Dauveilewai 3 - Vakavakadewa Vou kei na iVola tale eso

Na Vo ni Veimatanitu e Kenani

¹ Oqo na vo ni veimatanitu ena vanua o Kenani ka sa laiva tu o Jiova me ra tu ka vakatovolei ira kina na Isireli ni ra sa sega ni kila na i walewale ni valu.

² O ira ga na i taba Isireli o ya era kila na i walewale ni valu me ra na qai vakavulici ira na sega ni kila.

³ E lima na turaga ni Filisitia kei ira na kai Kenani taucoko, kei ira na Ivaiti, ka ra sa vakaitikotiko ena veiulunivanua e Lepanoni me tekivu mai Ului Peali Erimoni ka yaco sara ki na i curucuru ki Emaci.

⁴ Era sa biu tu oqo me ra vakatovolei kina na Isireli, se ra na talairawarawa tiko li, vakarorogo ka muria na i vakaro i Jiova, ka sa vakaroti ira kina nodra qase mai vei Mosese.

⁵ O koya oqo era sa bula maliwai ira kina na kai Kenani na Itaiti, na Amoraiti, na Perisaiti, na Ivaiti, kei ira talega na Jepusaiti o ira na Isireli;

⁶ Era a kauti ira na luvedra yalewa ka vakawatitaki ira, ia o ira na luvedra yalewa era sa soli ira vei ira na cauravou ni veimatanitu o ya, ka ra yaco me ra qaravi ira talega na nodra kalou.

O Ocenieli

⁷ O ira na Isireli era sai valavala ca ena mata i Jiova, ka ra sa guilecava na nodra Kalou o Jiova, ka qaravi Peali kei Asira.

⁸ Ena vuku ni ka oqo sa waqa kina na cudru i Jiova ka soli ira yani na Isireli vei Kusani-risaceimi na nodra tui na kai Arami (Mesopotemia) ka yaco o ira na Isireli me ra qaravi Kusani-risaceimi me walu na yabaki.

⁹ Ia ni ra sa tagi na Isireli vei Jiova, a vakatubura e dua na dauveisereki o Jiova mai vei ira na Isireli me sereki ira mai vei ira na kai Arami, o ya o Ocenieli na luve i Kenasi, na taci Kelevi.

¹⁰ A sa lako mai na yalo i Jiova ka curumi koya me lewai ira kina na Isireli, sa lako yani ki na i valu ka soli Kusanirisaceimi o Jiova ki ligana, ka yaco me vakadrukai Kusanirisaceimi.

¹¹ O koya oqo era sa tiko vakacegu kina me vasagavulu na yabaki. A sa qai mate o Ocenieli na luve i Kenasi.

O Eute

¹² Era sa vuki tani tale mai vei Jiova na Isireli ka caka ca e matana, ia o Jiova a vakaukauwataka na liga i tui Ekiloni mai Moapi me caka ca vei ira na Isireli baleta ni ra sai valavala ca ena mata i Jiova.

¹³ Ia era a tovata na kai Amoni kei na Amalekaiti ka vakamalumalumutaki ira na Isireli, era a taura na koro ni veiniu me i toki ni valu.

¹⁴ O koya oqo era sa qaravi tui Ekiloni kina e Moapi me tini kawalu na yabaki.

¹⁵ Ia ni ra tagi vei Jiova na Isireli sa qai solia vei ira o koya ena dauveisereki o Eute na luve i Kira, mai na yavusa o Penijamini, a sa mawi o koya. O ira na Isireli era sa vakauta na nodra ka ni veivuke vua na tui Ekiloni mai Moapi.

¹⁶ A cakava e dua na nona i seleiwau bati rua o Eute a sa limasagavulu na senitimita na kena balavu ka vauca na kena i daradara e sagana i matau ena ruku ni nona i sulu.

¹⁷ Sa qai solia vua na tui Ekiloni mai Moapi na nodra ka ni veivuke. Ia o Ekiloni sa dua na tamata levulevu.

¹⁸ Ia ni sa cabora oti o Eute na ka ni veivuke vua na Tui sa qai vakalesui ira yani na tamata era a kauta mai na ka ni veivuke.

¹⁹ Sa qai vuki lesu ki na vatu ceuti volekati Kilikali, ka kaya, “Sa tiko vei au e dua na i tukutuku vuni me baleti kemuni na tui.” O koya oqo a sa kaya kina na tui vei ira na nona tamata me ra tiko lo, ia era a mani lako tani mai vua o ira na nona dauveiqaravi,

²⁰ A sa lako mai vua o Eute, ni sa dabe duadua tiko ena nona tabavale batabata e cake ka kaya, “Au sa kauta tiko mai vei kemuni e dua na i tukutuku mai vua na Kalou.” A sa tucake mai na nona i dabedabe na tui.

²¹ A taura o Eute ena ligana i mawi na nona i seleiwau mai na yasana i matau, ka vakadromuca yani ena kete i Ekiloni.

²² E a dromu vata yani na yamena kei na diana ka sika mai na kena uro ena yame ni seleiwau ka ni a sega ni ucuna lesu mai na i seleiwau e ketena; ka basika mai ki tuba na nona benu.

²³ A curu yani ki tuba o Eute ka sogota na katuba ni tabavale e cake ka sogoti koya e loma.

²⁴ Ia ni lesu yani o koya, era sa lako mai na nona dauveiqaravi. Ni ra sa raica ni sa sogo tu na katuba o ya, era sa nanuma ga ni rairai vakacegui koya tiko na tui e loma ni vale mudremudre.

²⁵ Era sa qai wawa vakadede ka yacova ni ra sa vakasama vakatani de dua na leqa sa yaco. Ia ni sa sega ni dola na katuba ni tabavale e cake, era a taura na kena i dola ka dolava. Era sa raica na nodra turaga ni sa davo matemate koto ena buturara ni vale.

²⁶ Sa dro yani o Eute ena gauna era sa bera tiko mai kina, a lako sivita na vatu ceuti, ka dro vaka ki Saira.

²⁷ Ni sa yaco yani kina, sa qai uvuca na nona davui ki na veidelana e Ifereimi, era sa lako mai na Isireli ka lako vata sobu kei koya mai na veidelana ni sa liutaki ira o koya.

²⁸ Sa kaya vei ira o koya, “Ni muri au, ni sa soli ira na noda meca na kai Moapi o Jiova ki na ligada.” Era sa muri koya sobu, ka sogota na i tatakoso ena uciwai na Joritani mai vei ira na Moapi ka sega ni laiva e dua me takosova na uciwai.

²⁹ Ena gauna o ya era sa vakamatea oti kina e 10,000 na kai Moapi kaukauwa, ka qaqa ka sega na vanua me dro bula rawa kina e dua.

³⁰ Era sa vakamalumalumutaki na kai Moapi ena siga o ya ena ligadra na Isireli. A sa tiko vakacegu na vanua me walusagavulu na yabaki.

O Samiraki

³¹ Ni sa oti na gauna i Eute sa taravi koya mai o Samikari na luve i Anaci, sa vakamatea o koya e ono na drau na kai Filisitia ena kuita ni bulumakau, ka vakabulai ira talega na Isireli.