Emosi 7 - Vakavakadewa Vou kei na iVola tale eso

Na Raivotu ni Vodre

¹ A sa vakaraitaka vei au na Turaga o Jiova e dua na raivotu. Au a raica ni a bulia tiko o koya e dua na qele ni vodre ni se qai tamusuki oti ga na nona i votavota ni co na tui ka sa tekivu me tubu cake tale mai na co.

² Ena noqu raivotu ka'u a raica kina na nodra sa kania na vodre na veika drokadroka kecega ni vanua, ka'u sa qai kaya, “Kemuni na Turaga Jiova, ni vosoti ira na nomuni tamata! Era na qai bula rawa li vakaevei? Era sa rui lalai sara ka malumalumu!”

³ A sa veisautaka o Jiova na lomana, ka kaya, “Na veika o sa raica ena sega ni yaco.”

Na Raivotu ni Bukawaqa

⁴ A sa duatale na noqu raivotu mai vua na Turaga o Jiova ni lewe vuqa. Au a raica kina ni sa vakavakarau tiko o koya me totogitaki ira na nona tamata ena bukawaqa. A sa kama na wasa levu ena ruku i vuravura mai na bukawaqa, ka sa tekivu me kama mai na vanua mamaca.

⁵ Au a qai kaya, “Oi kemuni Jiova ni lewe vuqa, au sa kerea me sa mudu na ka oqo! Era na bula rawa vakaevei na nomuni tamata? Era sa rui lalai ka malumalumu!”

⁶ A sa veisautaka tale na lomana o Jiova, ka kaya, “Ena sega talega ni yaco na ka oqo.”

Na Raivotu ni Vatu ni Vakarau

⁷ A sa dua tale na noqu raivotu mai vua na Turaga. Au a raica kina ni sa tucake tu o koya ena yasa ni dua na lalaga ka sa tara ena veivuke ni vatu ni vakarau, ka sa taura tale tu ga e ligana e dua na vatu ni vakarau.

⁸ A sa tarogi au o koya, “I Emosi, na cava o sa raica?” Au a qai kaya, “E dua na vatu ni vakarau.” Sa qai kaya na Turaga, “Raica, au sa vakayagataka tiko oqo me'u dusia ni o ira na noqu tamata era sa vaka na lalaga sa sega ni vakarautaki donu. Au sa sega talega ni qai veisautaka na lomaqu me baleta na noqu totogitaki ira.

⁹ Na veivanua kece sara era dau sokalou kina na kawa i Aisake ena vakarusai. Ena vakacacani vakadua na veitikina tabu e Isireli. Au na muduka vakakina na veiliutaki vakatui nei Jeropoama na tui.”

O Emosi kei Amasaia

¹⁰ A sa qai talatala o Amasaia na bete mai Peceli kivei Jeropoama na tui Isireli, ka kaya, “Sa bukia tiko o Emosi na kemu vere ena kedra maliwa na Isireli. Na nona vosa ena vakacacana na matanitu.

¹¹ Oqo na ka sa kaya o koya: ‘Ena mate ena i valu o Jeropoama, ka ra na kau tani vakabobula mai na nodra vanua na Isireli.’ ”

¹² A sa qai kaya o Amasaia vei Emosi, “O iko na parofita, sa rauta mada! Lesu talega ki Juta ka qai la'ki parofisai mai kina. Me ra qai la'ki saumi iko mai kea.

¹³ Kakua tale vakadua ni parofisai e Peceli. Oqo na nona vanua ni sokalou na tui, na valenisoro ni matanitu.

¹⁴ A sa kaya o Emosi, “Au sa sega talega ni mataqali parofita me dau saumi vakailavo ena vuku ni parofisai oi au. Ni'u sa dua ga na i vakatawanisipi oi au, ka'u sa dau qarava talega na vunilolo.

¹⁵ Ia sa kacivi au ga o Jiova mai na noqu cakacaka ni vakatawa sipi ka vakaroti au me'u lako mai ka parofisai vei ira na nona tamata na Isireli.

¹⁶ Ia oqo, mo rogoca mada na vosa i Jiova. O sa kaya vei au me'u muduka na parofisai, me'u muduka na vunauci ira tiko na Isireli.

¹⁷ Ena vuku ni nomu vosa, i Amasaia, sa kaya kina vakaoqo vei iko o Jiova, ‘Na watimu ena yaco me dau volitaki koya ena cakacaka ni veidauci ena veisaqata ni koro, ka ra na vakamatei na luvemu ena i valu. Na nomu vanua ena wasewasei ka votai vei ira na tani, ia o iko Amasaia o na la'ki mate ena dua na matanitu sa sega ni kila na Kalou. O ira kece sara na Isireli era na kau tani yani vakabobula mai na nodra vanua.’ ”