Esiteri 3 - Vakavakadewa Vou kei na iVola tale eso

Nakita me Vakarusai ira na Jiu o Amani

¹ Ni oti na veika oqo, a qai toroya cake o Asuerosi na tui na i tutu i Amani na luve i Emitaca mai na kawa i Eaki, me nodra i liuliu na i vakailesilesi taucoko sara.

² A vakaroti ira kece na nona vakailesilesi na tui me ra cuva ka vakarokoroko vei Amani. Era a cakava vakakina, ka vakavo duadua ga o Motekai, ni a sega ni via vakarokoroko.

³ Era a qai tarogi Motekai na i vakalesilesi ni matanitu era a tiko vata ena matamata ni tui, ka kaya, “Na cava na vuna o talaidredre kina ki na i vakaro ni tui?”

⁴ A qai sauma o Motekai, ka kaya, “O au na Jiu, ka'u sega ni rawa ni vakarokoroko vei Amani.” Ia ni sega tikoga ni muria o Motekai na nodra vosa vua ena veisiga, era a qai vakatukutukutaki koya vei Amani, me ra raica kina se dina tiko li na vosa i Motekai.

⁵ A sa cudru vakalevu o Amani ni sa qai kila ni sega ni via cuva se vakarokoroko vua o Motekai.

⁶ Ia ni sa rogoca o Amani ni o Motekai e Jiu, sa qai nakita e lomana me kakua ni vakatauca wale ga vei Motekai na i totogi bibi, ia me tau talega vei ira na wekana. A sa nakita me vakamatei ira kece na Jiu ena matanitu taucoko o Perisia.

⁷ Ena i katinikarua ni yabaki ni nona veiliutaki vakatui o Asuerosi, ena i matai ni vula, o ya na vula o Nisani, a sa vakarota o Amani me ia na vakawiri madigi me macala kina na siga donu kei na vula me vakayacori kina na i naki oqo. A sa vakaturi na i katinikatolu ni siga ena i katinikarua ni vula, o ya na vula o Ata, me vakayacori kina na i naki oqo.

⁸ A qai vosa vei Asuerosi na tui o Amani, ka kaya, “E dua saka na mata tamata era a dui se ki na veivanua tani ka ra sa veituyaki ka veicurumaki tu kei keda ena matanitu oqo kei na kena veivanua qali. E dua tani sara ga na nodra i tovo mai vei keda. Era sega talega ni rokova na lawa ni nomuni matanitu na tui. Sa sega kina ni dua na betena mo ni vosota tiko kina na nodra mai tu maliwai keda.

⁹ Kevaka o ni vakadonuya na tui, ia me buli mada e dua na nomuni lawa vakatui me vakadonui kina na nodra vaqeyavutaki vakadua. Kevaka o ni vakadonuya na ka oqo, au na qai solia e 340,000 na kilokaramu na siliva ki na baqe ni lavo vakatui me yaga ena cakacaka ni nomuni matanitu.”

¹⁰ A qai luvata na nona mama na tui, na mama ka i vakatakilakila ni kaukauwa kei na lewa vakatui ka solia vei Amani na kedra meca levu na Jiu, na luve i Emitaci ka kawa i Ekaki.

¹¹ A qai kaya vei Amani na tui, “Na tamata kei na nodra i yau sa nomu; ka mo cakava ga na ka o vinakata kina.”

¹² Ena i katini katolu ni siga ni vula o Naisani na i matai ni vula, sa kacivi iratou na vunivola ni tui o Amani me la'ki volai e dua na tukutuku kacivaki me tukuni kina na veika kecega sa lewa o koya. A qai volai na i tukutuku kacivaki oqo ena nodra dui vosa sara ga na veimataqali tamata ka vakauti yani vei ira na nodra dui kovana kei ira na turaga ni veimatatamata ena matanitu levu o Perisia. A volai na i tukutuku kacivaki raraba oqo ena yaca i Asuerosi na tui ka tukidregati ena nona mama.

¹³ Era a cicivaki vola yani o ira na daukau i vola. A tukuni ena i vola me ra vakamatei kece vakadua na Jiu, ka okati kina o ira na cauravou, o ira na qase, o ira na yalewa, kei na gone ena matanitu o Perisia ena i katinikatolu ni siga ni vula o Ata, ka tauri vakaukauwa kece mai vakaitoki na nodra i yau.

¹⁴ A qai la'ki kacivaki na lawa vakatui oqo vei ira na lewenivanua ena veiyasana kecega ka me ra na qai tu vakarau sara ena siga o ya.

¹⁵ A qai lewa talega na tui me ra vakusakusa yani na daukau i vola ki na koro turaga o Susa me la'ki kacivaki raraba taumada kina na i tukutuku oqo. Oti o ya e rau a qai dabe ruarua na tui kei Amani ka tabalaka na gunu kei na kana ni marau, ia na koro levu o Susa a tubu kina e dua na kidroa kei na domobula vakaitamera.