i vakaro vakalawa na tui me vakayacori vei Amani na ka sa nakita vei ira na Jiu ka ratou a mani vakaliligi kina ena kau ni veikuna o koya kei iratou na luvena.

²⁶ O koya era a vakatoka kina na siga e rua o ya me yacana na Purimi me i vakananumi ni Puri se na vakawiri madigi. Ena vuku oqo ni veika sa volai ena i vola i Motekai, na veika era a raica ka sota kaya,

²⁷ era a lomavata kece kina na Jiu, o ira na nodra kawa kei ira kecega era vuki me ra wili vaka-Jiu, ni ra na sega sara ni vakalutuma ena dua na yabaki na nodra vakananuma na Purimi ena kena i valavala me vaka a volai oti tu.

²⁸ Na siga e rua oqo ni Purimi me dau vakananumi kina ena veivuvale vaka-Jiu yadua ena veikoro kei na veiyasana, ena veitabatamata kecega; ka me ra kakua sara ni la'ki muduka ena dua na gauna o ira se o ira na nodra kawa mai muri.

²⁹ A qai vola tale e dua na i vola o Esiteri na Ranadi, na luve i Apikali me vakadeitaka kina na veika a vola tu o Motekai e nona i karua ni vola, me baleta na Purimi.

³⁰ Era a veikauyaki na i lavelave ni vola o ya vei ira kecega na Jiu ena 127 na yasana ena matanitu o Perisia. Era vakauti vata kei na vosa ni vakanuinui ni tiko sautu kei na vakacegu,

³¹ ni ra sa na dau vakananuma na veisiga ni Purimi ena kena i loku me vaka e rau a lavaka vei ira na Jiu o Motekai kei Esiteri na Ranadi, me vaka ga na i valavala ni nodra lolo kei na vakaloloku e ra a vakotora oti tu me baleti ira kei ira na nodra kawa mai muri.

³² Na i vakaro oqo i Esiteri, a vakadeitaka na i vakarau ka dau caka ena solevu ni Purimi, ka volai talega me maroroi vakaivola.