Esera 10 - Vakavakadewa Vou kei na iVola tale eso

Vakatalai tani o Ira na Yalewa Tani kei na Luvedra

¹ Era sa lewe vuqa sara na Isireli era vakasoqoni wavoliti Esera yani ni sa masu tiko ena mata ni Valenisoro, ni sa tagi ka vakatusa tiko na nodra i valavala ca. Oqo o ira na tagane, na yalewa, kei ira na gone, ka ra sa tagi vakalevu talega.

² A sa qai kaya vei Esera o Sekonaia na luve i Jeieli, mai na kawa i Ilama: “Keimami sai valavala ca vua na Kalou baleta ni keimami sa vakawatitaki ira na yalewa tani. E dina ga ni sa yaco na veika oqo, e se tiko ga na i nuinui me baleti Isireli.

³ Ia oqo, e dodonu me keimami ia na veiyalayalati kei na noda Kalou me ra na vakatalai laivi o ira na yalewa oqo kei na luvedra. Keimami na vakayacora na ka ga o sa vakasalataka kei na nodra i vakasala o ira sa rokova na i vakaro ni Kalou. Keimami na vakayacora taucoko na ka sa vakarota na Lawa ni Kalou.

⁴ Sa nomu i tavi mo vakayacora oqo. Keimami sa tokoni iko kina; ia mo yalodei ga, ka vakayacora sara vakakina.”

⁵ A sa tucake o Esera ka cakava me ra vosa bubului o ira na nodra i liuliu na bete, kei na Livai, kei na lewenivanua ni ra na vakayacora na veika sa vakatura o Sekonaia.

⁶ A sa qai biuta na matamata ni Valenisoro o koya ka curu ki na i tikotiko i Joanani na luve i Eliasipa tagane, ka tiko kina ena bogi taucoko, ka tagicaka tiko kina na nodra talaidredre o ira era a tiko vakabobula. A sa sega ni kania se gunuva e dua na ka.

⁷ A sa qai vakau e dua na i tukutuku ki Jerusalemi kei Juta taucoko me ra soqoni vata yani ki Jerusalemi o ira kecega era sa suka lesu mai na veivakabobulataki,

⁸ me vaka na nodra i vakaro na i liuliu vakamatanitu kei ira na nodra i liuliu na tamata. Kevaka e dua e sega ni yaco mai ena loma ni tolu na siga, ena taura vakaukauwa na nona i yau na matanitu, ena qai kau laivi talega mai vua na nona dodonu me okati tiko vakalewe ni koro.

⁹ Era sa qai soqoni vata yani ki Jerusalemi o ira mai na vanua o Juta kei Penijamini ena loma ga ni tolu na siga, ka ra soqoni vata kece yani ena rara levu e mata ni Valenisoro, ka yaco oqo ena i ka ruasagavulu ni siga ni kaciwa ni vula. A sa tau bi vakalevu na uca ka ra sautaninini kecega na tamata ena vuku ni draki ca kei na i naki bibi ni nodra vakasoqoni vata mai ki na bose.

¹⁰ Sa qai tucake o Esera na bete ka vosa vei ira, ka kaya: “O ni sa tamata tawa vakabauta ka vakacalai Isireli ena nomuni tauri ira na yalewa tani me watimuni.

¹¹ Ia oqo mo ni vakatusa mai na nomuni i valavala ca vei Jiova, na Kalou ni nomuni qase, ka cakava na ka me yalovinaka kina o koya. Me da qai bula tawasei keda tani mai vei ira na tamata era tu oqo ena noda vanua, ka mo ni biuti ira laivi talega na yalewa tani era sa watimuni.”

¹² Era sa qai kailavaka lesu na i sau ni vosa o ya o ira na tamata ka vaka, “Keimami na kitaka na veika cava ga o sa tukuna.”

¹³ Era sa kaya talega, “Sa rui sivia na levu ni tamata era sa soqoni vata mai oqo, ka sa tau bi vakalevu na uca. E ka dredre toka me keimami tucake tu vakaoqo e tautuba. Na ka oqo ena sega ni qaravi ena loma ni dua se rua ga na siga, baleta ni sa lewe levu sara vei keimami sa coriti tu ena i valavala ca oqo.

¹⁴ Me ra tiko ga e Jerusalemi o ira na neimami vakailesilesi ka qarava na leqa oqo. Ia me qai lako mai o koya vakayadua sa vakawati kei na yalewa tani ena dua na gauna lokuci, vata kei ira na i liuliu kei na dauveilewai ni koro. Na sala oqo ena vagolei tani kina na cudru ni Kalou me baleta na cala levu oqo.”

