Dauveilewai 11 - Vakavakadewa Vou kei na iVola tale eso

O Jefica

¹ Ia oqo o Jefica, na kai Kiliati, a luvena e dua na dautagane, e sotia qaqa, ka tamana o Kiliati.

² Era lewe levu na luve i Kiliati mai vua na watina dina, era tubu cake ka vakasavi Jefica tani ena kedra maliwa mai na vale i tamadra ka kaya vua, “Ena sega ni rawa mo mai taukena na veika e taukena o Kiliati na tamada, ni o iko na luve ni yalewa tani.”

³ A lako tani kina o Jefica mai vei ira na tacina ka la'ki tiko mai Tobi. A vakailalataki koya kei ira na dauvakacaca ka rawata mai kina na nona bula.

⁴ Ni oti e dua na gauna era a vakacibi i valu na kai Amoni vei ira na Isireli.

⁵ Era a lako na veituraga e Kiliati ka kauti Jefica mai na vanua o Tobi.

⁶ Era a kaya vei Jefica, “Mo lako mai, ka mai liuliu ni neimami mataivalu, me da valuti ira na Amonaiti.

⁷ A sa kaya o Jefica vei ira na qase ni Kiliati, “O kemuni sara ga oqo o ni a besetaki au, ka vakatalai au tani mai na vale i tamaqu? A cava o ni lakovi au mai kina ni o ni sa leqa?”

⁸ Era a kaya na qase ni Kiliati vei Jefica: “Sa veitalia o ya, keimami sa lako ga mai vei iko, mo salavata kei keimami ka valuti ira na Amonaiti; mo mai liutaki keimami talega; kei ira kece sara era tiko e Kiliati.”

⁹ A mani kaya o Jefica vei ira na qase ni Kiliati, “Kevaka o ni kauti au tale yani ki vale ka vala kei ira na Amonaiti ka soli ira o Jiova ki na ligaqu, au sa na qai nomuni liuliu.”

¹⁰ Era a qai kaya na qase ni Kiliati vei Jefica, “Me sai vakadinadina o Jiova vei keda, ni keimami na vakayacora dina na ka o ni sa tukuna.”

¹¹ A qai lako kei ira na qase ni Kiliati o Jefica, ka ra buli koya me nodra turaga ka i liuliu talega ni nodra mataivalu; a mani tukuna na nona vosa taucoko o Jefica ena mata i Jiova e Misipa.

¹² A qai vakauta o Jefica e dua na nona i tukutuku vua na nodra tui na Amonaiti ka kaya, “A cava na leqa ena kedaru maliwa? A cava na vuna o sa valuta kina na noqu vanua?

¹³ A sa kaya na tui Amoni vei ira na i talaki i Jefica, “Ena gauna era a lako tani mai kina e Ijipita o ira na Isireli, era a qai kovea na noqu vanua me tekivu mai na Uciwai o Anoni ka yaco sara ki na Uciwai na Japoki kei na Uciwai na Joritani. Ia oqo mo ni qai vakasuka tale mai ena sala malumu.”

¹⁴ A sa vakauta tale na i tukutuku o Jefica vua na tui Amoni ka kaya:

¹⁵ “O Isireli e sega ni kauta tani na vanua o Moapi se na nodra vanua na Amonaiti.

¹⁶ Ena nodra lako mai Ijipita na Isireli, era a muria na loma ni veikau vaka ki na Wasa Damudamu ka yaco mai ki Katesi.

¹⁷ A sa qai vakauta na i tukutuku o Isireli vei tui Itomi ka kaya, “Laivi keimami me keimami lako takosova na nomu vanua,” ia a sega ni via vakarorogo o tui Itomi. Na i tukutuku vata ga oqo a vakau talega vei tui Moapi, ka sega talega ni via rogoca o koya. Era a mani tu ga mai Katesi na Isireli.

¹⁸ Era a qai muria na loma ni veikau ka lako wavokita na vanua o Itomi, ka yaco ki na tokalau ni vanua o Moapi ka tiko ena vanua o Amoni, era a sega ni curuma na vanua vaka-Moapi, ka ni o Amoni e i yalayala ni vanua o Moapi.

¹⁹ A vakauta na i tukutuku o Isireli vei Sioni na nodra tui na Amoraiti ka tui talega kei Episoni ka kaya, ‘Ni vakatarai keimami mada me keimami takosova na nomuni vanua ka lako yani ki na neimami vanua.’

²⁰ Ia a sega na veivakabauti vei Sioni me laivi Isireli me lako. A vakasoqona na nona mataivalu o Sioni ka keba toka mai Jaesi me valuti Isireli.

