Dauveilewai 20 - Vakavakadewa Vou kei na iVola tale eso

Valuti Penijamini na Vo ni Isireli

¹ Era a qai lako kece mai na Isireli mai Tani me yaco sara ki Perisepa, mai Kiliati ka sa dua na i soqosoqo levu sara me ra dua bauga ena mata i Jiova e Misipa.

² O ira na i liuliu ni veimataqali e Isireli era sa tiko ena nodra sota oqo na tamata ni Kalou, ka tiko kina e 400,000 na sotia ni vanua era tauri yaragi.

³ (Ia sa rogoca o ira na mataqali i Penijamini ni ra sa vakasoqoni vata e Misipa o ira na vo ni veimataqali e Isireli.) Era sa taroga na Isireli; “Ni tukuna mada mai, e yaco vakacava na cala oqo?”

⁴ A sa sauma na Livai ka a labati na watina yalewa ka kaya, “Keirau a lako vata kei na watiqu lailai ki Qibea, o ya na nodra vanua na Penijamini me keirau la'ki moce kina.

⁵ Era a qai lako mai na kai Qibea, era viribaita na vale keirau tiko kina, ka valuti au ena bogi o ya. Era a vinakata me vakamatei au, ia era a kucuva ga na watiqu lailai me yacova ni sa mate.

⁶ Au a qai taura na yago i watiqu sa mate tu, musumusuka vakalalai, vakauta ki na veiyasana kecega e Isireli, ni ra sa vakayacora oqo e dua na cala vakasisila e Isireli.

⁷ Ia oqo oi kemuni na Isireli kece sara, mo ni solia e ke na nomuni vakasala kei na nomuni lewa.”

⁸ Era a duavata na tamata ena nodra nanuma ka kaya, “Keimami na sega ni curuma tale na neimami valelaca, ka keimami na sega ni lesu tale ki na neimami veivale.

⁹ Ia oqo na ka keimami na cakava: keimami na vakawirimadigi ga ka la'ki valuti Qibea.

¹⁰ Mai na veiyatini na tamata i valu e Isireli era na veiqaravi, ka lako na kena vo ena i valu. Era yadrau na veiya-udolu mai na veiyatini na udolu me ra veivakarautaki vei ira na tamata i valu vei ira era na la'ki sauma vei Qibea mai Penijamini ena ka e veivakalolomataki era a cakava oqo vei Isireli.”

¹¹ Era a qai tovata taucoko na Isireli me ra valuta na koro.

¹² Ia na veimataqali e Isireli era a talai ira yani na tamata ki na mataqali i Penijamini ka kaya, “Na cava o ni sa vakayacora kina na ca vakasisila oqo ena kemuni maliwa?

¹³ Ia oqo dou soli ira mai na tamata ca oqo mai Qibea, me keimami vakamatei ira, ka me savasava o Isireli mai na ca oqo.” Ia era sega ni via vakarorogo na Penijamini vei ira na wekadra na Isireli.

¹⁴ Era a mani soqoni vata na Penijamini ena sauka ni koro e Qibea, me ra vala kei ira na Isireli.

¹⁵ Ena siga o ya a vakarautaka na Penijamini e 26,000 na nona mataivalu ka vakayaragi mai na nodra veikoro, ka ra sega ni wili kina o ira mai Qibea.

¹⁶ Mai vei ira na mataivalu oqo e 700 era i mawi, ka ra dau ni viri; e rawa ni ra virika na drau ni ulu ka sega ni cala.

¹⁷ O ira na Isireli ka sega ni wili kina o Penijamini e rauta ni ra lewe 400,000 era tauri yaragi kece.

¹⁸ Era a toso na mataivalu ka lako cake ki Peceli, ka ra la'ki taroga na Kalou, “O cei vei keimami me liu taumada me vala kei ira na Penijamini? A sauma o Jiova ka kaya, “Me liu vei kemuni na yavusa o Juta.”

¹⁹ Era a mani yadra ena mataka na Isireli, ka mai viribaiti Qibea.

²⁰ Era a lako yani na Isireli ka vala vata kei ira na Penijamini; era a lati na Penijamini mai vei ira na Isireli mai Qibea.

²¹ Era a curu tani mai Qibea na Penijamini ka mokuta e 22,000 na Isireli.

²² Era a vakayaloqaqataki ira na Isireli ka ra tuva i valu ena vanua vata ga ka ra a tu kina ena i matai ni siga.

²³ Era qai lako cake na Isireli ka tagi vei Jiova me yacova na yakavi, ka ra qai taroga vua, “Me keimami sa lako cake li me veivala kei ira na weka i keimami na Penijamini?” A sauma o Jiova, “Io, mo ni lako cake ka valuti ira.”

²⁴ O ira na Isireli era a qai torovi ira yani na Penijamini ena i karua ni siga.

²⁵ Era a toro voleka talega mai na Penijamini mai Qibea ena i karua ni siga, ka mokuti ira e 18,000 na Isireli, o ira kece oqo era tauri yaragi.

²⁶ Era a qai suka lesu tale na mataivalu taucoko ni Isireli ki Peceli; era dabe ka tagi ena mata i Jiova, era lolo ena siga o ya me yacova na yakavi. Era a qai vakacabora na i soro kama kei na i madrali ni veivinakati vei Jiova.

