Dauveilewai 4 - Vakavakadewa Vou kei na iVola tale eso

O Tepora kei Baraki

¹ Era a qai vakayacora tale na Isireli na veika ca ka vakasisila ena mata i Jiova ni sa mate o Eute.

² O koya oqo sa soli ira kina o Jiova ki na liga i tui Japini mai Kenani ka lewai Asori; na i liuliu ni nona mataivalu o Sisera ka vakaitikotiko mai Eroseciaqoimi.

³ Era sa tagi vei Jiova na Isireli me ra vukei; ka ni sa taukena tu o Japini e ciwa na drau na kareti kaukamea, ka sa vakalolomataki ira na Isireli ena i vakarau kaukauwa me ruasagavulu na yabaki.

⁴ Ena gauna o ya, a sa dua na parofita yalewa, o Tepora na wati Lapitoci sa dau vakatulewa tiko vei ira na Isireli.

⁵ A sa dau dabe o koya ena ruku ni vuniniu i Tepora mai Rama ki Peceli ena veidelana mai Ifereimi, ka ra dau lako yani vua na Isireli me vakatulewa vei ira.

⁶ Ena dua na siga sa talatala yani o koya vei Baraki na luve i Apinoami mai na koro o Ketesi e Navitalai ka kaya vua, “O Jiova na nodra Kalou na Isireli sa solia vei iko na i vakaro oqo, ‘Mo kauta e 10,000 na mataivalu mai na mataqali o Navitalai kei Sevuloni ka liutaki ira sobu mai na ulunivanua o Tepori.

⁷ Au na kauti Sisera sobu yani na turaganivalu nei Japini, me vala kei iko ena uciwai o Kisoni. Sa na lako yani o koya vata kei na nona qiqi ni valu kei na sotia, ia au na solia vei iko na qaqa.’ ”

⁸ Sa qai sauma o Baraki ka kaya, “Au na lako wale ga kevaka o lako vata kei au, ia kevaka o na sega ni lako vata kei au, au na sega ni lako.”

⁹ Sa qai sauma o koya ka kaya, “Sa vinaka, au na lako vata kei iko, ia o na sega ni rogo ena i valu, baleta o Jiova ena soli Sisera ki na ligana e dua na yalewa.” A lako yani o Tepora vata kei Baraki ki Ketesi.

¹⁰ A sa kacivi ira na tamata i valu na Sevuloni kei Navitalai o Baraki i Ketesi; ka lewe 10,000 na tamata i valu era muri koya. A lako vata kei koya o Tepora.

¹¹ Ena gauna o ya o Eperi na Kenaiti sa lako tani mai vei ira na vo ni Kenaiti, o ya na kawa i Opapi na vugoi Mosese ka la'ki vakaitikotiko vakayawa e Elonipisanenimi volekati Ketesi.

¹² Ni tukuni vei Sisera ni sa lako cake o Baraki na luve i Epinoami ki na ulunivanua o Tepori,

¹³ Sa vakasoqoni ira vata na nona qiqi ni valu kaukamea e ciwa na drau, kei ira na nona tamata i valu, ka vakatalai ira yani ki na vanua o Eroseciaqoimi na nodra vanua na kai tani vaka ki na uciwai o Kisoni.

¹⁴ A sa kaya o Tepora vei Baraki, “Mo lako, ka na liutaki iko o Jiova edaidai ka na solia vei iko mo qaqa vei Sisera.” O koya oqo sa sobu kina o Baraki mai na ulunivanua o Tepori vata kei na 10,000 na nona mataivalu.

¹⁵ Ia ni sa valuti yani o Baraki kei ira na nona mataivalu, sa vakasesei Sisera kei ira kece na nona mataivalu o Jiova; a siro mai na nona qiqi o Sisera ka dro yani e yavana.

¹⁶ Ia o Baraki sa cemuri ira yani na qiqi ni valu kei na tamata i valu ki Eroseciaqoimi; era sa vakamatei kece ena i seleiwau na mataivalu i Sisera; sa sega tale ni dua me vo.

¹⁷ Ena gauna o ya sa dro yani kina o Sisera ka curu ki na valelaca nei Jaeli, na wati Epeli na Kenaiti, ka ni rau sa tiko veisaututaki na tui o Japini mai Asori vata kei na matavuvale nei Epeli na Kenaiti.

¹⁸ A sa la'ki tavaki Sisera o Jaeli ka kaya, “Ni curu mai, ni curu mai ki na noqu valelaca. Ni kakua ni rere.” A sa curu yani o Sisera, ka sa vunitaki koya o Jaeli ena daku ni latilati.

¹⁹ A sa kaya vua o koya, “Ni yalo vinaka ka solia mada vei au e dua na wai me'u gunu, ka ni'u sa karamaca.” A mani dolava o Jaeli na bola ni wai sa tu kina na sucu, a sa solia vua me gunu, ka qai vunitaki koya tale.

²⁰ A sa kaya vua o Sisera, “Mo duri tu ena mata ni valelaca de mani lako mai e dua ka tarogi iko se e tiko beka li eke e dua na tamata, ia mo kaya ga ni segai.”

²¹ A sa oca vakalevu sara o Sisera ka sa moce lutu. Sa taura e dua na i tuki ni valelaca o Jaeli vata kei na kena i vako ka lako lo yani ki na vanua sa davo koto kina. A sa vakamatei koya ni sa tukia na uluna ena i vako ni valelaca me curu basika ki na qele.

²² Ia ni sa lako yani o Baraki me vakasaqarai Sisera, a sa lako mai o Jaeli ka tavaki koya ka kaya vua, “Ni lako mada mai ki ke, me'u tei vakaraitaka mada vei kemuni na tamata o ni sa vaqara tiko.” A sa lako yani kina o koya ki loma ka kunea ni sa davo matemate koto o Sisera, ka coba tu na i vako ni valelaca ena nona qavokavoka.

²³ Ena siga o ya, a sa solia kina o Jiova vei ira na Isireli na qaqa vei Japini na tui Kenani.

²⁴ A sa kaukauwa cake tikoga na ligadra na Isireli vei Japini na tui Kenani me yacova sara na nodra vakarusai koya vakadua.