Dauveilewai 16 - Vakavakadewa Vou kei na iVola tale eso

O Samisoni kei Tilaila

¹ Ena dua na gauna a lako yani ki Qasa o Samisoni, ka raica kina e dua na yalewa dautagane ka rau veimoceri.

² A tukuni vei ira na kai Qasa, “Sa lako mai eke o Samisoni.” Era a qai viribaiti na vanua o ya ka waraki koya toka ena bogi taucoko o ya mai na matamata ni koro. Era a vakadigagalu ena bogi taucoko o ya ni ra sa nanuma me ra wawa tiko me yacova na malawa ni mataka, ka me ra qai vakamatei koya kina.

³ Ia, a tiko e kea o Samisoni me yacova ga na lomaloma ni bogi. A sa duri cake ka cavuraka na matamata ni koro: ka okati kina na veikatuba, na duru ruarua, na kena i sogolawalawa kaukamea, kei na ka kecega. A sa biuta ki na usouso ni domona ka colata yani ki na ulunivanua donui Epironi.

⁴ Ni oti o ya, a sa domona o Samisoni na goneyalewa mai na Buca o Soreki, a yacana o Tilaila.

⁵ Era a lako mai na turaga ni Filisitia ka kaya vei Tilaila, “Mo bacani Samisoni mada me tukuna vei iko na vu ni nona kaukauwa, ka cava e rawa ni vakamalumalumutaki kina, ka me keimami vesuki koya ka vakamalumalumutaki koya. Keitou na solia yadudua vei iko e 1,100 na tiki ni siliva.”

⁶ A sa kaya vei Samisoni o Tilaila, “Yalovinaka mo tukuna mada vei au na vu ni nomu kaukauwa, kevaka e dua e via vesuki iko, me vakamalumalumutaki iko, a cava me cakava?”

⁷ A sa kaya vua o Samisoni, “Kevaka me ra vesuki au ena vitu na dali drokadroka ka sega ni sigani, au sa na malumalumu me vaka na tamata wale ga.”

⁸ Era a qai kauta mai na turaga ni Filisitia e vitu na dali drokadroka vei Tilaila, ka vesuki koya kina,

⁹ Ni ra wawa ka vuni tu na tamata ena loma ni vale, a qai kaci o Tilaila, “I Samisoni, era sa lako mai vei iko na kai Filisitia!” E cacavukavuka na wa me vaka na ka wale ga, me vaka sa tarai ena bukawaqa. Ia sa sega ni kilai na ka vuni ni nona kaukauwa.

¹⁰ A mani qai kaya o Tilaila vei Samisoni, “O sa vakalialiai au ka lasutaki au, yalo vinaka, tukuna vei au, o na vesu rawa vakacava?”

¹¹ A sa kaya vua o Samisoni, “Kevaka wale ga me ra vesuki au ena dali vou sara, ka sega ni sa bau vakayagataki vakadua, au sa na qai malumalumu ka tautauvata na tamata wale ga.”

¹² A mani taura na dali vou o Tilaila ka vesuki Samisoni kina, ka kaya vua, “I Samisoni! Era sa lako mai oqo vei iko na kai Filisitia!” Era a vuni tu eso na tamata ena dua tale na rumu. Ia a sa drutilaka ga na dali o ya mai ligana me vaka na wa ni culacula.

¹³ A sa tukuna o Tilaila vei Samisoni, “Me yacova mai oqo, o sa lasutaki au tiko ka vakalialiai au. Tukuna mai vei au se o na vesu vakacava?” A sa kaya vua, “Kevaka o na talia na tobe ni uluqu vata kei na wa ni sulu ka qai vakadreta vakaukauwa kei na pini, au na qai malumalumu, me vaka ga na tamata wale.”

¹⁴ A qai vakamoceri koya o Tilaila, ka taura na vitu na tobe ni uluna ka talia vata kei na wa ni sulu ka vakadreta kei na pini ka kaci, “I Samisoni! Era sa lako mai na kai Filisitia!” A duri cake ka sereka na uluna mai na wa ni sulu.

¹⁵ A qai kaya vua, “E rawa vakacava ni o lomani au, ni sega na ka dina e lomamu? Raica, sa vakatolu oqo na nomu vakalialiai au, ka o sa sega ga ni tukuna vei au, na vu ni nomu kaukauwa?”

