Dauvunau 4 - Vakavakadewa Vou kei na iVola tale eso

Na Veivakalolomataki e Vuravura

¹ Ia au sa qai vakasamataka lesu tale na veika ca kece sa caka tiko e vuravura. Era sa tagi na vakararawataki ka sa sega ni dua e bau via vukei ira. Sa sega ni dua e via vukei ira baleta ni sa tu na kaukauwa vei ira era vakasaurarataki ira.

² Au sa okata me ra vinaka cake o ira era sa mate yani mai vei ira era sa bula tiko.

³ Ia sa uasivi cake sara o ira era sa bera sara ga ni sucu, o ira era sa sega sara ga ni raica na veika ca era yaco tiko e vuravura oqo.

⁴ Au sa kila talega na ka era sa cakacaka vakaukauwa kina na tamata me ra rawa ka: na vuna ga sai koya na nodra gadreva me levu cake na ka e tu vei ira mai na ka era rawata na tani. Ia sa sega talega na kena yaga. Sa vaka ga na via vesuka na cagi.

⁵ Era kaya ni tamata lialia ga ena roqota tiko na ligana ka laiva me viakana tu me yacova ni sa mate.

⁶ Ia sa uasivi cake me lailai na ka e tu vei keda, ka tu vata kei na yalo vakacegu, ka ca na kena levu na ka e tu vei keda, ka sala vata kei na loma ocaoca, e vaka na via vesuka na cagi.

⁷ Ia au sa raica talega e dua na ka e sega na kena yaga ena vuravura oqo.

⁸ E dua na tamata e tu taudua voli ga. E sega ni bau dua na luvena se dua na tacina, ia sa cakacaka tikoga ka sa sega ni mamau rawa na yalona ena i yau sa tu vua. Sa cakacaka vakaukauwa ena vuku i cei o koya ka sa vakuai koya kina mai na marau? Sa sega talega na kena yaga na ka oqo ka sa dua na i vakarau ni bula vakaloloma.

⁹ Sa uasivi cake na lewe rua mai na lewe dua ni sa levu cake na ka e rau rawata mai na nodrau cakacaka.

¹⁰ Kevaka e dua vei rau e bale ena vakaturi koya cake o koya ka dua. Ia kevaka sa bale e dua na tamata e cakacaka taudua tiko sa na sega ni dua me vakaturi koya tale.

¹¹ Kevaka e batabata na vanua, e rau na davo vata na lewe rua ena rawa me rau katakata, ia ena rawa vakacava me na katakata o koya ka davo duadua ga?

¹² E lewe rua sa na rawa me rau vorata na veivakacacani e rawa me vakadruka e dua na tamata. Na dali sa qali tolu sa dredre sara ni cavuka.

¹³ Sa vinaka cake e dua na cauravou gone dravudravua mai vua e dua na tui sa qase ka lialia ka sega ni via rogoca na i vakasala.

¹⁴ Sa na rawa vua na cauravou o ya e suka mai na vale ni veivesu me na la'ki yaco sara me tui, se sucu dravudravua ena vanua sa yaco kina oqo me kena tui.

¹⁵ Au sa qai vakasamataki ira kece na tamata era bula e vuravura oqo, au sa qai vakasamataka ni tiko kei ira e dua na cauravou ena yaco me tui.

¹⁶ Ena sega beka na i yalayala ni levu ni tamata me na liutaki ira e dua na tui; ia ni sa na takali yani o koya ena sega ni dua e marautaka na veika e cakava. Sa sega ga na kena yaga ka sa vaka na via vesu cagi.