²⁷ Era a qai tarogi Jiova na Isireli ena siga o ya ni a tiko vei ira na Kato ni Veiyalayalati ni Kalou.

²⁸ A dauveiqaravi kina o Finiasi na luve i Iliesa ka luve i Eroni ena gauna o ya, ka kaya, “Me keimami lako cake me veivala vata kei ira na weka i keimami na Penijamini se me keimami vakasuka?” A qai sauma o Jiova ka kaya, “Ni lako cake, ni'u na soli ira ki na ligamuni ni mataka.”

²⁹ Era a qai lako vakavuni na Isireli me ra tauri ira vakidacala ena vanua vakavolivoliti Qibea.

³⁰ Era a qai lako cake na Isireli me ra vala kei ira na Penijamini ena i katolu ni siga, ka ra tuva i valu e Qibea me vaka ga e liu.

³¹ Ni ra lako yani na Penijamini me vala kei ira na kedra meca, era a lako tani kece mai na nodra koro. Ia ni bera ga ni ra tarai ira na meca ena loma ni salatu ka lako cake ki Peceli vakakina ki na yasana ka dua me gole ki Qibea, ka vakakina na vanua lala, era a vakamatea kina e tolusagavulu na Isireli.

³² Era a nanuma na Penijamini, ka kaya, “Eda sa vakadrukai ira me vaka ga e liu.” Ia era a kaya na Isireli, “Me da sa vakamalumalumu ga, ka vakasuka, me da vagolei ira tani mai na koro ki na gaunisala levu.”

³³ Era a tu vakasuka na mataivalu ni Isireli ka suka tale ki Pealitamari, ka ra cici mai na mataivalu ni Isireli ka ra a vuni tu mai na yasana vaka ki na ra kei Qibea.

³⁴ Era a lako cake mai Qibea e 10,000 na tamata i valu mai vei ira na Isireli, ka yaco me kaukauwa sara na i valu. Ia era a sega tiko ni vakila na Penijamini ni a sa volekati ira tiko ena gauna o ya na druka.

³⁵ Ia o Jiova sa vakamalumalumutaki ira na Penijamini vei ira na Isireli. Era a vakamatea e 25,100 na Penijamini o ira na Isireli ena siga o ya,

³⁶ ka ra sa liaca na Penijamini ni ra sa vakadrukai. Na lawalawa matasotia levu ni Isireli era a vakasuka mai vei ira na Penijamini baleta ni ra vakanuinui vakalevu vei ira na nona sotia era tiko vakavuni tu e Qibea.

Na Sala era Qaqa Kina na Isireli

³⁷ O ira na sotia oqo era a toso vakatotolo sara yani i Qibea me ra kabata vakaivalu na koro ka vakamatei ira kece era tiko kina.

³⁸ Era a veivosakitaka vata na matasotia levu ni Isireli kei ira era tiko vakavuni e dua na i vakatakilakila. Ena gauna ga era raica kina ni sa tubu cake na kubou levu mai na koro,

³⁹ ia me ra vuki lesu ka vakasuka mai na buca ni valu o ira kece na Isireli. Ena gauna o ya, sa rauta ni ra lewe 30 na Isireli era a moku mai vei ira na Penijamini. Era sa veitukunitaka vakai ira, “Io, eda sa vakadrukai ira tale me vaka ga e liu.”

⁴⁰ A qai basika na i vakatakilakila; o ya na kubou ni buka ni sa kuvu cake taudonuya na koro. Era a rai vuki na Penijamini ena kidacala ni ra sa raica na kena sa kama tu na koro levu oqo.

⁴¹ Era sa qai vuki lesu tale mai na Isireli, ka ra sa coriti na Penijamini ena loma taqaya baleta ni ra sa kila na nodra sa vakarau vakarusai vakadua.

⁴² Era a qai tu suka lesu mai vei ira na Isireli ka dro yani ki na vanua lala, ia era a sega ni dro rawa. Era sa vesuki e kedra maliwa na matasotia levu ni Isireli kei ira na sotia era sa lesu tiko mai na koro levu, ka ra vakarusai.

⁴³ A sega na vanua me ra dro bula rawa kina na meca i Isireli ni ra sa vakasasataki ka vakamatei me yaco sara ki na tokalau kei Qibea.

⁴⁴ A rauta ni 18,000 na sotia qaqa ni Penijamini era a vakamatei.

⁴⁵ O ira na kena vo era a dro yani ki na veivanua lala me yaco ki na Vatu o Rimoni. E 5,000 vei ira oqo era a vakamatei ena tolo ni sala. Era a vakasasataki ira na kena vo me yaco ki Kitomi, ka vakamatei kina e 2,000.

⁴⁶ Ena kedra i wiliwili taucoko, era a vakamatei ena siga o ya e lewe 25,000 na sotia qaqa ni Penijamini.

⁴⁷ Ia era lewe 6,000 ga na sotia era a dro bula rawa e loma ni vanua lala me yaco ki na Vatu o Rimoni, ka tiko e kea me vula va.

⁴⁸ Era a suka lesu tale na Isireli ka vakamatei ira taucoko na tagane, yalewa, kei ira na gone, ka vaka talega kina na manumanu. Era a vakama taucoko na veikoro ena yasana o ya.