²¹ A sa solia vei Isireli o Jiova na Kalou ni Isireli na qaqa ena valuti nei Sioni kei na nona mataivalu. A sa taura kina o Isireli na nodra vanua taucoko na Amoraiti era vakaitikotiko e kea.

²² Era a taukena na nodra i yalayala kecega na Amoraiti me tekivu mai Anoni ka yaco sara i Japoki, kei na i yalayala mai na vanua lala me yacova na Joritani.

²³ Ia oqo, sai Jiova ga, na nodra Kalou na Isireli, o koya sa vakamalumalumutaki ira na Amoraiti ena vukudra na nona tamata na Isireli. Sa lomamu li mo taura na nodra vanua?

²⁴ E sega li ni ganita mo taukena ga na vanua sa solia vei iko o Kimosi na nomu kalou mo taukena? E sega li ni ganita me keimami taukena na veika kece sara sa rawata o Jiova na neimami Kalou me baleti keimami?

²⁵ E vakaevei, o uasivi cake beka vei Tui Pelaki na luve i Sipori mai Moapi? E bau veileti li kei ira o Isireli, sa bau ia li na i valu vata kei koya?

²⁶ Ni a tiko o Isireli mai Esiponi kei na kena veikoro, ka vakakina mai Aroa kei na kena veikoro, me tolu na drau na yabaki, A cava o dou sega ni rawata mai kina ena gauna o ya?

²⁷ Au a sega ni caka ca vei iko, ia o iko ga o a cala vei au, mo sa via valuti au. Me qai vakatulewa o Jiova edaidai vei ira na Isireli se vei ira na Amoraiti.”

²⁸ A sega ni via rogoca o tui Aroni na i tukutuku a vakauta vua o Jefica.

Na Yalayala nei Jefica

²⁹ A curumi Jefica na yalo i Jiova. A sa lako ki Kiliati kei Manasa ka qai lesu tale mai ki Misipa e Kiliati ka qai lako sara ki Amoni.

³⁰ A sa yalataka o Jefica vei Jiova ka kaya: “Kevaka o ni soli ira na kai Amoni ki na ligaqu,

³¹ o koya ga ena tavaki au mai e liu, ena mata ni katuba ni noqu vale ni'u suka yani ena qaqa vei ira na Amonaiti sa na nona na Kalou, me cabori me noqu i soro kama vei Jiova.”

³² A sa lako o Jefica vei ira na Amonaiti ka vala kei ira a soli ira vei koya o Jiova.

³³ A vakadrukai ira sara vakaca mai Aroeri ka yaco ki Minica, e ruasagavulu na koro lelevu, ka yaco sara ki Epeli Kiramemi, era sa vakamalumalumutaki sara na kai Amoni mai vei ira na Isireli.

³⁴ A lako mai o Jefica ki na nona vale e Misipa, a sa lako mai na luvena yalewa me tavaki koya, kei na nona tibereli ka meke lako. Sai koya duadua ga oqo na luvena, ka sega tale ni dua.

³⁵ Ia ni raici koya, a dresulaka na nona i sulu ka kaya, “Isa na luvequ! O sa biuti au sobu ki ra, sa yaco mo vakavuna na noqu loma leqa. Au sa dola gusu oti vei Jiova, ka sega ni rawa vei au me'u vakasuka tale mai na noqu vosa ni yalayala.”

³⁶ A sa kaya vua na luvena goneyalewa, “I tamaqu, kevaka o sa vosa ni yalayala oti vei Jiova, mo vakayacora ga vakakina na ka o a kaya mo cakava vei au, me vaka ni sa soli ira oti ki ligamu o Jiova na Amoraiti, o ira na kemu meca.”

³⁷ Ia sa qai kerea vei tamana, “Mo vakayacora ga e duabulu na ka me baleti au. Mo solia mada vei au e rua na vula me'u lako vakagade kina kei ira na noqu i caba goneyalewa ki na veiulunivanua ka tagicaka kina na noqu sa na vakarau mate ena dela ni noqu bula vakagoneyalewa.”

³⁸ Sa qai tukuna vua o tamana me gole yani me rua na vula. A mani gole yani kei ira na nona i caba ki na veiulunivanua me ra tagicaka na nona bula baleta ni sa na vakarau mate ni se bera mada ni vakawati se vakaluveni.

³⁹ Ni oti e rua na vula, a lesu tale mai na goneyalewa vei tamana ka mani vakayacora vua o tamana na ka sa vosa ni yalayala oti kina. A sega mada ni se bau moce vata kei na tagane. Sa tekivutaki kina oqo vei ira na Isireli e dua na i valavala,

⁴⁰ o ya me dau bogi va ena veiyabaki kece me ra na dau tagicaka kina na luve i Jefica na kai Kiliati o ira na goneyalewa ni Isireli.