Emosi 6 - Vakavakadewa Vou kei na iVola tale eso

Na Vakarusai nei Isireli

¹ Ena ka vakadomobula sara vei kemuni sa bula vakavinaka voli e Saioni kei kemuni sa vakila na tiko vakacegu mai Samaria — oi kemuni na dauveiliutaki cecere ni matanitu levu oqo o Isireli, oi kemuni ka ra dau kere veivuke kina na tamata!

² Ni lako ka la'ki raica mada na koro Kaline. Mai kea, ni lako sara yani ki na koro o Emaci, ka qai lako sobu ki Kaca, na nodra koro na kai Filisitia. Era vinaka cake li o ira o ya mai na matanitu o Isireli kei Juta? Sa levu cake li na nodra vanua mai na nomuni vanua?

³ O ni sa sega ni via vakadinata ni sa toro voleka tiko mai na siga ca, ia na veika o ni sa kitaka sa vakavuna me yaco totolo mai kina na siga o ya.

⁴ Ena ka vakadomobula dina vei kemuni sa dau dadavo tu ena nomuni i dabedabe sau lelevu, ka marautaka voli na kemuni veleti bulumakau kei na luve ni sipi!

⁵ O ni sa dau taleitaka na buli sere, me vakataki Tevita, ka qiria na veisere oqo ena api.

⁶ O ni sa daugunu waini ena bilo lelevu ka vakayagataka na i lumu boi vinaka, ia o ni sa sega ni tagicaka ga na rusa i Isireli.

⁷ O koya oqo, o ni na kena i sevu kina ni tamata era na kau vakabobula. Na nomuni solevu kei na kana vata ena muduki.

⁸ A sa vosa vakaoqo na Turaga, o Jiova ni lewe vuqa: “Au sa besetaka na nodra viavialevu na Isireli; au sa cata na nodra veitikotiko ni valu kaukauwa. Io au na solia ki na ligadra na meca na nodra koro turaga kei na ka kecega sa sinai kina.”

⁹ Kevaka era sa vo ga e lewe tini na tamata ena dua na vuvale, era na mate ga.

¹⁰ Ia na weka i koya dina sa mate, o koya sa liutaka tiko na somate, ena kauta mai ki tautuba na yago ni mate. Ena qai kaci lesu yani vua ga e dua sa tiko e loma ni vale, me vakaoqo, “E dua tale beka drau lewe rua kaya tiko? Ena sauma mai e dua na domo, “E sega!” Ena qai kaya na wekana, “Mo tiko lo sara! Me daru qarauna vinaka sara me daru kakua ni cavuta na yaca i Jiova.”

¹¹ Raica, ni sa solia o Jiova na nona i vakaro, era na vorolaki me vurumemea kece sara na vale lelevu kei na vale lalai.

¹² Era cici li na ose ena dela ni vatu? E dua li e dau vakayagataka na bulumakau me siviyara kina ena wasawasa? Ia o ni sa vakatanitaka ga na lewa dodonu me wai gaga kei na vua ni valavala dodonu me wai wiwi.

¹³ Oi kemuni sa dau sakitaka na nomuni sa rawa na koro o Lotipa, ni o ni sa dau kaya, “E a sega li ni noda kaukauwa vakai keda eda a vakadrukai Kanaimi kina me noda?”

¹⁴ A sa kaya o Jiova na Kalou ni lewevuqa, “Kemuni na Isireli, au na vakarau vakatala yani oqo e dua na matanitu tani me taura vakaukauwa na nomuni vanua. Ena vakasaurarataki kemuni me tekivu mai na i curucuru ki Emaci ka yaco ki na soniwai o Arapa.”