Esiteri 4 - Vakavakadewa Vou kei na iVola tale eso

Kerea na Veivuke i Esiteri o Motekai

¹ Ni rogoca o Motekai ni sa nakiti tiko me ra vakamatei taucoko vakadua na Jiu, a qai dresulaka na nona i sulu ka vakaisulu ena i sulu taga ka kaburaka na dravusa ki na uluna. A qai lako yani ki na loma ni koro ka la'ki tagi qoqolou voli kina ena rarawa.

² A qai lako yani ka la'ki tu voleka ena matamata levu ni valenitui baleta ni sa tabu dredre vua e dua e vakaisulu taga tu me curu ki lomanibai.

³ Ia ena veiyasana kecega a vakauti yani kina na lewa ni tui, a yaco kina e dua na vakaloloku levu vei ira na Jiu., Era a lolo ka tagi lagalaga ka lewe vuqa vei ira era vakaisulu taga ka davo tu ena dravusa.

⁴ Ena gauna e ratou tukutuku kina vei Esiteri o iratou na nona vada kei na enuki me baleta na veika sa cakava tiko o Motekai, a sa bikai koya vakalevu na rarawa. A qai vakauta vei Motekai eso na i sulu me daramaka ka me luvata tani na i sulu taga; ia sa bese ga ni taura na i sulu o koya.

⁵ A sa qai kacivi Etaki, e dua vei ira na enuki ni valenitui sa lesia na tui me nona dauveiqaravi, ka tukuna vua me lako mada vei Motekai ka vakataroga mai se na cava sa yaco tiko kei na vuna.

⁶ A lako sara yani o Ataki ki na matamata levu ni valenitui, ki na vanua a tiko mai kina o Motekai.

⁷ A sa tukuna mai vei Ataki o Motekai na ka sa yaco tu vua vata kei na i lavo a yalataka tiko o Amani ni na solia ki na baqe vakatui me baleta na nodra sa vakarusai vakadua na Jiu.

⁸ A solia talega vua o Motekai e dua na i vola i lavelave ni tui o koya sa veikauyaki voli yani ki na koro o Susa ka lavaki kina na nodra sa na vakawabokotaki na Jiu. Ia o Ataki me qai la'ki vakaraitaka ka vakamacalataka vei Esiteri, ka me qai i tavi i Esiteri me la'ki vakamamasu ka kerekere vua na tui ena vukudra na kai nona.

⁹ A mani la'ki tukuna vei Esiteri o Ataki na ka, ka tukuna mai vua o Motekai.

¹⁰ Oti o ya, a qai talai Ataki lesu tale vei Motekai o Esiteri vata kei na i tukutuku oqo:

¹¹ ‘Era kila kece tu na tamata ni tui ka vakakina o ira mai na nona veiyasana kecega ni a duabulu ga na i totogi ena tau vua ka butuka yani na i tikotiko ni tui e loma kevaka e sega ni kacivi taumada mai me lako yani kina; o ya me vakamatei. Oqo na lewa. Ena qai vakabulai ga o koya e dodoka mai vua na tui na nona i titoko koula. Oi au mada ga, sa vula dua vakavinaka sara ga oqo ka'u sega tu ni bau kacivi me'u curu yani vua na tui.’

¹² E ratou a qai kauta vei Motekai na i talai na i tukutuku nei Esiteri.

¹³ Na kena i sau e ratou a kauta lesu mai vei Motekai a vaka oqo: “Mo kakua ni nanuma cala ni o na taqomaki vakavinaka cake mai vei keimami na vo ni Jiu ena nomu tiko oqori ena valenitui.

¹⁴ Ena gauna dredre vakaoqo, sa rawa ni yaco mai na veivuke kei na veisereki mai vua e dua tale ia, kevaka o vagagalu tiko o iko, o sa na mate dina me qai kawaboko kina na vuvale nei tamamu. O cei e kila, de dua sai naki sara ga ni nomu mai Ranadi mo yaga ena gauna vakaoqo?”

¹⁵ E ratou a qai kauta tale vei Motekai na i tukutuku oqo nei Esiteri:

¹⁶ ‘Mo lako ka la'ki soqoni ira vata na Jiu kecega o kunei ira mai Susa ka mo ni lolo ena vukuqu ka kakua ni kana se gunu me siga tolu. Au sa na lolo talega e ke kei iratou na noqu goneyalewa me vaka o ni sa na cakava mai keri. Ni oti o ya, au sa na qai lako vua na tui; ia ke'u sa na mani vakamatei ni'u sa basuka na lawa, au sa na mate ga.’

¹⁷ A qai lako o Motekai ka la'ki vakayacora sara na veika a tukuna yani vua o Esiteri.