Dauveilewai 10 - Vakavakadewa Vou kei na iVola tale eso

O Tola kei Jairi

¹ Ni mai cava na bula i Apimeleki, sa basika cake mai o Tola na luve i Pua ka makubui Dodo me vakabulai ira na Isireli. E cavutu mai na yavusa o Isakari o Tola ka tiko mai Samiri ena vanua cecere vaka-Ifereimi.

² A yaco me dauveilewai e Isireli me ruasagavulu katolu na yabaki. A sa qai vakacegu yani ka la'ki bulu e Samiri.

³ Ni oti o Tola, a taravi koya sara yani o Jairi na kai Kiliati. A sa lewai ira na Isireli me ruasagavulu karua na yabaki.

⁴ E tolusagavulu taucoko na luvena tagane ka ra vodoka e tolusagavulu na asa. Era taukena e tolusagavulu na koro lelevu ena loma ni vanua o Kiliati, ka ra se vakatokai tikoga me ra veikorokoro nei Jairi.

⁵ A sa mate o Jairi, ka sa bulu mai Kamoni.

Veivakalolomataki o Ira na Amonaiti

⁶ Era sa vakayacora tale na ka ca o ira na Isireli ena mata i Jiova ni ra sa qaravi Peali kei Aseteroci, kei na nodra kalou na kai Siria, Sitoni, Moapi, Amoni, kei Filisitia. Era sa biuti Jiova ka sega ni qaravi koya.

⁷ Sa qai cudruvi ira vakalevu na kai Isireli o Jiova, ka soli ira yani ki na ligadra na kai Filisitia kei ira na Amonaiti.

⁸ A tinikawalu taucoko na yabaki na nodra vakasaurarataki ira tiko na Isireli ka ra tiko ena tai ka dua ni Joritani ena nodra vanua na Amoraiti, mai Kiliati.

⁹ Era sa takosova talega na Joritani o ira na Amonaiti me ra vala kei ira na Juta, kei ira na Penijamini, ka vakakina o ira na Ifereimi. Na ka oqo sa vakaleqai Isireli sara vakalevu.

¹⁰ Era sa qai tagi vei Jiova o ira na Isireli ka kaya: “Keimami sa cala vei kemuni, ni keimami a biuti kemuni, ka cuva vei ira na Peali.”

¹¹ A sa kaya o Jiova vei ira na Isireli: “Au a sega li ni sereki kemuni mai vei ira na kai Ijipita, na Amoraiti, na Amonaiti ka vakakina mai vei ira na Filisitia?

¹² O ira talega mai Saitoni, na Amalekaiti kei ira na Maonaiti, era a vakasaurarataki kemuni, o ni a tagi vei au, au a qai sereki kemuni mai na ligadra.

¹³ Ia, o ni a vakanadakui au ga ka cuva ki na veikalou, ia oqo au na sega ni sereki kemuni tale.

¹⁴ Ni lako ni la'ki tagi vei ira na veikalou o ni sa digitaka me ra qai sereki kemuni ena nomuni leqa.”

¹⁵ Era a qai kaya na Isireli vei Jiova, “Keimami sai valavala ca. Mo ni vakayacora vei keimami na ka sa vinaka vei kemuni, ia mo ni vakabulai keimami ena siga oqo.”

¹⁶ Era sa qai biuta tani na veikalou tani ka qaravi Jiova; ka sa yaco mai na gauna me sa kauwaitaka tale kina o Jiova na nodra rarawa na Isireli.

¹⁷ Era sa soqoni vata mai na Amonaiti me ra vakacibi i valu, ka la'ki tara keba toka mai Misipa e Kiliati.

¹⁸ Mai kea era sa veitarogitaka na nodra i liuliu na lewenivanua e Kiliati, ka kaya, “O cei na tamata ena tekivuna na nodra valuti na Amonaiti? O koya oqo me na qai liutaki ira kecega na kai Kiliati.”