¹⁵ A sa sega ni dua me saqata na i tuvatuva oqo ka vakavo duaduaga o Jonacani na luve i Asaeli tagane vata kei Josaia na luve i Tikiva tagane, ka rau sa tokoni mai vei rau o Mesulame kei Sapitai, e dua na Livai.

¹⁶ Era sa vakadonuya na i tuvatuva o ya o ira era suka lesu mai na veivakabobulataki, ka sa lesia kina o Esera na bete eso vei ira ena kedra maliwa na turaga ni mataqali ka vola na yacadra. A tekivu na nodra veivaqaqai ena i matai ni siga ni katini ni vula,

¹⁷ ka otivi taucoko sara na veivaqaqai ni tamata yadua era vakawati yalewa tani ena loma ni tolu na vula ka tarava.

O Ira Era Vakawati Yalewa Tani

¹⁸ Oqo na yacadra na tagane era vakawati yalewa tani: Vei ira na bete, era sa volai vakavuvale: Mai na kawa i Josua kei iratou na tacina tagane, na luvena tagane o Josateki: o Maseaia, kei Iliesa, kei Jaripi, vata kei Kitalaia.

¹⁹ Eratou sa yalataka me ratou sere kei na dui watidratou, ka ratou vakacabora na sipi tagane me i soro ni nodratou i valavala ca.

²⁰ Mai na kawa i Imeri: o Anani vata kei Sepataia.

²¹ Mai na kawa i Erimi: o Maseaia, kei Ilaijia, kei Simaia, kei Jeieli, vata kei Usaia.

²² Mai na kawa i Pasuri: o Elionai, kei Maseia, kei Isimeli, kei Nacanieli, kei Josapati, vata kei Elasa

²³ Mai vei ira na Livai: o Josapati, kei Semeai, kei Kelaia (yacana talega o Kilita), kei Peceaia, kei Juta, vata kei Iliesa.

²⁴ Mai vei ira dauvakatagi: o Ilaiasipi Mai vei ira na dauyadrava na Valenisoro: o Saluma, kei Teleni, vata kei Uri.

²⁵ Mai vei ira na Isireli: mai na kawa i Parosi: o Ramaia, kei Isaia, kei Malakaia, kei Maijamini, kei Iliesa, kei Malakaia, vata kei Penaia

²⁶ Mai na kawa i Ilama: o Matanaia, kei Sakaraia, kei Jeieli, kei Apiti, kei Jeremoci, vata kei Elaija.

²⁷ Mai na kawa i Satu: o Elieonai, kei Eliasipi, kei Matanaia, kei Jeremoci, kei Sapati, vata kei Asisa.

²⁸ Mai na kawa i Pepai: o Joanani, kei Enanaia, kei Sapei, vata kei Acelai.

²⁹ Mai na kawa i Pani: o Mesulame, kei Maluki, kei Atajia, kei Jasupi, kei Siali, vata kei Jeremoci.

³⁰ Mai na kawa i Peaci Maopi: o Atina, kei Kilali, kei Penaia, kei Meesea, kei Matanaia, kei Bisaleli, kei Pinui, vata kei Manasa.

³¹ Mai na kawa i Arimi: o Iliesa, kei Isaia, kei Malikaia, kei Simaia, kei Simione,

³² kei Penijamini, kei Maluki, vata kei Simaraia.

³³ Mai na kawa i Asumi: o Matinai, kei Mataca, kei Sapati, kei Ilifeleti, kei Jiremai, kei Manasa, vata kei Semeai.

³⁴ Mai na kawa i Pani: o Meatai, kei Emirami, kei Ueli,

³⁵ kei Penaia, kei Pitiaia, kei Kilui,

³⁶ kei Vaniya, kei Meremoce, kei Eliasipa,

³⁷ kei Matanaia, kei Matinai, vata kei Jeesau.

³⁸ Mai na kawa i Pinui: o Semeai,

³⁹ kei Selemaia, kei Necani, kei Ataia,

⁴⁰ kei Makanatipei, kei Sasei, kei Sarei,

⁴¹ kei Esareli, kei Selemaia, kei Simaraia,

⁴² kei Salumi, kei Amaraia, vata kei Iosefo.

⁴³ Mai na kawa i Nipo: o Jieieli, kei Matacaia, kei Sapati, kei Sipina, kei Jatai, kei Joeli, vata kei Penaia.

⁴⁴ Sa i koya oqo na tagane taucoko sara era vakawati yalewa tani. Era sa sere kei na watidra oqo ka vakatalai ira tani yani kei na dui luvedra.