Efeso 6 - Vakavakadewa Vou kei na iVola tale eso

O Ira na Gone kei Ira na i Tubutubu

¹ Kemuni na gone, mo ni talairawarawa vei ira na nomuni i tubutubu ena ka sa vinaka vua na Turaga, ni sa ka dodonu oqo mo ni cakava.

² “Vakarokorokotaki rau na tamamu kei na tinamu.” Sa i koya oqo na i matai ni vunau sa dua kina na vosa ni yalayala:

³ “mo vinaka kina, ka bula balavu kina ena dela i vuravura.”

⁴ Kemuni na i tubutubu, ni kakua ni dau vakacudrui ira na luvemuni ia mo ni dau vakavulici ira ga ena i vakarau kei na i vakavuvuli ni Turaga.

O Ira na Bobula kei Ira na Nodra Turaga

⁵ Oi kemuni na bobula, ni talairawarawa vei ira na nomuni turaga vakayago ena rere kei na sautaninini, ni talairawarawa ena lomadina me vaka o ni sa vakayacora tiko vei Karisito.

⁶ Ni kakua ni makutu ga ni ra rai tu, me ra vinakati kemuni kina. Ia me vaka o ni sa tamata nei Karisito, ni cakava na loma ni Kalou ena yalomuni taucoko.

⁷ Ni qarava na nomuni i tavi ena loma vinaka me vaka o ni cakava vua na Turaga, ka sega ni vei ira walega na tamata;

⁸ ni o ni sa kila tiko ni ka vinaka kece e cakava na tamata yadua, se bobula se tamata galala, ena saumi vakakina mai vua na Turaga.

⁹ Kemuni talega na nodra turaga na bobula, ni cakava vakakina vei ira na nomuni bobula, ka kakua ni dau vakarerei ira. Ni o ni sa kila sa tiko mai lomalagi na nomuni Turaga, o koya sa nodra Turaga talega, ka sa sega ni dauveivakaduiduitaki o koya.

Na i Yaragi Taucoko ni Kalou

¹⁰ Me'u tinia, mo ni kaukauwa tiko ena vuku ni Turaga kei na nona kaukauwa mana.

¹¹ Mo ni vakaiyaragi ena i yaragi kecega ni Kalou me rawa ni o ni tudei kina ka vorata na i lawaki ni tevoro.

¹² Ni da sa sega ni veivala kei ira na tamata, ia eda sa veivala ga kei ira na veiyalo velavela ena veiyasana vakalomalagi, kei ira era sa veiliutaki vakatani, kei ira sa vakataulewa cala, kei na kaukauwa eso ni vuravura butobuto oqo.

¹³ O koya oqo mo ni daramaka kina na i yaragi kecega ni Kalou! O ni na qai vorata rawa kina na sasaga ni meca ni sa yaco mai na siga ca; ia ni sa oti na nomuni veivorati, mo ni tudei tikoga.

¹⁴ O koya mo ni qai tu vakarau kina, ni sa vauci na lomadina me beleti ni tolomuni, ka i tataqomaki ni lomaseremuni na i valavala dodonu,

¹⁵ ka i vava me daramaki ki na yavamuni na yalo sa vakarau tu me dau kacivaka na i Tukutuku Vinaka ni veivinakati.

¹⁶ Ena veigauna taucoko sara, mo ni taura na vakabauta me i sasabai, ka ni oqo ena sabaya laivi ka bokoca na gasau kama kecega ni tevoro.

¹⁷ Ni ciqoma na veivakabulai ni Turaga me i vakaruru ni ulu, kei na vosa ni Kalou me i seleiwau sa solia vei kemuni na Yalo Tabu.

¹⁸ Mo ni masu tikoga ena veimataqali masumasu kece sara kei na daukerekere ena Yalo Tabu. Ena ka oqo, mo ni yadrava tiko kina na kena gumatuataki na nodra dau masulaki na tamata ni Kalou kecega.

¹⁹ Ni masulaki au talega me dau soli vei au na vosa ni'u dau vakarau me'u vosa, me'u vunautaka kina vakadodonu na ka vuni ni tukutuku vinaka.

²⁰ Ena vuku ni kosipeli, au sa kena mata oi au, ka dina ga ni'u sa vesu tu. Ni masulaka me'u na vunautaka vakadoudou na kosipeli me vaka ni sa dodonu ga me vakakina.

Tini ena Loloma

²¹ O ni na via kila talega na ka e baleti au kei na ka au cakava tiko; ia ena tukuna na ka kecega vei kemuni o Tikiko na wekaqu lomani ka i talai yalodina ni Turaga.

²² Au sa talai koya yani vei kemuni ena ka oqo mo ni kila kina na ka e baleti keitou, ka me vakayaloqaqataki kemuni o koya.

²³ Me tikoga vei kemuni na veiwekani na vakacegu, na loloma kei na vakabauta mai vua na Kalou o Tamada kei na Turaga o Jisu Karisito.

²⁴ Me tikoga na loloma vei kemuni kece o ni lomana na Turaga o Jisu Karisito ena loloma e sega ni mate rawa.