¹⁶ A vakatarogi koya tiko ena veisiga kecega. A oca ka sosa o Samisoni ena nona vakatarogi koya tiko na watina,

¹⁷ ka sa mani tukuna vua na ka dina. “E se sega ni bau koti vakadua na drau ni uluqu,” a sa kaya. “Au sa solia tu vua na Kalou me nona mai na gauna au a sucu kina. Kevaka sa koti na drau ni uluqu, sa na kau tani na noqu kaukauwa ka'u sa na malumalumu me vaka ga na tamata wale.”

¹⁸ Ni sa kila o Tilaila na nona sa qai tukuna vua o Samisoni na ka dina taucoko, a mani vakauta na i tukutuku vei iratou na nodra tui na kai Filisitia ka kaya, “Ni lesu tale mada mai vakadua. Sa vakaraitaka vei au o koya na ka dina.” Era a qai lako mai ka kauta tiko mai na i lavo.

¹⁹ A qai vakamoceri Samisoni o Tilaila ka qai kaciva e dua na tamata me mai kotiva tani na i tobe e vitu ni drau ni ulu i Samisomi. A sa qai tekivu vakararawataki koya o watina, ni sa yali na nona kaukauwa.

²⁰ A qai kaci vakadomoilevu o koya, “I Samisoni! Era sa lako mai na kai Filisitia.” A sa yadra mai na moce ka qai vakananuma. “Au na vagalalataki au, me vaka ga au dau cakava.” Ia a sega ni kila o koya ni sa biuti koya o Jiova.

²¹ Era a qai vesuki koya na kai Filisitia ka leuta laivi na yaloka ni matana. Era a qai kauti koya i Qasa, ka vesu ena sinucodo parasa, ka vakacakacakataki koya ena vanua ni qaqi sila e vale ni veivesu.

²² Ia a sa tekivu me tubu tale na drauniuluna.

Na Mate nei Samisoni

²³ Era a soqoni vata na tui kei Filisitia me ra vakacaboisoro ena i soro levu vua na nodra kalou o Tekoni. Era laga sere, “Sa solia vei keda na noda kalou na gumatua mai vua na keda meca o Samisoni.”

²⁴ Ia ni ra raici koya na tamata, era a sere ena vakavinavinaka vua na nodra kalou, ka ra kaya, “Sa solia mai vei keda na qaqa mai vei ira na kedra meca, o koya sa vakalala na noda vanua, ka vakamatea e vuqa sara vei keda!”

²⁵ Era a marau tiko vakataki ira, ka ra kaya, “Me kacivi mai o Samisoni, me mai vakamarautaki keda.” Ni ra kauti Samisoni tani mai vale ni veivesu, era a vakasaurarataki koya me vakamarautaki ira, ka vakaturi koya ena kedra maliwa ni duru lelevu ni vale.

²⁶ A qai kaya o Samisoni vua na cauravou lailai ka tuberi koya tiko, “Laivi au me'u tara mada na duru lelevu ka ra i vakadei ni vale oqo. Au vinakata me'u ravi mada kina.”

²⁷ Ia na vale oqo era sinai tu kina na tagane kei na yalewa. O iratou na lima na tui kei Filisitia e ratou a tiko kina, ka rauta ni ra lewe 3,000 na tagane kei na yalewa era tiko ena dela ni vale e cake, era saravi Samisoni ni vakamarautaki ira tiko.

²⁸ A qai masu o Samisoni, “Oi kemuni na Kalou cecere, mo ni yalovinaka ka nanumi au mai; I Jiova na noqu Turaga, mo ni solia vakadua tale mada vei au na noqu kaukauwa, ka me'u rawata ena dua ga na i bili me saumi lesu kina vei ira na kai Filisitia na nodra leuta laivi na yaloka ni mataqu ruarua.”

²⁹ A qai taura ruarua o Samisoni na duru lelevu ni vale e lomadonu ka vesuka vata tu na vale taucoko. A tataba yani na ligana yadua ki na duru lelevu oqo, ka biligi rau,

³⁰ ka sa kailavaka, “Me'u qai mate kei ira na kai Filisitia!” A biligi rau na duru lelevu oqo ena nona i gu taucoko, a qai baleti iratou na lima na tui kei ira na tamata na vale levu oqo. A levu cake sara na tamata sa vakamatea o Samisoni ena nona mate oqo ni vakatauvatani kei na nona a bula voli.

³¹ Era a qai lako sobu mai na tacina kei ira na lewe ni nona vuvale me kauta na yagona. Era a qai kauti koya lesu ka buluti koya ena veimama ni koro o Sora kei Esitaoli ena i bulubulu i Manoa na tamana. A dauveilewai voli vei ira na Isireli o koya me ruasagavulu na yabaki.