Esiteri 8 - Vakavakadewa Vou kei na iVola tale eso

Sa Vakabulai Ira na Jiu o Esiteri

¹ Ena siga tikoga o ya, a solia kina vei Esiteri o Asuerosi na tui na veika kece i Amani, na kedra meca levu na Jiu. E a vakaraitaka oti vua na tui o Esiteri ni rau veiwekani kei Motekai. Oqo na vuna a mani vakatura kina na tui me lako yani vua o Motekai.

² A luvata na nona mama na tui, na mama ka i vakatakilakila ni lewa vakatui, ka a vakasuka lesu oti mai vei Amani ka solia vei Motekai. A qai vakatikori Motekai o Esiteri me qarava na i yau ni vuvale i Amani.

³ Oti o ya, a qai la'ki vosa tale o Esiteri vua na tui. A cuva sobu ki na yava ni tui o koya ka vakamamasu vua ena tagi me kakua ni vakayacori na i naki ca nei Amani, na kawa i Akaki, me baleti ira na Jiu.

⁴ A qai dodoka yani vei Esiteri na tui na nona i titoko koula.

⁵ A qai tucake o Esiteri ka mani kaya vua, “Kevaka sa lomamuni vakakina na tui, ia ke'u lomani ka taleitaki mai vei kemuni, ka sa rairai dodonu vei kemuni na ka oqo, ia me bau volai mada e dua na i vakaro vakatui me bokoci kina na i vola kecega a vola o Amani na luve i Emitaca ka kawa i Akaki ka tukuna kina me keimami vakarusai taucoko vakadua na Jiu keimami tu voli oqo ena nomuni matanitu.

⁶ A dredre dina vei au me'u na rai tiko ka ra vakamatei na noqu kawa tamata kei iratou na noqu vuvale.”

⁷ A qai kaya na tui vei rau o Esiteri na Ranadi kei Motekai na Jiu: ‘O drau sa raica ni'u a sa solia oti vei Esiteri na veika kece i Amani ka ra a sa kunati koya oti talega ena vuku ni nona a via vakarusai kemuni na Jiu.

⁸ Oi kemudrau ga mo drau vola vei ira na Jiu na ka sara ga o drau vinakata, ia na nomudrau i vola me volai ena vukuna na tui ka sitabataki ena mama vakatui, oqo e baleta ni sa tabu dredre sara me bokoci e dua na i vakaro sa volai ena vukuna na tui ka sitabataki ena nona mama.’

⁹ A yaco na veika oqo ena i ka 23 ni siga ni vula o Sivani, o ya na i katolu ni vula. E ratou a kacivi kina na vunivola ni tui me ratou vola e dua na i vakaro me tukuni kina na veika a vakarota o Motekai me vakau vei ira na Jiu, kei ira na vakailesilesi, o ira na kovana kei ira na turaga ena 127 na yasana vakatekivu mai Idia ka kauta yani ki Iciopia. E a volai na i vola ki na veivanua ena nodra dui vosa, ka vakakina vei ira na Jiu ena nodra vosa.

¹⁰ A bulia na vosa ni vakaro o Motekai ena vuku i Asuerosi na tui, ka sitabataka ena mama vakatui. Era a qai veikauyaka na i vakaro na daukau i vola ka ra a vodoka na ose totolo ni vakau i tukutuku ni tui era a susugi ga ena bai ni ose vakatui.

¹¹ Ena i vakaro o ya a vakatara me ra taqomaka na nodra bula ka me ra vakarusa ka vaqeyavutaki na mataivalu ni matatamata se ni yasana cava ga e mai valuti ira. Me ra vakamatei ira talega na luvedra na kedra meca kei na watidra ka taura na nodra i yau me nodra.

¹² Me caka na ka o ya ena duabulu ga na siga - na i katini katolu ni siga ni katini karua ni vula, se na vula o Ata - na tiki ni siga a lokuci tu me ra moku kina na Jiu ena veiyasana ena matanitu o Perisia.

¹³ Na i vakaro o ya me qai la'ki kacivaki ni sa lawa ki na veiyasana ena matanitu i Asuerosi me ra kila na tamata kecega, ka me ra qai tu vakarau ena siga o ya na Jiu me ra taqomaki ira ka valuti ira lesu talega na kedra meca.

¹⁴ Era a qai dui cici yani vakusakusa na daukau i vola; ena vuku ni lawa ni tui. E a kacivaki talega na i vakaro o ya ki na koro turaga o Susa.

¹⁵ Ni lesu mai vua na tui o Motekai, a daramaka tu mai e dua na kote balavu vakatui, karakarawa ka vulavula na rokana, kei na dua na i tiniyara roka lokaloka ka tali ena lineni matailalai. A ka levu sara na marau kei na kaikaila vei ira ena koro levu o Susa.

¹⁶ Era a reki ka marau na Jiu ka ra dokai vakalevu.

¹⁷ Era a mamarau na Jiu ena veiyasana kei na veikoro lelevu kecega ni a la'ki kacivaki kina na i vakaro o ya, ka ra a vakacegu mai na nodra cakacaka ka ia na kena kana magiti. Ia me vaka ni a rui levu na nodra rerevaki ira na Jiu na lewe ni vanua, a mani lewe levu vei ira era tavuki me ra sa wili vaka-Jiu.