Dauvunau 9 - Vakavakadewa Vou kei na iVola tale eso

Tautauvata na i Cavacava ni Tamata Kecega

¹ Au sa vakasamataka sara vakavinaka vakabalavu na ka kece oqo ka'u sa qai raica ni sa lewa na Kalou na nodra cakacaka na tamata yalododonu. Sa vakakina na nodra loloma kei na nodra veicati. Sa sega sara ni dua na tamata e kila na ka e waraki koya mai muri.

² Sa sega na kena duidui. Sa tautauvata ga na ka ca sa yacovi ira na yalododonu kei ira na i valavala ca, vei ira na vinaka kei ira era ca, vei ira era lotu kei ira era sega ni lotu, vei ira era dau qarava na Kalou kei ira era sega ni dau qarava na Kalou. Sa sega ni uasivi cake na tamata vinaka mai na tamata i valavala ca, sa sega talega ni uasivi cake o koya sa bubului vei koya sa sega ni bubului.

³ Sa dua na ka ca sa yaco vei ira kecega, ka sa cala na ka oqo me vaka na kena cala na ka kecega sa yaco e vuravura. Sa sinai na vakasama ni tamata ena gauna kecega sa bula kina ena veika ca kei na veika lialia, ka ra mai mate yani vakasauri.

⁴ Ia o koya e sa bula tiko ena nodra vuravura sa bula tu eso na nodra i nuinui; e vinaka e dua na koli bula mai na dua na laione mate.

⁵ O ira era sa bula era kila tiko ni ra na mate, ia o ira na mate era sa sega ni kila e dua na ka, sa sega tale na ka me ra na saumi kina ka ra sa na sega tale ni nanumi tiko.

⁶ Era sa mate vata yani kei na nodra loloma, nodra veicati kei na nodra vuvu. Era sa na sega tale ni vakaitavi ena dua na ka e caka e vuravura oqo.

⁷ Ia mo lako ga ka kania na kemu kakana ena marau ka gunuva na memu waini ena reki. Sa vinaka oqo vua na Kalou.

⁸ Dau daramaka tikoga na i sulu vulavula ena veigauna kece ka me kakua ni mamaca na i lumu mai na ulumu.

⁹ Marautaka na bula oqo kei na watimu o domona ena gauna taucoko sara o bula voli kina ena bula sega na kena yaga e solia vei iko na Kalou ena vuravura oqo. Marautaka na kena veisiga yadua e sega ni dua na kena yaga baleta ni sai koya kecega oqori na ka o rawata me baleta na nomu leqa.

¹⁰ Mo cakava ena nomu i gu na veika kece sara o qarava, baleta ni sa sega na cakacaka, se na vakasama se na kila-ka, se na vuku ena nodra vanua na mate o sa lako tiko kina.

¹¹ Au sa qai raica tale ni ra sega ni dau liu tu ga ena veitau cici e vuravura oqo na daucici, ka ra sega talega ni dau qaqa tu ga ena valu na tamata qaqa. E sega talega ni dau levu na nodra i yau na tamata kila-ka, ka ra sega ni dau toso cake ki na veitutu cecere na tamata nuitaki ka rawa ka. Ia sa dau yaco ga na kalougata ki na tamata yadua.

¹² O na sega ni kila na yaco mai ni nomu gauna me vaka na manumanu vuka e coko vakasauri ena dai, ka vaka na ika e coko ena lawa, eda dau coko talega ena so na gauna ca eda sega ni namaka kina.

Vakanananu me Baleta na Yalomatua kei na Yalowai

¹³ Au a raica talega e vuravura oqo e dua na i vakaraitaki ni yalomatua.

¹⁴ E dua na koro lailai ka sega ni levu kina na tamata. A mai kabata e dua na tui. Sa tuva wavoki na nona mataivalu ka vakarau me ravuravu.

¹⁵ E tiko e kea e dua na tamata dravudravua ia sa tamata vuku ka sega sara ni bau dua e nanumi koya.

¹⁶ Au dau kaya tikoga ni uasivi cake na yalomatua mai na kaukauwa, ia sa sega ni dua me nanuma me dua na tamata dravudravua e tamata vuku se me dua e via rogoca na ka e tukuna.

¹⁷ E uasivi cake me da vakarogoca na vosa malumu ni tamata vuku mai na nona vosa vakadomoilevu e dua na tui ena nodra matabose na yalowai.

¹⁸ E levu cake na ka e rawa ni cakava o yalomatua mai na i yaragi, ia e dua na tamata cala sa rawa ni vakacacana e vuqa na ka vinaka.