Dauvunau 7 - Vakavakadewa Vou kei na iVola tale eso

Veivakasama Eso me Baleta na Bula

¹ Sa uasivi cake na yaca e rogo vinaka mai na waiwai boi vinaka sara, ka sa vinaka cake na siga o mate kina mai na siga o sucu kina.

² Sa uasivi cake me da lako ki na dua na vale e caka tiko kina na vakaloloku, mai na vale e caka tiko kina na kana magiti baleta ni na rawa me ra vakasamataka kina na tamata era bula tiko ni sa waraki keda kece tu ga na mate.

³ Sa uasivi cake na tagi mai na dredre; ena rarawa kina na kemu i rairai, ia sa na vukea na nomu vakasama.

⁴ Na tamata lialia sa dau vakasamataka voli ga na marau. Na tamata vuku sa dau vakasamataka na mate.

⁵ Sa uasivi cake na nona vunauci iko e dua na tamata vuku mai na nona vakalevulevui iko e dua na tamata lialia.

⁶ Ni dredre e dua na tamata lialia sa vaka na calidi ni veivoto ni kau sa kama ena buka. Sa sega na kena i balebale.

⁷ Sa vaka na i vukivuki ni tamata lialia e dua na tamata vuku ena gauna sa vakaisina kina e dua na tamata. Ni o taura na ka o saumi kina mo cakava na ka ca sa na vakacacana na nomu i vakarau.

⁸ Sa uasivi cake na i tinitini ni ka mai na i vakatekivu ni ka. Sa uasivi cake na dauvosota mai na dokadoka.

⁹ Mo tarova na yalomu katakata, sa ka lialia mo maroroya na yalo ca.

¹⁰ Kakua sara ni taroga, Na cava e vinaka cake kina na veika sa yaco ena veigauna sa oti? Sa sega ni taro vakayalo matua.

¹¹ Na tamata kece sara e bula sa dodonu me vuku, sa vinaka sara me vaka na noda rawata e dua na i votavota,

¹² ka na rawa ni solia vei iko eso na veivakadeitaki me vaka e dau rawa mai na i lavo. Na vuku ena taqomaki iko sai koya o ya na yaga ni kila-ka.

¹³ Vakasamataka mada na veika sa cakava na Kalou. E rawa vakacava vua e dua na tamata me vakadodonutaka na ka sa vakavevea na Kalou?

¹⁴ Mo marau ena gauna e daumaka tu kina na veika kece me baleti iko, ia ena gauna sa yaco mai kina na leqa mo nanuma ni Kalou sa vakavuna ruarua na leqa kei na marau; o sega ni kila na cava tale ena yaco tarava mai.

¹⁵ Sa sega na kena yaga na noqu bula, ia au sa raica kina na ka kecega. Sa na mate beka e dua na tamata yalododonu, ka bula tikoga mai e dua na tamata i valavala ca.

¹⁶ Mo kakua ni yalododonu sara se mo vuku sara. Na cava mo vakarusai iko kina?

¹⁷ Ia mo kakua ni valavala ca sara vakalevu se rui lialia sara. Na cava mo mate dole kina ni sa bera nomu gauna?

¹⁸ E vinaka mo kakua ni sivia e dua vei rau kevaka o rerevaka na Kalou o sa na toso cake sara.

¹⁹ E levu na ka e rawa ni cakava na vuku vua e dua na tamata mai na ka e rawa ni ratou cakava e lewe tini na i liuliu me baleta e dua na koro.

²⁰ Sa sega ni dua na tamata e vuravura me cakava ga na ka dodonu ena veigauna kece ka me sega ni cakava e dua na ka e cala.

²¹ Kakua ni vakarogoca kece na veika era kaya na tamata, de o na rogoca na nomu dauveiqaravi ni vosa vakacacataki iko.

²² Ia o iko talega o sa kila ni o sa dau vosa vakacacani ira vakavuqa na tani.

²³ Au sa gadreva me'u vuku, ia au sa sega ni yacova rawa.

²⁴ E rawa vakacava me dua e kunea na i balebale ni bula? Sa rui titobu ka sega ni rawa me da kila.

²⁵ Ia au sa vagolea na noqu bula ki na kila-ka vata kei na vuli; au sa nakita me'u kunea na vuku kei na i sau eso ni noqu taro ka me'u kila na ca kei na sesewa ni lialia.

²⁶ Au sa qai raica ni dua na ka e gaga cake mai na mate o ya na nona i tovo e dua na yalewa. Na dodomo ena cakava vei iko e vaka e dua na dai sa vaka e dua na lawa; na ligana e vaka e dua na sinucodo ni mokoti iko. Na tamata sa lomana na Kalou ena rawa ni dro tani mai vua, ia ena vesuka na tamata ca o koya.

²⁷ A sa kaya na Dauvunau, au sa raica mai vakalalai na ka oqo ena noqu vaqara na i sau ni noqu taro eso.

²⁸ Au a vaqara talega na i sau ni taro tani tale eso ka'u sa sega ni kunea e dua na ka. Au sa raica e dua na tagane mai na vei yadua na udolu me'u rawa ni doka, ia au sega ni kunea rawa e dua na yalewa.

²⁹ Sa i koya oqo na ka au kunea, a bulia na tamata na Kalou me rawarawa ga, ia eda sa qai cakava me da dredre ka vereverea sara.