Dauvunau 2 - Vakavakadewa Vou kei na iVola tale eso

Sa Sega ni Vakaibalebale na Marau

¹ Au sa qai nakita me'u vakamarautaki au ka me'u raica sara mada se cava sara mada na marau. Ia au sa qai raica ni sa ka e sega ni vakaibalebale talega na ka oqo.

² Au sa qai kunea talega ni ka lialia na dredre, ka sega ni solia e dua na ka vinaka na marau.

³ Sa qai vakauqeti au voli na noqu gadreva na vuku, au sa qai nakita me'u vakamarautaki au ena waini. Au a nanuma ni sai koya oqo na ka uasivi duadua e rawa ni cakava na tamata ena nona bula lekaleka ena vuravura oqo.

⁴ Au sa qarava rawa eso na ka lelevu. Au sa tara oti na noqu veivale ka tea eso na noqu loganivaini.

⁵ Au tea eso na noqu i teitei kei na i teitei ni vuanikau ka tea kina na veimataqali kau vuata kecega.

⁶ Au sa qai kelia eso na i keliwai me ra vakasuasuataki kina na noqu i teitei.

⁷ Au sa qai volia eso na bobula, ka so talega na bobula era sucu ena noqu vale. Sa levu duadua na noqu manumanu mai vei ira kece na tamata era sa bula oti e Jerusalemi.

⁸ Au sa kumuna vata talega me noqu na siliva kei na koula na i vakacavacava mai vei ira na tui era qali tu ki na noqu vanua. Era sa dau mai laga sere na tagane kei na yalewa me ra vakamarautaki au, ka bini tu vei au na yalewa kecega e rawa me vinakata e dua na tagane.

⁹ Au a yaco me'u cecere ka cecere duadua vei ira kece era sa bula oti e Jerusalemi, ka sega talega ni takali vei au na noqu vuku.

¹⁰ Na ka kecega au vinakata au rawata. Au sega ni cakitaka ki na noqu bula e dua na mataqali marau. Au sa dau cibitaka na ka kecega au rawata, ka sai koya oqo na kequ i sau.

¹¹ Ia au sa qai vakasamataka na veika kecega au sa cakava kei na kaukauwa ni noqu cakacakataka, ia au sa qai kila ni sega ga na kena i balebale. Au vaka voli ga na vakatobo cagi, sa sega kecega na kena yaga.

¹² Ia e muri au sa qai raica ni dua na tui ena rawa wale ga ni cakava na veika era sa cakava oti na tui e liu. Ia au sa mai tekivu vakasamataka yani se cava na i balebale ni vuku, se na lialia se na sesewa.

¹³ Au sa qai kunea ni vinaka cake na rarama mai na butobuto.

¹⁴ Sa rawa vei ira na vuku me ra raica na vanua me ra lako kina, ia era sa sega ni raica rawa na tamata lialia. Ia au sa kila talega ni sa tautauvata ga na ka dredre era na sotava vata kecega na vuku kei na lialia.

¹⁵ Ia au sa qai vakasamataka e lomaqu, ni ka ena yacovi ira na lialia ena yacovi au talega. Ia na cava mada na kena yaga vei au na noqu vuku? Au a qai kaya, E sega sara ga ni dua na kena yaga vei au.

¹⁶ E sega ni bau dua e nanumi ira na lialia. Eda na guilecavi kecega ena gauna mai muri. Eda na mate vata kecega na vuku kei na lialia.

¹⁷ Na ka oqo sa sega kina ni vakaibalebale vei au na bula baleta ni veika kecega ni bula sa kauta mai vei au na leqa. Sa sega kecega na kena yaga, ka'u sa vaka ga na vakavesuka na cagi.

¹⁸ E sega ni dua na ka au cakacakataka se rawata me vakaibalebale vei au baleta ni'u kila ni'u sa laiva tu ga mai vei koya ena tarovi au,

¹⁹ ka na rawa beka me na vuku o koya ena ka kece au a cakacakataka, na ka kece sa rawata vei au na noqu vuku e vuravura oqo. Na ka kecega oqo sa sega ga na kena yaga.

²⁰ Au sa qai mai veivutunitaka yani na noqu a sa rui cakacaka vakaukauwa.

²¹ O a cakacakataka beka e dua na ka ena nomu vuku taucoko, nomu kila-ka taucoko, kei na nomu maqosa kece sara, ia o na qai laiva tu vei ira eso era sega ni daucakacaka. Sa sega sara ga na kena yaga ka sega ni dodonu.

²² O cakacaka ka nuiqawaqawa ena nomu i lakolako ena bula oqo; na cava li e tu vei iko me vakaraitaka kina?

²³ Na veika kece o cakava ena gauna kece ni nomu bula e sega ni kauta mai e dua na ka, na nuiqawaqawa ga kei na mosi ni yalo. E sega sara mada ga ni vakacegu rawa na yalomu ena bogi. Sa sega kecega na kena yaga.

²⁴ Na ka uasivi duadua e rawa ni cakava e dua na tamata, sai koya me kana, gunu, ka me marautaka na veika e rawata. Ia au sa qai la'ki nanuma ni ka talega oqo e taka mai vua na Kalou.

²⁵ Ia kevaka e sega o koya na cava o na kania se marautaka?

²⁶ Sa solia na Kalou na vuku, na kila-ka kei na marau vei ira sa vinakata. O koya a vakacakacakataki ira na tani me ra rawa ka, ka maroroya, me na rawa ni solia na ka era rawata vei ira tale eso sa vinakata vakalevu cake o koya. Sa sega kecega na kena yaga. Sa vaka ga na vakatobo cagi.