Efeso 3 - Vakavakadewa Vou kei na iVola tale eso

Na Cakacaka i Paula vei Ira na Kai Veimatanitu Tani

¹ Ena vuku ni ka oqo au sa masu kina vua na Kalou oi au o Paula na bobula i Karisito me baleti kemuni na kai veimatanitu tani.

² O ni sa rogoca beka na nona sa solia vei au na Kalou na i solisoli me'u vakaitavi ena vukumuni.

³ Sa vakatakila mai na nona i naki vuni ka vakaraitaka vei au, me vaka au a vola mada yani vakalekaleka eliu.

⁴ Ni o ni wilika o ni sa kila rawa kina na ka au sa kila ena ka vuni me baleti Karisito.

⁵ Na ka sa sega mada ni bau vakaraitaka vei ira na tamata ena veitabatamata eliu ia sa qai vakatakila mai oqo ena Yalo Tabu vei ira na nona i apositolo tabu kei ira na nona parofita.

⁶ Sa vakaoqo na ka vuni o ya: ena i tukutuku vinaka era sa vakaivotavota vata kina na kai veimatanitu tani kei ira na Jiu ena veivakalougatataki ni Kalou ni ra sa veitiki ni dua ga na yago, ka ra sa taukena vata na ka sa yalataki ena vuku i Karisito.

⁷ Au sa lesi me'u i talatala ni tukutuku vinaka me vaka na i solisoli ni loloma-savu ni Kalou, ka sa soli vei au ena cakacaka yaco ni nona kaukauwa.

⁸ E dina ga ni'u tu duadua sara e muri vei keimami kece na nona tamata na Kalou, ia sa soli vei au na i solisoli oqo me'u vunautaka vei kemuni na kai veimatanitu tani, ni sa sega ni yalani na veivakalougatataki eda rawata mai vei Karisito.

⁹ Me'u vakaraitaka talega vei ira na tamata kecega na kena vakayacori na i naki ka vunia tu mai na i vakatekivu na Kalou, o koya sa bulia na ka kecega.

¹⁰ Ena qai vakayagataka na Kalou na i soqosoqo lotu me vakaraitaka vei ira sa kaukauwa ka veiliutaki ena veiyasana vakalomalagi ni sa ka levu sara na vuku ni Kalou ena kena veimataqali eso.

¹¹ Sa sala vata oqori kei na i naki tawamudu sa mai vakayacori ena vuku i Karisito Jisu na noda Turaga.

¹² Na noda tu vata kei Karisito kei na noda vakabauti koya sa solia vei keda na doudou me da torovi koya kina na Kalou ena yalo galala kei na lomadei.

¹³ Au sa vakamasuti kemuni kina mo ni kakua ni yalolailai baleta ni'u sa sota kaya tiko na veika rarawa ena vukumuni; ni sa yaga sara vei kemuni na veika oqo.

Na Loloma i Karisito

¹⁴ Ena vuku ni ka oqo ka'u sa tekiduru kina vua na Tamada,

¹⁵ o koya ka sa solia vei ira na veivuvale kecega mai lomalagi kei vuravura na yacadra dina.

¹⁶ Au sa kerea vua na Kalou, me vaka ni sa vutuniyau ena veika lagilagi, me solia o koya vei kemuni na kaukauwa sa mai vua na Yalo Tabu me vakaukauwataki kina na tamata-e-loma ni tamata vakayadua,

¹⁷ ka me tiko ena lomamuni na Karisito ena vakabauta, me tubu kina na wakamuni ka tauyavutaki ena loloma.

¹⁸ Sa noqu masu mo ni na vakaiyaragitaki vata kei ira na tamata ni Kalou kecega mo ni kila rawa na kena raraba, na balavu, na cecere kei na titobu ni loloma i Karisito.

¹⁹ Io, mo ni kila rawa talega kina na nona loloma, ka dina ga ni sa dredre sara me kilai taucoko sara, ka mo ni qai vakasinaiti kina ena i tovo ni Kalou.

²⁰ Ia kivei koya sa vakayacora rawa ena vukuda na veika lelevu cake sara mai na veika eda kerea rawa ena vuku ni nona kaukauwa sa cakacaka yaco ena lomada:

²¹ me ia ga vua na Kalou na vakarokoroko ena vuku ni soqosoqo lotu kei na vuku i Karisito Jisu ena veitabatamata kecega, ka sega ni mudu. Emeni.