Dauveilewai 9 - Vakavakadewa Vou kei na iVola tale eso

O Apimeleki

¹ A lako o Apimeleki na luve i Kitione tagane ki na koro o Sikemi, na vanua era vakaitikotiko kina na weka i tinana, ka kaya vei ira

² me ra tarogi ira na kai Sikemi, “Na cava o ni vinakata? Me ra liutaki kemuni o ira kece na vitusagavulu na luve i Kitione se me dua ga na tamata? Mo ni nanuma matua ni o Apimeleki e tiki ni yagomuni ka wekamuni dina vakadra.”

³ Era a lako na weka i tinana ka la'ki veivosaki vata kei ira na turaga kei Sikemi me baleti koya, ia era a nanuma kina na turaga kei Sikemi me ra digitaki Apimeleki baleta ni wekadra ga.

⁴ Era a solia vua e vitusagavulu na tiki ni siliva mai na vale tabu i Peali kei na i lavo kece ni veiyalayalati ka ra a vakayagataka me rawa ni ra saumi kina o ira kecega na tamata dauvakacaca me ra tovata kei koya.

⁵ A lako kina o koya ki Ofira ena vale i tamana, ia ena dela ni dua ga na vatu e cake a vakamatei ira kina na vitusagavulu na tacina, o ira na luve i Kitione na tamana. Ia o Jocame, na luve i Kitione ka gone duadua a vunitaki koya ka sega kina ni vakamatei.

⁶ Ia o ira kece na kai Sikemi kei Pecimilo era a vakasoqoni vata ka lako ki na ruku ni vu ni oki tabu mai Sikemi; mai kea era a buli Apimeleki kina me nodra tui.

⁷ Ia ni rogoca o Jocame na veika oqo a lako kina ki na ulunivanua o Qerisimi ka kaci vakadomoilevu ka kaya, “Ni rogoci au mai oi kemuni na kai Sikemi, me rogoci kemuni talega o Jiova.

⁸ Ena dua na siga era a soqoni vata na vunikau me ra digitaka e dua me na nodra tui, era a kaya vua na vuniolive: ‘Mai neimami tui mada,’

⁹ A sauma na vuniolive ka kaya, ‘Kevaka me'u sa na yaco me'u liutaki kemuni, au sa na sega kina ni qai vua tale, au sa na sega talega ni solia rawa na noqu waiwai, me rawa kina ni ra dokai na veikalou kei ira na tamata.’

¹⁰ Era a qai kaya na vunikau vua na vunilolo: ‘Mo lako mai mo neimami tui.’

¹¹ A sa kaya na vunilolo: ‘Kevaka me'u sa na yaco me'u lewai kemuni, sa na qai sega tale ni'u vua ka sa na sega ni rawa vei au me'u solia tiko na vuaqu kamikamica.’

¹² Era a mani kaya na vunikau vua na vunivaini, ‘Vakacava mo sa lako mai mo neimami tui?’

¹³ A sauma na vunivaini ka kaya, ‘Kevaka me'u sa liutaki kemuni, au sa na qai sega ni solia tiko na vuaqu ka sa na sega talega na waini me ra gunuva na veikalou kei ira na tamata me ra na marau kina.’

¹⁴ Era a kaya kece na vunikau vei koya na kau votovotoa ena loma ni veikau: ‘Lako mai mo mai neimami tui.’

¹⁵ A sauma na kau votovotoa ni veikau ka kaya, ‘Kevaka o ni sa gadrevi au dina me'u nomuni tui, ni lako mai mo ni mai vakaruru ena rukuqu. Kevaka e sega ena caudre mai na yameyame ni buka mai na tabaqu votovotoa ka kama kece kina na veikau ni Lepanoni.’ ”

¹⁶ A sa kaya o Jocame: “O ni sa yalodina vakaoti mo ni sa laivi Apimeleki me nomuni tui? O ni sa dokai Kitione li kei na veika sa vakayacora, ka o ni sa cakacaka vakaoqo ki na nona matavuvale, sa dodonu beka na ka o ni sa vakayacora?

¹⁷ Mo ni nanuma oqo, na tamaqu sa vala ena vukumuni. Sa solia na nona bula me vakabulai kemuni mai vei ira na kai Mitiani.

