Esiteri 5 - Vakavakadewa Vou kei na iVola tale eso

Kerekere ni Veisureti i Esiteri Vua na Tui

¹ Ena i katolu ni siga ni lolo, a qai tokara na nona kote balavu vakaranadi o Esiteri ka la'ki duri tu ena buturara lailai e loma ni valenitui, ka vakanamata tu yani ki na rumu ka tiko kina na i dabedabe vakatui. E a tiko mai loma na tui ena i dabedabe vakatui ka vakanamata tiko mai ki mata ni katuba.

² Ni raici Esiteri o koya ni duri tu ena buturara lailai, a lomani koya ka dodoka sara vua na i titoko koula a taura tiko. A qai lako yani vua o Esiteri ka tara na ulu ni titoko koula.

³ A qai tarogi koya na tui, ka vaka, “I Esiteri na noqu Ranadi, na i rogo cava o sa kauta tiko mai? E dua beka na ka o via kerea? Kevaka o vinakata e dua na veimama ni noqu matanitu ena soli dina ga vei iko!”

⁴ A qai kaya o Esiteri, ‘Kevaka o ni vakadonuya na tui, ia mo drau qai lako vata yani kei Amani ki na dua na kana magiti au vakarautaka tiko edaidai me baleti kemuni na tui.’

⁵ A qai kaya na tui vei iratou na nona dauveiqaravi, ‘Me la'ki kau vakatotolo sara mai o Amani me keirau mai lako ki na nona veisureti na Ranadi.’ E rau a qai lako yani na tui kei Amani ki na kana sa vakarautaka tiko o Esiteri.

⁶ Ia ni ratou gunu waini tiko, a qai tarogi Esiteri tale na tui, ka kaya, ‘Na cava beka o sa via kerea? Na ka oqori ena vakadonui vei iko. E dua tiko beka na ka o vinakata? Kevaka o mani vinakata sara mada ga e dua na veimama ni noqu matanitu, ena vakayacori ga vakakina.’

⁷ A qai kaya o Esiteri,

⁸ “Kevaka o ni sa lomani au na tui, ka lomamuni talega mo ni vakadonuya na noqu kerekere kei na ka au vinakata, ia mo drau qai lako tale mai kei Amani ki na dua na kakana au na vakarautaka tale vei kemudrau ni mataka, ka'u sa na qai mai sauma kina na nomuni taro.”

Nakita o Amani me Vakamatei o Motekai

⁹ Ena siga o ya a lesu yani o Amani ena marau levu kei na reki. Ni raici Motekai o koya ena matamata ni vale levu ni sega ni bau tucake se vakarokoroko vua, a duatani dina na nona cudruvi koya.

¹⁰ Ia a vosota ga o Amani na nona cudru ka lako yani ki na nona vale. A qai la'ki kacivi ira vata kina na nona veikilai ka vaka kina o Seresi na watina.

¹¹ A dokadokataka o koya vei ira na nona vulagi na levu ni nona i yau, na levu ni luvena tagane, na kena tosoi cake na nona i tutu mai vua na tui, kei na nona sa rui tamata bibi ka dokai duadua mai vei ira na nona vakailesilesi kecega na tui.

¹² A qai kuria na nona vosa, ka kaya, “O Esiteri talega na ranadi, sa sega ni kaya me lako vata kei na tui e duatani tale me kana ena magiti sa vakarautaka o koya, oi au duadua ga. Sa sureti au oti tale tu ga o koya me keirau lako vata yani kei na tui ni mataka.

¹³ Ia, na veika kece oqo e sega ni dua na kena vinaka vei au ke'u raica ni tiko ga ena matamata ni valenitui o Motekai na Jiu.”

¹⁴ Era a qai vakacuru vosa vua na watina kei ira na nodrau vulagi, ka ra kaya, ‘Na ka me caka, o ya me vakaliligi ena dua na kau me ruasagavulu karua na mita na kena balavu; ia ena mataka mo qai la'ki kerea vua na tui me vakaliligi kina o Motekai. Ni oti oqori, mo drau na qai lako ki na veisureti kei na tui, ena marau.’ A marautaka vakalevu o Amani na i vakasala oqori ka vakarota sara me la'ki vakarautaki rawa tu e dua na kau ni veivakaliligi.