Emosi 3 - Vakavakadewa Vou kei na iVola tale eso

¹ Oi kemuni na Isireli, mo ni rogoca na vosa oqo sa tukuna o Jiova me baleti kemuni, na matanitu taucoko sara sa kauta mai o koya mai na vanua o Ijipita:

² “Mai vei ira na veimatanitu kece sara e vuravura, sai iko duadua ga au sa kila ka kauwaitaka vakalevu. Oqori na vuna e sa rui vakadomobula kina na nomuni i valavala ca, ka oqori talega na vuna ka'u sa cudruvi kemuni kina ena vuku ni nomuni caka cala oqo.”

Na Nona i Tavi na Parofita

³ E rau na sala vata li e lewe rua na tamata kevaka e sega taumada ni bau veinaki e liu?

⁴ E dautagi li na laione mai na veikau kevaka e se sega taumada ni kunea na kena? E dautabalaka li na domona na luve ni laione mai na nona qara kevaka e se sega taumada ni toboka na kena?

⁵ Ena daucoko li na manumanu vuka kevaka e sega mada ni bacani? Ena dau rawa li ni riba na dai kevaka e sega na ka e tara na kena i vakasaribariba?

⁶ E dau uvuci li na davui ni valu ena dua na koro ka ra sega ni taqaya na lewena? E dau yaco li mai na leqa ki na dua na koro kevaka e sega mada ni tala mai o Jiova?

⁷ E dina sara, ni sa sega mada ni vakayacora e dua na ka na Turaga o Jiova kevaka e sega mada ni se vakaraitaka na nona i naki vei ira na nona tamata na parofita.

⁸ Kevaka sa tagi na laione, o cei li me na sega ni rere? Kevaka sa vosa na Turaga o Jiova, o cei li me na sega ni via kacivaka na nona i tukutuku?

Na Rusa i Samaria

⁹ Mo kacivaka vakaoqo ki na veitikotiko ni valu kaukauwa mai Asiria kei Ijipita: “Ni soqoni vata yani ki na veidelana sa volivoliti Samaria ka raica na levu ni cakacaka vakaveitalia kei na i valavala tawa kilikili sa vakayacori tiko kina.”

¹⁰ A sa kaya o Jiova, “Era sa sega ni kila o ira oqo na cakacaka vakadodonu, ia era sa binia ga na i tovo kaukauwa kei na butako ena nodra veitikotiko ni valu kaukauwa.

¹¹ Ena ka oqo, ena vakavolivolita kina na nodra vanua na meca, ka vakarusa na veika e dau taqomaki ira, ka koveraka na nodra veitikotiko vakaturaga.”

¹² Sa kaya vakaoqo o Jiova, “Me vaka na nona sa la'ki maroroya mai na i vakatawanisipi na yava ni sipi e rua se na daligani sipi ka sa kania vakavo na laione, era na lewe lailai talega vakakina na vo-ni-bula vei ira na kai Samaria, o ira era sa davo sobu ena i dabedabe digitaki.

¹³ Ni rogoca sara oqo, ka vakasalataki ira kina na kawa i Jekope,” sa kaya na Turaga o Jiova ni lewevuqa.

¹⁴ “Ena siga au na cudruvi ira kina na Isireli ena vuku ni nodra cala, au na vakacacana vakakina na i cabocabonisoro mai Peceli. Ena musuki laivi na tutuna vava ni i cabocabonisoro ka na lutu ki na qele.

¹⁵ Au na vakarusa na vale ni vula i liliwa kei na vale ni vula i katakata. Na veivale era sa ukutaki ena ivori era na vakarusai vakadua; na veivale lelevu kece sara ena vakarusai.”