Dauveilewai 6 - Vakavakadewa Vou kei na iVola tale eso

O Kitione

¹ Era sa vakayacora tale na Isireli na i valavala ca ena mata i Jiova, ka sa vakavuna kina me vakatara o Jiova me liutaki ira o ira na kai Mitiani me vitu na yabaki.

² O ira na kai Mitiani sa kaukauwa cake mai vei ira na Isireli. Ena vuku ni ka oqo, era na vakarautaka kina na Isireli na veivanua eso me ra vuni kina mai na veiulunivanua, ena loma ni veiqara, kei na veikoro ni valu.

³ Ena gauna era kaburaka kina na nodra i tei na Isireli, era na soqoni ira vata mai na Amalekaiti kei ira na i taukei ni vanua lala o ira na kai Mitiani me ra valuti ira.

⁴ Era na dau tara keba ena vanua voleka ka vakacacana na nodra i teitei me la'ki yaco ki Qasa.

⁵ Era dau lako mai kei na nodra manumanu kei na nodra valelaca me vavaku vaka na vodre. O ira kei na nodra kameli sa lewe levu ka sega ni wiliki rawa. Era sa lako mai ka vakacacana na qele.

⁶ Era sa vakadravudravuataki vakalevu o ira na Isireli mai vei ira na kai Mitiani.

⁷ Era sa tagi vei Jiova o ira na Isireli ena vukudra na kai Mitiani,

⁸ sa qai tala yani o Jiova e dua na parofita ki vei ira, ka tukuna vei ira na i tukutuku oqo i Jiova na Kalou ni Isireli: “Au a liutaki kemuni mai Ijipita, ka kauti kemuni tani mai na vale ni veivakabobulataki.

⁹ Au a vakabulai kemuni mai vei ira na kai Ijipita kei ira na tamata era veivala kei kemuni ena vanua oqo. Au a vakasevi ira tani mai na matamuni, ka solia vei kemuni na nodra vanua.

¹⁰ Au a tukuna vei kemuni ni sai au o Jiova na nomuni Kalou, ka mo ni kakua ni qaravi ira na nodra kalou na Amoraiti, a nodra vanua o ni sa tiko kina. Ia o ni sa sega ga ni via vakarorogo ki na noqu vosa.”

¹¹ Sa qai lako mai na agilosi i Jiova ki na koro o Ofira ka dabe sobu ena ruku ni vunioki nei Joasa, e dua na turaga mai na mataqali i Episeri. Na luvei Joasa o Kitione sa samu witi lo toka ena dua na tikina sa daucaka kina na waini, ni sa vunia oqo mai vei ira na kai Mitiani.

¹² A rairai vua mai kea na agilosi i Jiova ka tukuna, “Sa tiko vata kei iko o Jiova, o iko na tamata kaukauwa ka qaqa!”

¹³ Sa qai tukuna vua o Kitione, “Ia mo ni rogoca saka mada oqo: Kevaka sa tiko vata kei keimami o Jiova, a cava beka na vuna e se yacovi keimami tikoga kina na ka kecega oqo? Sa evei beka na nona cakacaka cecere era dau talanoataka vei keimami o ira na neimami qase, ni ra tukuna, ‘Sa sega li ni kauti keda tani mai Ijipita o Jiova?’ Ia ena gauna oqo, sa biuti keimami o Jiova ka soli keimami yani vei ira na kai Mitiani.”

¹⁴ Sa qai vuki vua ko Jiova ka tukuna, “Mo lako ena nomu kaukauwa taucoko ka vakabulai ira na Isireli mai na ligadra na kai Mitiani. O au vakataki au sa talaki iko yani.”

¹⁵ A sauma lesu o Kitione, “Isa lei kemuni na Turaga, ena rawa li vakacava vei au me'u vakabulai ira na Isireli? Na noqu mataqali e mataqali malumalumu duadua ena yavusa o Manasa, ia o au talega oqo na i otioti ni tamata nuitaki mai na noqu vuvale.”

¹⁶ A vosa lesu o Jiova, “Sa rawa vei iko mo vakayacora na ka oqo baleta ni'u na vukei iko kina. O na vakarusai ira na kai Mitiani me vaka era le dua bau ga na tamata.”

¹⁷ Sa qai tukuna o Kitione, “Kevaka au sa kune loloma e matamuni, mo ni solia mada mai vei au eso na i vakadinadina ni sai kemuni ga o Jiova ka vosa tiko vei au.

¹⁸ Au kerea mo ni se tei toka mada ga eke, ka me'u la'ki kauta mada mai e dua na kakana me vakacabori.” A sa kaya o koya, “Au na tiko ga me yacova na nomu lesu tale mai.”

¹⁹ A sa lako ki na nona vale o Kitione me vakarautaka e dua na luve ni me ka vakayagataka e tini na kilokaramu na valawa me bulia kina na madrai sa sega ni vakaleveni. Sa biuta na lewe ni manumanu mamaca ki na loma ni sova ka tawana na kena su ki na kuro, a sa kauta yani ki na ruku ni vunioki ka solia vua na agilosi i Jiova.

²⁰ Sa qai vakaroti koya na agilosi, “Mo biuta ena dela ni vatu oqo na lewe ni manumanu kei na madrai, ka sova na kena su e deladrau ruarua.” A sa kitaka vakakina o Kitione.

²¹ A sa dulaka yani na agilosi i Jiova na titoko e taura tiko e ligana me la'ki tara na mua ni titoko na lewe ni manumanu kei na madrai. A sa caudre mai na bukawaqa mai na vatu ka vakama na lewe ni manumanu kei na madrai. A sa yali tale yani vakasauri na agilosi.