¹⁸ Ia edaidai o ni sa vuki tani mai na matavuvale nei tamaqu. O ni sa vakamatei ira na luvena e vitusagavulu ena dua bulu ga na vatu ena vuku ga i Apimeleki na nona luve ni sala mai vua na nona yalewa dauveiqaravi, o koya sa wekamuni ga ia o ni sa buli koya me tui Sikemi.

¹⁹ Ia kevaka na ka o ni sa vakayacora edaidai vei Kitione kei na nona matavuvale sa cakacaka vakaidina ka dodonu, ia mo ni sa marau ena vuku i Apimeleki ka laivi koya me marau vata kei kemuni.

²⁰ Ia kevaka e sega me sa kama o Apimeleki ka kama vata kei ira na kai Sikemi kei Pacamilo. Me lako sobu mai na bukawaqa ka kani ira na tamata e Sikemi kei Pacamilo ka kama talega kina o Apimeleki.”

²¹ Me vaka ni a rerevaki tuakana, a dro tani yani o Jocame ka la'ki tiko mai Tira.

²² A lewai ira na Isireli o Apimeleki me tolu na yabaki.

²³ A tala e dua na yalo velavela na Kalou me vakavuna na tiko veisei i Apimeleki kei ira na kai Sikemi.

²⁴ Ni yaco na veika oqo vei Apimeleki kei ira na kai Sikemi era a vakayaloqaqataki me ra labati ira na luve i Kitione e lewe vitusagavulu, me saumi kina na nodra caka ca.

²⁵ O koya oqo ena nodra i vakarau kaukauwa vua, era a yadravi koya ena loma ni veikau kei na veiulunivanua; ka ra butakoci ira kecega era lako sivia na nodra i tikotiko; a tukuni vei Apimeleki na veika kece oqo.

²⁶ Ia o Keali na luve i Epeti a lako mai Sikemi vata kei ira na tacina, ia o ira na kai Sikemi era vakararavi vua ka ra vakabauti koya.

²⁷ Era sa qai lako yani ki na veiloganivaini me ra veti qerepi, ka cakava kina na waini me baleta na gauna ni solevu. Era a lako yani ki na nodra vale ni sokalou, era kana, gunu, ka marau vata kina kei Apimeleki.

²⁸ A sa kaya o Keali: “Eda sa mataqali tamata vakacava na kai Sikemi? A cava eda sa mai qaravi Apimeleki tiko kina? O cei sara mada o koya? A luve i Kitione ka sa vakatulewa mai vua o Sepula ka kaya a cava eda sa qaravi koya tiko kina? Mo ni yalodina vua na nomuni qase o Ema, o koya sa tara cake na nomuni yavusa.

²⁹ Au diva wale ga me'u liutaki ira na tamata oqo ka'u sa na vakagalalataki Apimeleki. Au na kaya vua: ‘Vakalevutaki ira na nomu sotia ka lako mai.’ ”

³⁰ Ni rogoca o Sepula na i liuliu ni koro na ka a tukuna o Keali na luve i Epeti, a tubu kina na nona cudru.

³¹ A vakauta yani na i tukutuku vei Apimeleki ki Aruma, ka kaya: “Raica, o Keali na luve i Epeti kei ira na kai nona era a lako mai ki Sikemi ka vakayavalata na koro ena nodra saqati kemuni.

³² O koya oqo, ni lako ena bogi kei na mataivalu sa tiko vei iko ka la'ki davo wawa mai ena buca.

³³ Ena mataka caca ni qai cabe mai na matanisiga, ni mata cake ka cici yani ki na koro, ia ena gauna era na cicivi kemuni mai kina kei na mataivalu ka tiko kaya, mo ni vala vata kei ira ena nomuni kaukauwa taucoko.”

³⁴ O koya oqo a mata cake kina o Apimeleki kei ira na nona mataivalu ena bogi ka waraki Sikemi koto ena va na mataivalu.

³⁵ Ia ena mataka ni lako yani o Keali na luve i Epeti me la'ki tu ena matamata ni koro, a tucake mai o Apimeleki kei ira na nona mataivalu ena vanua era a vuni koto kina.

³⁶ Ia ni raici ira o Keali, a kaya vei Sepuli: “Raica! Era sa siro mai na tamata ena ulunivanua!” A qai kaya vua o Sepuli, “Na i yaloyalo ena ulunivanua era rairai vaka na tamata vei iko.”

