Emosi 8 - Vakavakadewa Vou kei na iVola tale eso

Na Raivotu ni Basikete Vuata

¹ A sa vakaraitaka tale vei au e dua na raivotu na Turaga na Kalou o Jiova. Au a raica kina e dua na basikete vuata.

² A sa tarogi au o Jiova, “I Emosi, na cava o raica tiko oqori? Au a kaya, “E dua na basikete vuata.” Sa qai kaya vei au o Jiova, “Sa yaco mai oqo na i vakataotioti vei ira na noqu tamata na Isireli. Au na sega ni veisautaka tale na lomaqu me baleta na nodra cudruvi.

³ Ena siga o ya, ena vuki na sere voli ena valenitui me tagi lagalaga ni somate. Ena levu sara na yago ni tamata mate ena veivanua kecega. Era na qai biu galugalu ga mai ki tautuba.”

⁴ Ni rogoca oqo, oi kemuni na dau vakalolomataki ira era dau gadreva na veivuke ka dau sasagataka na nodra vakarusai na dravudravua.

⁵ O ni sa kaya ga vakai kemuni, “Eda sa waraka ga oqo me totolo mai na i cavacava ni vakatatabu me rawa ni da volitaka na noda sila. Ena oti beka ena gauna cava na Siga ni Vakacecegu, me rawa ni tekivu tale na noda volivolitaki? Sa na qai rawa kina me da vakatubura vakasivia na kena i sau, ka lasutaka kena bibi, ka vakatanitaka na i misini ni vakarautaki bibi me ra lawakitaki kina na mai volivoli.

⁶ Eda rawa ni volitaka na witi ca ena i sau e levu cake sara. Eda na kunea na tamata dravudravua sa sega ni sauma rawa na nona dinau, ka sa sega ni solia rawa mada ga na i sau ni dua na i vava, me da qai voli koya me vaka na bobula.”

⁷ A sa bubului o Jiova, na nodra Kalou na Isireli, ni sa kaya, “Au na sega sara ni guilecava na veika ca era sa cakava.

⁸ Ena vuku ni ka oqo, ena kureitaki kina o vuravura, ka ra na tiko leqa kina na lewenivanua kecega. Ena vakayavalati na vanua taucoko; ena tubu cake ka lutu sobu tale me vaka na Uciwai na Naile mai Ijipita.

⁹ Sa voleka tiko mai na gauna me'u na vakadromuca kina na matanisiga ena sigalevu tutu ka me buto mai vaka na bogi o vuravura ena siga.

¹⁰ Au na vukica na nomuni solevu ni marau me soqo ni rarawa, kei na nomuni sere kecega me tagi; ka'u na lewa mo ni sulumaka na i sulu taga, ka me ra tasi kece na ulumuni. Au na cakava oqori me vaka na nona lolositaka na luvena tagane e duabau o tamana. Ia na kena i tinitini ena vaka e dua na siga ni rarawa levu.

¹¹ Sa kaya o Jiova, “Raica ena yaco mai na gauna ka'u na vakayacora kina na dausiga ki na vanua. Era na viakana na tamata, ia e segai ga na vuku ni madrai; era na viagunu, ia e segai ga ena vuku ni wai ni gunu. Era na viakania ka viagunuva ga na vosa i Jiova.

¹² Era na veilakoyaki na tamata me tekivu mai na Waitui Mate ki na Meditereni, ka qai lako mai na vualiku ki na tokalau. Era na vakasaqara voli na vosa i Jiova ena veivanua taucoko sara, ia era na sega ga ni kunea.

¹³ Ena siga o ya, era na matabuto kina ena viagunu na goneyalewa mata vinaka kei na cauravou.

¹⁴ O ira sa bubului vei ira na kalou matakau ni Samaria, ka kaya, ‘Sa bula na nomu kalou o Tani,’ se, ‘Me vaka sa bula na i valavala vaka-Pierisepa’ — era na bale ka sega ni tucake tale.”