Esiteri 7 - Vakavakadewa Vou kei na iVola tale eso

Vakamatei o Amani

¹ E rau a qai lako na tui kei Amani me rau la'ki kana.

² Ena i karua ni veisureti i Esiteri, ni ratou gunu waini tiko, a qai tarogi Esiteri tale na tui, ka kaya, “I Esiteri na noqu Ranadi, a cava beka o via kerea? Na ka oqori ena vakadonui vei iko. Se dua tiko beka na ka o vinakata? Kevaka o mani vinakata sara mada ga na veimama ni noqu matanitu, ena vakayacori dina ga.”

³ A qai sauma vua o Esiteri, ka kaya, “Oi kemuni na tui, au kerea mo ni yalo vinaka ka bau vakabulai au kei ira na neimami, na Jiu.

⁴ Keimami sa soli oti me keimami vakamatei, ka vaqeyavutaki vakadua. Kevaka me keimami la'ki vakabobulataki wale ga - na tagane kei na yalewa - ke'u a sega ni mai kerekere ka ni na sega ni la'ki vakaleqa na nomuni veiliutaki na tui na neimami vakabobulataki.”

⁵ A qai tarogi Esiteri o Asuerosi na tui, ka kaya, “O cei na tamata e doudou me kitaka na ka oqo? E tiko e vei o koya?”

⁶ A sauma o Esiteri, ka kaya, “O Amani sara ga ka toka oqo na keimami meca ka dauveretaki keimami!” A qai dua na rere levu a bikai Amani.

⁷ A tucake vakasauri na tui ena levu ni nona cudru ka curu yani ki na loga ni senikau e tautuba. Ia a raica rawa o Amani ni sa nakita na tui me na totogitaki koya ena vuku ni ka o ya ka mani tiko ga kina e vale me vakamasuta na Ranadi me vakabulai.

⁸ Ni curu lesu tale mai na tui ki na rumu e ratou gunu waini tiko kina, a donuya sara ga ni davoca yani o Amani na i dabedabe i mocemoce a davo vakanatutu koto kina o Esiteri. A vosa sara na tui ka kaya, “Sabu! Sabu! Me'u rai sara tu ga vakaoqo e noqu loma ni vale o qai via vesuka na Ranadi, o iko na tamata oqo?” Ni cavuka ga na vosa ni tui a lako vata kei na nodratou ubia na mata i Amani na enuki ni tui.

⁹ A qai kaya o Aripona, e dua vei iratou na i talai, ‘Na duru ni veikuna e ruasagavulu karua na mita na kena cecere a vakaduria o Amani me kuna kina o Motekai - na tamata sa vakabula na tui - sa duri rawa tu mai na mata ni nona vale.’ A qai kaya na tui, ‘Dou la'ki vakaliligi koya kina!’

¹⁰ Era a qai la'ki vakaliligi Amani ena duru ni veikuna sara ga a vakarautaka o koya me vakaliligi Motekai kina. A qai malumu na cudru ni tui.