Emosi 9 - Vakavakadewa Vou kei na iVola tale eso

Na Vakataulewa i Jiova

¹ Au a raica na Turaga ni sa tucake tu ena yasa ni cabocabonisoro. A sa solia na i vakaro: “Mo samuta vakaukauwa na domo ni duru me sakure. Voroki ira tani mai ka me lutuka na buradeladra na tamata. Au na qai vakamatei ira na kena vo ena i valu. Ena sega ni dua e dro bula rawa, ka na sega talega ni vakabulai o koya e mani dro.

² Kevaka era mani kelikeli sara ki Bulu, ena tuiraki ira mai kea na ligaqu. Kevaka era dro cake ki lomalagi, au na dreti ira sobu mai.

³ Ia kevaka era la'ki vunitaki ira ena Ulu i Kameli, au na vakasaqarai ira ka kunei ira kina. Ia kevaka era na vunitaki ira me'u kua ni kunei ira mai na boto ni wasawasa, au na vakarota na gata levu kecega me na kati ira.

⁴ Kevaka me ra kau vakabobula vei ira na kedra meca, au na vakarota me ra vakamatei. Au sa vakadeitaka me'u vakarusai ira, ka sega ni vukei ira.”

⁵ Sa tarai vuravura o Jiova ni lewevuqa, A sa sakure ka waicala, Ka sa tagi o ira sa tiko kina. Sa tubu cake ka lutu sobu o vuravura me vaka na Uciwai na Naile.

⁶ Sa tara na nona vale o Jiova mai lomalagi, Ka sa vakaduria na kena yavu e dela i vuravura. Sa kaciva yani na wai ni wasawasa Ka sovaraka yani e dela i vuravura. Na yacana ga o Jiova!

⁷ A sa kaya o Jiova, “Kemuni na Isireli, o ni sa sega li ni vakataki ira na kai Eciopea vei au? Au a sega li ni kauti ira cake mai Ijipita na Isireli, kei ira kai Filisitia mai Kafitori, kei ira na kai Siria mai Kiri?

⁸ Oi au oqo, o Jiova ni lewevuqa, ka'u sa wanonova voli na matanitu i valavala ca oqo o Isireli, ka'u na vakarusa tani mai na dela i vuravura. Ia au na sega ga ni vaqeyavutaka vakadua na kawa i Jekope.

⁹ “Au na solia na i vakaro ka kureitaki ira na Isireli me vaka sa vakadewataki na sila ena vulo. Au na kureitaki ira ena kedra maliwa na veimatanitu me ra kau laivi ira o ira sa tawayaga.

¹⁰ O ira ga na tamata i valavala ca ena kedra maliwa na noqu tamata era na vakamatei ena i valu — o ira kece sara sa kaya, ‘Ena sega ni vakatara na Kalou me torovi keimami e dua na leqa.’ ”

Vakaduri Vou Tale o Isireli

¹¹ A sa kaya o Jiova, “Ena yaco mai na siga ka'u na vakaduria vou tale kina na matanitu i Tevita, ka sa vaka e dua na vale sa vakacacani sara vakaca. Au na vakavinakataka tale na kena lalaga kabasu, ka'u na vakaduria na tikina sa rusa. Au na vakavouia tale me vaka ga na kena i tuvaki e liu.

¹² O ira na Isireli era na qai taukeni ira na vo-ni-bula kei Itomi, kei ira na veimatanitu kecega sa kilai kina na yacaqu, o ira era na vukea na kena vakayacori na ka oqo.”

¹³ “Sa voleka mai na kena siga,” sa kaya o Jiova, Ena bera na dautatamusuki ni sa toboki koya koso na daucukicuki; Ka bera na dauqaqi qerepi ni sa toboki koya koso na dautei vaini. Ena tuturu mai na ulunivanua na waini vinaka, Ka drodro vata yani kei na kena veidelana.

¹⁴ Au na vakalesuya tale na nodra kalougata na Isireli, Ka ra tara vou tale na nodra koro ka tiko kina; Era na tei vaini ka gunuva na kena waini; Era na ia na teitei ka kana mai na vuana.

¹⁵ Au na teivaki ira na noqu tamata ena nodra vanua, Ka ra na sega tale ni qai cukiraki tani Mai na vanua ka'u sa solia vei ira.” Sa vosa vakaoqo o Jiova na nomuni Kalou.