Esera 9 - Vakavakadewa Vou kei na iVola tale eso

Na Leqa ni Veiwatini kei Ira Era Tawa Jiu

¹ Ni sa vakayacori oti na veika oqo, era sa qai mai tukuna vei au eso vei ira na nodra i liuliu na Isireli ni o ira na tamata, kei ira na bete, vata kei ira na Livai era sa sega ni bula tawasei ira tani mai vei ira na tamata ni veivanua e volekati ira me vakataki Kenani, kei Amoni, kei Moapi, kei Ijipita, se o ira na Itaiti, na Perisaiti, na Jepusaiti, kei ira na Amoraiti. Era sa kitaka tiko na Isireli na i vakarau vakasisila eso era sa dau cakava na veimatatamata oqo.

² O ira na Jiu tagane era sa vakawatitaki ira na yalewa tani, ka sa vakavuna oqo me ra sa vakadukadukalitaki kina o ira na nona tamata vakatabui na Kalou. Era sa cakava vakalevu duadua na i tovo oqo o ira na veiliutaki kei ira na vakailesilesi.

³ Ni'u sa rogoca na ka oqo, au a qai dresulaka na noqu i sulu ena levu ni rarawa, ka drutilaka na drau ni uluqu kei na kumiqu, ka'u dabe sobu ki ra ena yalo rarawa.

⁴ Au a dabe toka e kea ena yalo rarawa me la'ki yacova na gauna ni vakacaboisoro ena yakavi. Era sa qai toso mai ka vakavolivoliti au o ira na tamata era sa rerevaka vakalevu na vosa ni Kalou na Isireli me baleta na nodra i valavala ca o ira na suka lesu mai na veivakabobulataki.

⁵ Ena gauna ni vakacaboisoro ena yakavi, au a tucake mai na vanua ka'u a dabe tiko kina ena rarawa levu, ka'u tekiduru sobu ena noqu i sulu kakadresudresu, ka dodoka ruarua na ligaqu me'u masu vei Jiova na noqu Kalou.

⁶ Au a qai kaya, “Kemuni na Kalou, au sa rui madua vakalevu me'u tacake yani ki na nomuni i serau. Sa ka levu sara na neimami i valavala ca, ka sa sivita na ulu i keimami na kena cere; io, sa tara sara na lomalagi na kena cere.

⁷ Mai na nodra gauna na neimami qase me yacova mai oqo, sa ka levu sara na neimami i valavala ca na nomuni tamata. Ena vuku saka ni neimami i valavala ca, keimami sa bale kina ki na ligadra na tui ni veivanua tale eso oi keimami, kei ira na neimami tui, vata kei ira na neimami bete; ka keimami sa vakamatei, sa butakoci na neimami i yau, ka kau tani yani vakabobula. Sa basika vei keimami na vakaloloma levu, me vaka sa yaco tiko ena gauna edaidai.

⁸ Ia ena dua na gauna lekaleka ga oqo, o ni sa vakatakila kina na nomuni loloma, i Jiova na neimami Kalou, ka vakavoca vei keimami eso na vo-ni-bula mai na tiko vakavesu, ka vakatikori keimami ena vanua tabu oqo. O ni sa vagalalataki keimami mai na veivakabobulataki ka solia vei keimami e dua tale na bula vou.

⁹ Ni keimami a tamata bobula, ia o ni sa sega ni biuti keimami tu ga me keimami vakabobulataki. O ni sa vakavuna me ra lomani keimami o ira na tui Perisia, ka sereki keimami me keimami yaco bula mai kina ki Jerusalemi kei Juta, ka tara vou tale na nomuni Valenisoro ka sa rusa tu e liu.

¹⁰ “Ia oqo, kemuni na Kalou, a cava me keimami kaya ena vuku ni veika sa yaco oti tu oqo? Keimami sa talaidredre ki na nomuni i vakaro kecega

¹¹ o ni a vakarota ena gusudra na nomuni tamata na parofita. Era sa tukuna vei keimami ni vanua dukadukali na vanua keimami na mai tawana, baleta ni ra sa vakasinaita na tamata era tiko kina na nodra i valavala lolovira ka vakasisila me tekivu mai na dua na muana ki na dua tale.

¹² Era sa kaya vei keimami na nomuni parofita me keimami kakua sara ni veiwatini kei ira na tamata oqo, ka kua talega ni vukei ira me ra vutuniyau se rawa-ka kevaka keimami na via marautaka na vanua oqo ka solia yani me nodra na neimami kawa ka tawa mudu.

¹³ Keimami sa kila, kemuni na Kalou, ni veitotogi kece sa vakatauci me baleta na neimami i valavala ca kei na cala tale eso era sa lailai sobu mai na kena e dodonu me tau vei keimami, ka o ni sa ia ga na veivakabulai vei keimami na vo-ni-bula.

¹⁴ Ia me qai rawa vakacava me keimami talaidredre tale ki na nomuni i vunau ka vakawati kei ira na tamata vakasisila oqo? Kevaka keimami sa vakayacora oqo, o ni na cudru vakalevu sara kina ka qai vakarusai keimami taucoko vakadua ka na sega tale na vo-ni-bula se me na dua me dro bula rawa.

¹⁵ Kemuni Jiova, na Kalou ni Isireli, o ni sa rui yalododonu. Ia sai keimami oqo na vo-ni-bula, ni o ni sa ia ga na veivakabulai. Keimami sa kerea na nomuni veivosoti ena vuku ni neimami cala, ni sa sega sara ni kilikili kei keimami me keimami tu e matamuni.”