Dauvunau 5 - Vakavakadewa Vou kei na iVola tale eso

Me Kua na Yalayala Totolo

¹ Qarauna vinaka na nomu i lakolako ki na vale ni Kalou. E vinaka cake mo la'ki vuli e kea mai na kena vakacabori na i soro eso me vaka era dau vakayacora na tamata lialia, ni ra sega ni kila na ka dodonu mai na ka e sega ni dodonu.

² Mo dau vakasama mada e liu ni bera ni o vosa, ka kakua ni cakava e dua na vosa ni yalayala vua na Kalou ena nomu vakusakusa. Sa tiko o koya mai lomalagi, ia o sa tiko ga e vuravura, ia me kakua ni sivia na ka o tukuna.

³ Na levu ga ni nomu lomaocaoca na kena rawa talega mo tadra eso na tadra ca, kei na levu ga ni nomu vosa na kena voleka na nomu cavuta eso na ka lialia.

⁴ Ni o sa yalataka e dua na ka vua na Kalou, ia mo kakua ni lokuyara mo vakayacora. Sa sega ni taleitaki ira na lialia o koya. Cakava na ka o sa yalayala kina.

⁵ E uasivi cake mo kakua sara ga ni yalataka e dua na ka mai na nomu yalataka e dua na ka, o qai sega ni cakava.

⁶ Kakua ni laiva na nomu vosa me vakavuna na nomu i valavala ca, mo qai kaya kina vua na bete ni Kalou ni o a sega ni nakita na ka o a tukuna. Na cava mo vakacudruya kina na Kalou? Na cava o vakavuna kina me vakarusa na veika o cakava?

⁷ Veitalia ga na veika kece o tadra, na nomu cakacaka kecega e sega na kena yaga kei na nomu vosa e vuqa, sa dodonu mo rerevaka tikoga na Kalou.

Na Bula e Sega na Betena

⁸ Kakua ni kurabui ni o raica ni sa vakasaurarataki ira na dravudravua na matanitu ka cakitaka vei ira na lewa dodonu kei na nodra dodonu. Na tamata vakailesilesi yadua sa taqomaki koya o koya sa liu cake vua ka sa taqomaki rau ruarua o ira era sa cecere cake.

⁹ Sa vakararavi sara talega e dua na tui ki na vua ni qele.

¹⁰ O koya sa dau lomana na i lavo ena sega ni mamau rawa na yalona, kevaka o gadreva mo vutuniyau o na sega ga ni rawata kece na veika o gadreva. Sa sega ga na kena yaga.

¹¹ Na levu ga ni nomu i yau na kena levu cake talega na gusu mo vakania. Na ka wale ga o rawata sai koya na nomu sa kila ni o sa vutuniyau.

¹² E dua na tamata cakacaka ena rawa ni tu se sega ni tu vua na ka me kania, ia ena rawa ga me moce vinaka ena bogi. Ia na tamata vutuniyau, e dina ni sa levu na ka e tu vua, ena sega ni moce rawa ena nona nuiqawaqawa.

¹³ Sa i koya oqo e dua na ka rerevaki au raica ena vuravura oqo era sa dau maroroya na tamata na nodra i lavo ka qai vakayagataka ena gauna era qai vinakata kina,

¹⁴ ka ra qai vakayagataka kece sara ena ka e sega ni nakiti ka sa sega tale na ka e vo me ra na qai solia me nodra na luvedra.

¹⁵ Me vaka eda a lako luvaiwale mai ki na vuravura oqo, eda na lako luvaiwale tale yani ka na sega sara ni dua na ka eda na kauta rawa tani yani, veitalia sara ga na levu ni ka eda rawata.

¹⁶ Oqo e dua talega na ka ca. Eda na lako tale yani me vaka ga na noda a lako mai. Eda cakacaka ka tovolea me da vesuka rawa na cagi, ia na cava li eda bau rawata?

¹⁷ Ia eda na bula ga ena butobuto kei na rarawa, loma ocaoca, vakaloloma ka mate.

¹⁸ Sa i koya oqo na ka au sa kunea rawa: na ka uasivi duadua e rawa me cakava e dua na tamata sai koya me kana ka gunu ka marautaka na ka e cakava rawa ena gauna lekaleka ni nona bula sa solia vua na Kalou; sai koya oqo na nona i votavota sa solia vua na Kalou.

¹⁹ Kevaka sa solia na Kalou vua e dua na tamata na i yau kei na veika me taukena ka solia talega vua me marautaka sa dodonu talega me vinakata ka marautaka o koya na veika e rawata. Sa i solisoli mai vua na Kalou; sai koya oqo na nona i votavota sa solia vua na Kalou.

²⁰ Sa na solia vua na Kalou me marau ka na sega ni nuiqawaqawataka na lekaleka ni nona bula.