²² Sa qai kila o Kitione ni sai koya na agilosi i Jiova ka sa raica, sa tukuna na vosa oqo ena rere, “Turaga na Kalou, ni vukei au mada! Ni'u sa qai raica dina e mataqu na agilosi i Jiova.”

²³ Ia sa tukuna vua o Jiova, “Mo yalo vakacegu! Kua ni rere. O na sega ni mate.”

²⁴ Sa qai bulia e dua na i cabocabonisoro mai kea o Kitione ka vakatoka o Jiova salomi. Me yacova sara mai na siga edaidai, e se duri tu ga na i cabocabonisoro oqo mai Ofire, ka nodra vanua na luve i Episeri.

²⁵ Ena bogi o ya, sa qai tukuna o Jiova vei Kitione, “Mo kauta na bulumakau tagane nei tamamu vata kei na dua tale na bulumakau tagane sa yabaki vitu, ka talaraka sobu na i cabocabonisoro nei tamamu vei Peali, ka taya laivi na i vakatakarakara ni kalou yalewa o Asera ka ravi tu e yasana.

²⁶ Mo tara vakamatau sara e dua na i cabocabonisoro vei Jiova na nomu Kalou ena dela ni vanua cecere oqo. Mo qai taura na i karua ni bulumakau tagane ka vakacabora me i soro kama, ka mo vakayagataka na veitikina lalai ni kalou yalewa o Asera o sa taya laivi me kena buka.”

²⁷ Sa vakayacora o Kitione na veika oqo sa lesia vua o Jiova kei iratou e lewe tini na nona tamata. Sa tuburi koya vakalevu na yalo e rerevaki ira na wekana voleka kei ira na lewe ni koro kevaka e vakayacora na ka oqo ena siga, a sa mani kitaka kina ena bogi.

²⁸ Ni ra yadra cake mai ena mataka caca ni siga e tarava o ira na lewe ni koro, era sa raica ni sa talaraki sobu tu na i cabocabonisoro i Peali kei na i vakatakarakara ni kalou yalewa o Asera, ka sa cabori tu na i karua ni bulumakau tagane ena dela ni cabocabonisoro sa qai tara vou.

²⁹ Era sa veitarogitaka vakai ira, “O cei sa cakava na ka oqo?” Ni oti na nodra veivaqaqai, sa tukuni vei ira, “O Kitione na luve i Joasa sa kitaka na ka oqo.”

³⁰ Era sa tukuna yani vei Joasa o ira na lewe ni koro, “Mo kauta mada mai luvemu, me keimami vakamatea, baleta ni o koya sa talaraka sobu na i cabocabonisoro i Peali ka musuka laivi na i vakatakarakara i Asera na kalou yalewa ka toka e yasana.”

³¹ Ia sa qai vosa o Joasa vei ira taucoko sara na tamata era vosa vakaviavialevu vua, ka tukuna, “Dou sa vosa tiko beka li ena vukui Peali? E rairai dou sa taqomaki koya tiko li? Kevaka e dua na tamata e totaki Peali, ena vakamatei ni se bera ni kida na mataka. Ke sa kalou o Peali, laivi koya me taqomaki koya ga vakai koya. Na i cabocabonisoro sa talaraki sobu oqo e nei Peali.”

³² Mai na siga o ya, sa kilai o Kitione ena yaca o Jerupeali, ena vuku ni vosa e tauca o Joasa ni a tukuna, “Laivi Peali me taqomaki koya ga vakai koya; e nona i cabocabonisoro ka talaraki sobu.”

³³ Era sa soqoni vata kece mai o ira na kai Mitiani, o ira na Amalekaiti, kei ira na yavusa tamata ni vanua lala me ra kosova na Joritani, ka la'ki tiko ena buca o Jesireli.

³⁴ A sa curumi Kitione na yalo i Jiova ka liutaki koya; ka sa uvuca na davui me kacivi ira kina luvei Episeri me ra muri koya.

³⁵ Sa talai ira yani na tamata me ra kauta na nona i tukutuku vei ira na mataqali Manasa me ra muri koya. Sa vakadewa i tukutuku talega vei ira na mataqali Aseri, Sevuloni, kei Navitalai; era sa lako mai me ra sota.

³⁶ Sa tukuna vei Jiova o Kitione, “Ena noqu via vakadinadinataka na nomuni vakarau vakabulai ira na Isireli ena ligaqu, me vaka o ni a kaya,

³⁷ mo ni raica ni'u na biuta koto eso na vutinisipi sa koti ena vanua ni qaqi witi. Kevaka e suasua wale ga na vutinisipi mai na tegu ni mataka ka sega ni suasua na qele e yasana, au sa na qai vakadeitaka kina na nomuni veivakayagataki ki na noqu bula ena nodra vakabulai na Isireli.”

³⁸ A sa yaco me vakakina. Ena gauna e sou yani kina ena mataka ka tarava o Kitione, sa qumia na vutinisipi ka lobaka na tegu mai na vutinisipi, a sa sinai kina e dua na beseni wai.

³⁹ Sa qai tukuna vei Jiova o Kitione, “Mo ni kakua mada ni cudruvi au, ka me'u tukuna tale mada e dua na ka oqo. Au kerea me dua tale na i vakadinadina mai na vutinisipi; o ya me na mamaca na vutinisipi ka suasua na qele.

⁴⁰ A sa cakava vakakina na Kalou ena bogi o ya: ni sa mamaca na vutinisipi ka sa no ena qele taucoko na tegu.