Emosi 4 - Vakavakadewa Vou kei na iVola tale eso

¹ Mo ni rogoca na vosa oqo na yalewa ni Samaria, o ni sa levulevu me vakataka na bulumakau ni Pasani sa vakani vinaka, o ni sa dau vakasosataki ira na malumalumu ka vakalolomataki ira na dravudravua, ka o ni sa dauvakaroti ira na watimuni me ra kauta mai na memuni gunu!

² Me vaka ni sa dodonu ka tabu ka savasava na Turaga o Jiova, ka yalayala kina vakaoqo, “Sa toro voleka tiko mai vei kemuni na siga era na kauti kemuni vakasaurara yani kina, ka o ni na vaka na ika sa toka e gusuna na bati ni siwa.

³ O ni na yarataki yani ki na tiki ni bai sa kabasu o ni sa voleka sara kina viritaki ki tautuba.”

Sega ga ni Vuli Rawa o Isireli

⁴ Sa kaya vakaoqo o Jiova ni lewevuqa, “Oi kemuni na Isireli, ni lako ki na vanua tabu mai Peceli ka ia na i valavala ca, kevaka sa dodonu me vakakina! Ni lako talega i Kilikali, ka vakalevutaka na nomuni caka cala; ni kauta mai na nomuni soro ena veimataka kece, kei na i katini ni ka o ni taukena ena veiyatolu na siga.

⁵ Ni vakacabora talega me i madrali ni vakavinavinaka na madrai vakatubu. Ni kacivaka raraba na i madrali sa vakacabori wale ga; ni cakava sara ni sa dau malele kina na lomamuni!”

⁶ “Sa i au ga ka sa kauta mai na lauqa ki na nomuni veikorokoro, ia o ni a sega ga ni lesu mai vei au.

⁷ Au a mani tarova na uca ena gauna e gadreva vakalevu kina mai na nomuni i teitei. Au a vakatauca na uca ena dua na koro, ka segai ena dua tale na koro. A sa tau na uca ena dua na i teitei, ia sa mamaca ga ka malai e dua tale na i teitei.

⁸ Ni ra sa malumalumu ena karamaca na tamata ni veikorokoro eso, era sa lako ki na dua tale na koro me ra kunea kina na wai, ia sa sega ni veirauti ga na wai me gunuvi. Ia o ni a sega ga ni lesu mai vei au.

⁹ “Au a vakauta yani vei kemuni e dua na cagi katakata me vakamamacataka na nomuni i tei. Era sa kania kece na vodre na nomuni i teitei kei na nomuni veiloganivaini. Ia o ni a sega ga ni lesu mai vei au.

¹⁰ “Au a tala yani vei kemuni na mate rerevaki me vaka mai Ijipita. Au a vakamatei ira na nomuni cauravou ena i seleiwau; ka kauti ira tani na nomuni ose. Au a vakalaiva me tubu cake na boi ca ni nomuni i tikotiko vakaivalu, me curuma na ucumuni; ia o ni a sega ga ni lesu mai vei au.

¹¹ “Au a vakarusai ira eso vei kemuni me vaka na noqu a vakarusai rau o Sotoma kei Komora, ka vaka na dudu ni buka sa ucuraki tani. Ia, o ni a sega ga ni lesu mai vei au,” sa kaya o Jiova.

¹² “O koya oqo, kemuni na Isireli, au sa na totogitaki kemuni kina. Ia me vaka ni'u sa na vakayacora oqo, mo ni vakarautaki kemuni kina ena nomuni sotava na noqu vakataulewa!”

¹³ Sa i koya ga na Kalou sa bulia na veiulunivanua, Ka sa vakavuna na cagi. Sa vakatakila na lomana vei ira na tamata; Ka sa vukica na siga me bogi. A sa lakova na veivanua cecere kei vuravura. Sa i Jiova ni lewevuqa na yacana!”