Esera 7 - Vakavakadewa Vou kei na iVola tale eso

Yaco Yani ki Jerusalemi o Esera

¹ Ni sa oti e vuqa na yabaki, ka donuya oqo na veiliutaki vakatui nei Atakisekise, a sa bula voli e dua na tamata, na yacana o Esera. A sa tuva lesu o koya na nona kawa me yaco sara vei Eroni na Bete Levu me vakaoqo: o Esera na luvei i Siraia tagane, na luve i Asaraia tagane, na luve i Ilikaia tagane,

² na luve i Salumi tagane, na luve i Setoki tagane, na luve i Aitupi tagane,

³ na luve i Amaraia tagane, na luve i Asaraia tagane, na luve i Miraioci tagane,

⁴ na luve i Seraia tagane, na luve i Usai tagane, na luve i Puki tagane,

⁵ na luve i Apisua tagane, na luve i Finiasi tagane, na luve i Iliesa tagane, na luve i Eroni tagane.

⁶ O Esera e dua na daunivolatabu sa kila vinaka sara na Lawa i Mosese ka sa solia o Jiova na Kalou ni Isireli. Ena vuku ni kena drodrovi Esera tu na veivakalougatataki i Jiova na nona Kalou, a sa solia kina vei Esera na tui na veika kecega sa kerea vua.

⁷ Ena i kavitu ni yabaki ni veiliutaki vakatui nei Atakisekise, a sa lako mai Papiloni ki Jerusalemi o Esera kei na nona i lawalawa era lewena na bete, na Livai, na dauvakatagi ni Valenisoro, na dauyadrava na valenisoro, kei ira na dauqarava na valenisoro.

⁸ Era sa yaco ki Jerusalemi ena i kalima ni vula ena i kavitu ni nona yabaki ni veiliutaki na tui.

⁹ A tekivutaki na i lakolako mai Papiloni ena i matai ni siga ni matai ni vula, ka ra yaco yani ki Jerusalemi ena i matai ni siga ni kalima ni vula, ni sa liutaki koya voli na liga loloma ni nona Kalou.

¹⁰ A sa dau gumatua o Esera ena kena vulici na Lawa i Jiova, kei na kena muri, kei na kena vakatavulici na lawa kei na i vakaro eso vei ira na Isireli.

Solia na Tui vei Esera na i Vola

¹¹ A sa solia o Atakisekise na tui na i vola oqo kivei Esera na bete ka daunivolatabu talega, o koya e dua sa kila vinaka na lawa eso kei na i vakaro i Jiova sa soli vei ira na Isireli:

¹² “Mai vei Atakisekise na tui kivei Esera na bete, na daunivolatabu me baleta na Lawa ni Kalou ni Lomalagi.

¹³ “Au sa vakarota ki na veiyasana kecega ena noqu matanitu me sa vakatarai o ira vakayadua sa vakadonuya vei ira na Isireli, kei na bete, kei na Livai me ra lako vata yani kei iko ki Jerusalemi.

¹⁴ Oi au na tui, vata kei iratou na noqu daunivakasala e lewe vitu, sa talai iko yani oqo ki Jerusalemi kei Juta mo la'ki vakadikeva mada se sa vakaevei na kena muri vinaka tiko na Lawa ni Kalou, me vaka o sa nuitaki kina.

¹⁵ Mo qai kauta tiko na i solisoli koula kei na siliva sa keitou gadreva vata kei iratou na noqu daunivakasala me la'ki soli vua na nodra Kalou na Isireli, ka sa tiko mai Jerusalemi na nona Valenisoro.

¹⁶ Mo qai kauta kece talega na siliva kei na koula o sa kumuna rawa ena yasana taucoko o Papiloni kei na i loloma kecega era sa via solia na Isireli kei ira na nodra bete ki na Valenisoro ni nodra Kalou mai Jerusalemi.

¹⁷ “Mo vakayagataka sara vakavuku na i lavo oqo, ka mo volia kina eso na bulumakau tagane, na sipi tagane, eso na luve ni sipi, na sila, kei na waini, ka la'ki cabora ena i cabocabonisoro ni Valenisoro mai Jerusalemi.

¹⁸ Mo dou qai vakayagataka na vo ni siliva kei na koula ena veika o sa vakadonuya vata kei ira na wekamu, ia me vakayagataki me vaka na loma ni nomudou Kalou.

¹⁹ Mo la'ki solia vua na Kalou mai Jerusalemi na i yaya kece sara ni veiqaravi ni Valenisoro sa soli oqo vei iko, ka me ra dau vakayagataki ena qaravi ni sokalou.

²⁰ Kevaka e dua tale na ka o vinakata me soli ki na Valenisoro, ia mo qai la'ki taura mai na nona valeniyau na tui.

²¹ “Au sa vakaroti kemudou kece na i vakailesilesi ni valeniyau ena Ra ni Uferetisi mo dou vakarautaka vakatotolo sara vei Esera, o koya na bete kei na daunivolatabu me baleta na Lawa ni Kalou ni Lomalagi, na veika sa kerea vei kemudou,

²² ka me kena i yalayala e 3,400 na kilokaramu na siliva, e 10,000 na kilokaramu na witi, e 2,000 na lita na waini, e 2,000 na lita na waiwai olive, kei na masima ena kena levu ga e vinakati.

²³ Dou qarauna vinaka na kena vakarautaki vua na Kalou ni Lomalagi na veika kece sara e vinakata me kau ki na nona Vale, me kakua kina ni cudruvi au o koya, se cudruvi ira na tui era na veiliutaki mai muri.

²⁴ Sa vakatabui vei kemudou mo dou kumuna e dua na i vakacavacava mai vei ira na bete, na Livai, na dauvakatagi, na dauyadra, na dauveiqaravi, se dua ga na tamata sa semati ki na Valenisoro oqo.

²⁵ “Ia o iko, Esera, ni o sa vakayagataka na vuku sa solia vei iko na nomu Kalou, mo qai digitaka eso na i vakalesilesi kei na turaganilewa me ra veiliutaki ena Ra ni Uferetisi vei ira na tamata taucoko sa bula ena ruku ni Lawa ni nomu Kalou. Mo qai vakatavulica na Lawa oqori vei ira yadua era sega tu ni kila.

²⁶ Kevaka sa talaidredre e dua na tamata ki na lawa ni nomu Kalou se na lawa ni matanitu, ia me qai totogitaki o koya ena gauna totolo duadua: o ya me totogi mate, se me kau tani vakabobula, se me tauri vakaukauwa na nona i yau, se me curu ki valeniveivesu.”

Sa Vakacaucautaka na Kalou o Esera

²⁷ A sa kaya o Esera, “Me vakacaucautaki o Jiova, na Kalou ni neimami qase! Sa vakavuna o koya me rokova vakaoqo na tui na kena qaravi na Valenisoro i Jiova mai Jerusalemi.

²⁸ Ena vuku ni loloma tudei ni Kalou, au sa rawata kina na veitokoni ni tui, kei iratou na nona daunivakasala, kei ira na nona i vakalesilesi cecere. Sa vakayaloqaqataki au talega o Jiova na noqu Kalou, ka sa rawa kina vei au me'u vakauqeta e levu tale na turaga ni mataqali ni Isireli me ra suka lesu vata kei au.”