³⁷ A vosa tale o Keali ka kaya, “Raica! Era sa lako sobu tiko mai na tamata mai na ulunivanua ka dua tale na i lawalawa sa lako sobu mai na sala vaka ki na vuni oki tabu.”

³⁸ A qai kaya vua o Sepuli, “E vei na nomu bolebole, o a kaya, O cei o Apimeleki me da qaravi koya, o a sega beka ni vosa beca na mataivalu oqo? Mo lako yani ka vala kei ira.”

³⁹ A lako yani o Keali ka liutaki ira na turaga kei Sikemi ka vala kei Apimeleki.

⁴⁰ A druka o Keali ka cici muri koya o Apimeleki ni sa dro. E lewe vuqa era a vuetaki ka yaco sara ki na matamata ni koro.

⁴¹ A mani tiko e Aruma o Apimeleki, ka vakasevi Keali kei ira era a tiko kaya o Sepuli, ka sega ni tiko tale e Sikemi.

⁴² Ena siga ka tarava era a lako yani na tamata ena buca. Ia ni a tukuni vei Apimeleki,

⁴³ a wasei ira vakatolu na nona mataivalu, ka waraki ira ena buca. Ia ni raica ni ra sa vakasavi ka vakamatei ira,

⁴⁴ era a cici yani na sotia kei Apimeleki ka latia na matamata ni koro, ia a rua tale na i lawalawa sotia, era cici yani ena buca ka vakamatei ira na tu kina,

⁴⁵ Ena siga taucoko o ya a valuta tiko kina na nodra koro o Apimeleki, a kovea na koro, vakamatei ira era tiko kina, vakama na koro ka kaburaka kina na masima.

⁴⁶ Ia ni ra rogoca na turaga ni veivale cecere e Sikemi na ka a yaco era a curu yani ki na koro vakabai kaukauwa ena valenisoro i Eliperici.

⁴⁷ A tukuni vei Apimeleki ni o ira na turaga ni veivale cecere e Sikemi era a soqoni vata kece.

⁴⁸ A cabe cake o Apimeleki ki na dela ni vanua o Salamoni kei ira kece na nona mataivalu. A taura e dua na matau ka musuka eso na kau leleka ni tu vata kei na drauna ka biuta ki na usouso ni domona ka tukuna vei ira na nona mataivalu me ra vakayacora vakakina.

⁴⁹ Era a taya vakakina na sotia e yadua na i vau kau leleka ka tu vata kei na drauna; era a muri Apimeleki yani ka binia ena koro bai kaukauwa i Sikemi ka visa. A kama na koro bai kaukauwa i Sikemi kei ira kece era tiko kina, ka rauta ni dua na udolu na tagane kei na yalewa.

⁵⁰ A mani lako yani o Apimeleki ki Tipesi, a sa valuti ira ka vesuka na nodra koro.

⁵¹ Ia e tiko ena loma ni koro e dua na vale kaukauwa sa vakarewa i cake, ka ra a mani dro yani kina na turaga kei na marama ni Tipesi. Era a sogoti ira e loma ka ra cabe cake ki na dela ni vale cecere oqo.

⁵² Ni sa yacova yani na vale sa vakarewa i cake o Apimeleki me valuta, a sa lako sara yani ki na kena katuba me vakama.

⁵³ Ia sa qai viritaka mai e dua na vatu raraba ni samu sila e dua na marama ka tiko ena vale cecere e cake; a sa tau ki na ulu i Apimeleki ka voroka na nona qavokavoka.

⁵⁴ A kaci yani vakatotolo o Apimeleki vua na nona cauravou dautauri sasabai, ka kaya vua: “Ucuna na nomu i seleiwau ka vakamatei au, me kakua kina ni tukuni ni a vakamatei au e dua na yalewa.” A sa ucuna na nona i seleiwau na cauravou ka suaki koya, ka sa mani mate kina.

⁵⁵ Ni ra raica na Isireli ni sa mate o Apimeleki era a dui lesu ki na nodra veivale.

⁵⁶ A sauma votu na Kalou na i valavala kaukauwa sa vakayacora o Apimeleki vua na tamana ena nona vakamatei ira na lewe 70 na tuakana kei na tacina.

⁵⁷ A sauma na Kalou na nodra i valavala ca kece na kai Sikemi me lutuki ira tale. A sa yacovi ira na cudru i Jocame na luve i Jerupeali.