Esera 6 - Vakavakadewa Vou kei na iVola tale eso

Kunei na i Vakaro i Sairusi

¹ Sa qai vakarota o Taraiasi na tui me caka e dua na veivaqaqai ena vanua ni maroroi i tukutuku makawa ni vale vakatui mai Papiloni.

² Mai na veivaqaqai oqo sa qai kunei mai kina na i vola vivigi mai Ekibatana, na koro turaga ni yasana o Mitia, ka volai tu kina na i tukutuku maroroi oqo:

³ “Ena i matai ni yabaki vakatui i Sairusi, a sa vakarota kina o koya me tara vou tale na Valenisoro mai Jerusalemi, ka me dau ia kina na vakacaboisoro. Na Valenisoro oqo me 27 na mita na kena cere ka 27 na mita na kena raba.

⁴ Me vakalalagataki ena vatu kei na kau ka me taqa e dua na i yatu kau ena dela ni veiyatolu na i yatu vatu. Na i sau taucoko ni cakacaka me qai saumi mai na valeniyau ni tui.

⁵ Na i yaya koula kei na i yaya siliva kece ni Valenisoro mai Jerusalemi ka tokia tani mai ki Papiloni o Nepukanesa me ra vakasukai taucoko tale ki na kedra i tutu ena Valenisoro mai Jerusalemi.”

Vakarota o Taraiasi me Tomani na Cakacaka

⁶ A qai sauma lesu na i vola o Taraiasi na tui me vakaoqo: “Vei Tatinai na kovana ni veivanua ena Ra ni Uferetisi, kei Sicari Posinai, kei ira na nomudrau i tokani mai na Ra ni Uferetisi. “Dou vagalala tani mai na Valenisoro,

⁷ ka kakua ni vakalatilati ena kena tara vou tale. Dou laivi koya na kovana mai Juta kei ira na nodra i liuliu na Jiu me ra tara vou tale na Valenisoro ena kena i tikotiko e liu.

⁸ Au sa vakaroti kemudou oqo mo dou vukei ira ena tara vale. Na i lavo kece era vakayagataka me dau saumi lesu vakatotolo sara vei ira mai na i yau ni valenitui sa kumuni mai na i vakacavacava ena Ra ni Uferetisi, me kakua kina ni vakaleqai na toso ni cakacaka.

⁹ Ena veisiga kece, dou solia na veika kecega era tukuna vei kemudou na bete ni ra vinakata, oqo me vaka na luve ni bulumakau tagane, na sipi se na luve ni sipi me i soro kama vua na Kalou ni Lomalagi, se na witi, na masima, na waini, se waiwai olive.

¹⁰ A veika oqo me vakayacori vakatotolo me rawa kina ni ra vakacabora na i soro sa vinaka vua na Kalou ni Lomalagi ka kerea na nona veivakalougatataki me baleti au kei ira na luvequ tagane.

¹¹ Au sa vakarota talega ni kevaka e dua sa beca na lewa oqo, ia me qai ucu tani mai na nona vale e dua na kau balavu, me qai sivi vakamomoto e dua na muana, ka lausua basikati kina o koya. A nona vale talega me na vukici me i binibini benu ena vuku ni ka oqo.

¹² Kevaka e dua na tui se matanitu sa vorata na i vakaro oqo ka tovolea me vakarusa na Valenisoro oqori, ia me qai samuti koya mada na Kalou, na Kalou a digitaki Jerusalemi me dau ia kina na masu vua. Oi au, o Taraiasi, ka'u sa tauca na i vakaro oqo, ka me muri vakavinaka sara.”

Sa Vakatabui na Valenisoro

¹³ A ratou sa muria vakavinaka sara na i vakaro ni tui o iratou o Tatinaia na kovana, kei Sicari Posinai, kei na nodratou vakailesilesi eso.

¹⁴ A sa daumaka sara na i tosotoso ni tara Valenisoro mai vei ira na nodra qase na Jiu, ka ra vakayaloqaqataki mai vei rau na parofita o Akeai kei Sakaraia. Era sa vakaotia sara na tara Valenisoro me vaka sa vakaroti ira kina na Kalou ni Isireli, kei iratou na tui Perisia o Sairusi, kei Taraiasi, vata kei Atakisekise.

¹⁵ A sa tara oti na Valenisoro ena i katolu ni siga ni vula o Atara, ena i kaono ni yabaki vakatui i Taraiasi.

¹⁶ Era sa qai marautaka vata na vakatabui ni Valenisoro na Isireli, o ya o ira na bete, kei ira na Livai, vata kei ira kecega sa suka lesu mai na veivakabobulataki.

¹⁷ A sa vakacabori ena vakatabui ni Valenisoro e 100 na bulumakau tagane, kei na 200 na sipi, kei na 400 na luve ni sipi me nodra i soro; ka 12 na me, o ya me tau yadua na mataqali yadua e Isireli, me nodra i soro ni valavala ca.

¹⁸ Era sa qai lesi ira na bete kei ira na Livai ki na nodra dui i tavi ni veiqaravi ena Valenisoro, me vaka sa dusimaki ena i Vola i Mosese.

Na Lakosivia

¹⁹ Era sa qai solevutaka na Lakosivia o ira na tamata era suka lesu mai na veivakabobulataki ena i ka tinikava ni siga ni matai ni vula ena yabaki ka tarava.

²⁰ Ni bera oqori, era a vakasavasavataki ira taumada na bete kei na Livai, ka ra sa savasava vakalotu. Era sa vakamate manumanu na Livai me nodra i madrali ni Lakosivia na tamata kece era suka lesu mai na veivakabobulataki, kei ira na bete, ka vakakina o ira na Livai.

²¹ Era sa kania na i madrali o ira kecega na Isireli sa suka lesu mai na veivakabobulataki, ka vakakina o ira kece sa biuta tani na nodra i valavala dukadukali na tamata era tiko voli ena vanua o ya, ka saumaki mai me ra sa qaravi Jiova na Kalou ni Isireli.

²² A sa siga vitu na nodra marautaka voli na Solevu ni Madrai Sega ni Vakatubu. Era sa marau vakalevu baleta ni sa vagolea na loma i tui Asiria o Jiova me yalololoma vei ira, ka tokoni ira kina ena tosoi ni kena tara vou tale na Valenisoro ni nodra Kalou na Isireli.