Cakacaka 4 - Vakavakadewa Vou kei na iVola tale eso

O Pita kei Joni ena Matadra na Lewe ni Matabose

¹ Ia ni rau se vosa tikoga o Pita kei Joni vei ira na tamata, era sa lako yani vei rau o ira na bete, kei na i liuliu ni ovisa ni Valenisoro kei ira na Setoki.

² Sa duatani na nodra cudru ena vuku ni nodrau vakatavulici ira tiko na tamata, ka vunautaka tiko na tucake tale mai na mate me vaka sa vakadinadinataki ena tucake tale i Jisu.

³ Era sa qai tauri rau, ka biuti rau ki na valeniveivesu me rau waraka na siga ka tarava, me vaka ni a sa karobo sara mai na vanua.

⁴ Ia e lewe vuqa vei ira era rogoca na i vunau o ya era sa vakabauta; e rauta beka e lewe 5,000 na kedra i wiliwili na tagane.

⁵ Ia ena siga ka tarava, era sa qai soqoni vata yani ki Jerusalemi o ira na nodra i liuliu na Jiu kei ira na qase, vata kei ira na daunilawa.

⁶ Era sa bose vata kei Anasa na Bete Levu, kei Kaiava, kei Joni, kei Alekisada, kei ira kecega na lewe ni vuvale ni Bete Levu.

⁷ Era sa qai vakaturi rau ena kedra maliwa, ka kaya vei rau, “A kaukauwa cava, se ena yaca i cei, o drau sa cakava kina na ka oqo?”

⁸ Ia ni sa sinai tu o Pita ena Yalo Tabu sa qai kaya vei ira, “Oi kemuni na nodra i liuliu na tamata, kei na nodra qase na Isireli:

⁹ kevaka keirau sa vakatarogi edaidai me baleta na cakacaka vinaka sa caka vua e dua na tamata lokiloki kei na sala cava beka e vakabulai kina,

¹⁰ me kilai sara oqo vei kemuni kece kei ira kecega na Isireli, ni sa yaca ga i Jisu Karisito na kai Nasareci, o koya o ni a vakota ki na kauveilatai, o koya ka a vakatura cake tale mai na mate na Kalou, ia ena vukuna ga sa tucake tu kina eke ena matamuni na tamata oqo ena bula vinaka.

¹¹ Sa i Jisu ga me vaka a kaya, ‘Na vatu o ni a cata na dautara vale, Sa yaco me i vakadei ni yavu ena tutu ni vale.’

¹² Sa i koya duadua ga e rawa ni vakabulai keda, ka ni sega ni tiko tale e dua na yaca ena ruku i lomalagi me solia na Kalou vei keda na tamata me da bula rawa kina.”

¹³ Ni ra sa raica na lewe ni Matabose na nodrau doudou o Pita kei Joni, ka kila talega ni rau tamata sega ni vuli vinaka ka lewe ni vanua walega, era sa kurabui sara; ia era sa qai vakasamataka ni rau a dau tiko vata kei Jisu.

¹⁴ Ia ni ra sa raica na tamata sa vakabulai ni tucake tu vata kei Pita kei Joni, a sa sega tale na ka me ra tukuna.

¹⁵ Era sa qai vakarota me rau lako tani vakatikitiki mai na rumu ni Matabose, ka me ra veivosaki mada kina vakai ira.

¹⁶ Era sa qai kaya, “A cava me da cakava vei rau na tamata oqo? Era sa kila kecega na tiko e Jerusalemi na cakacaka mana levu e rau sa cakava oi rau oqo, ka sa sega ni rawa ni da cakitaka.

¹⁷ Ia me tarova na kena tete vakalevu na ka oqo ena kedra maliwa na tamata, me da vakaroti rau ga me rau kakua tale ni vosa vua e dua na tamata ena yaca i Jisu.”

¹⁸ Era sa qai kacivi rau, ka vakarota vei rau me rau kakua sara ni vosa se veivakatavulici tale ena yaca i Jisu.

¹⁹ Ia e rau a qai sauma o Pita kei Joni ka kaya vei ira, “Ni lewa mada ga oi kemuni se evei li e dodonu, me keirau vakarorogo vei kemuni se me keirau vakarorogo vua na Kalou.

²⁰ Ka ni sa sega ni rawa vei keirau me keirau sega ni tusanaka na veika keirau a raica ka rogoca.”

²¹ Sa qai vakaroti rau tale vakaukauwa na Matabose ena ka oqo, ka laivi rau me rau lako. E a sega ni rawa vei ira me ra totogitaki rau ena vukudra na tamata, ka ni ra sa vakacaucautaka kecega na Kalou ena vuku ni veika sa yaco.

²² Sa yabaki vasagavulu vakacaca na tamata ka vakayacori vua na cakacaka mana ni veivakabulai o ya.

Era sa Masulaka na Vakabauta me Soli vei ira na Yalodoudou

²³ Ni rau sa sereki oti, e rau sa mani lako sara vei ira na nodrau i tokani, ka la'ki talanoataka na ka kecega era a kaya vei rau o ira na bete levu kei ira na qase ni Isireli.

²⁴ Ia ni ra sa rogoca na ka o ya, era sa qai tabalaka cake na domodra vua na Kalou ena lomavata ka kaya, “Oi kemuni na Turaga Cecere, kemuni o ni a buli lomalagi kei vuravura kei na wasawasa, kei na veika kecega e tu kina!

²⁵ Ena kaukauwa ni Yalo Tabu o ni a vosa kina ena gusuna na nomuni dauveiqaravi, o Tevita na neimami qase, ka kaya, ‘A cava era cudru kina na veimatanitu tani? A cava era veinaki kina na lewenivanua me ra cakava na veika mate wale?

²⁶ Era tuva i valu na tui kei vuravura, Ka ra vakasoqoni vata na dauveiliutaki, Me ra vala kaya na Turaga kei na nona Karisito.’

²⁷ Ni rau a mai sota vata kina ena koro oqo o Eroti kei Ponitio Pailato ka vakakina o ira na kai tani kei ira na lewe i Isireli me ra vala kei Jisu, na nomuni Dauveiqaravi yalo savasava, o koya o ni a lumuta.

²⁸ Era a soqoni vata me ra cakava kecega na veika o ni a sa lewa tu mai liu, ena nomuni kaukauwa kei na nomuni i naki, me na vakayacori.

²⁹ Ia oqo, Turaga, mo ni raica mada na nodra veivakarerei; ka mo ni solia vei keimami na nomuni tamata na yalodoudou me keimami tukuna yani kina na nomuni vosa.

³⁰ Ni dodoka tiko na ligamuni me veivakabulai, ka me vakayacori tiko na veicakacaka mana kei na veika veivakurabuitaki ena yaca i Jisu na nomuni Dauveiqaravi yalo savasava.”

³¹ Ia ni ra sa masu oti, sa qai yavavala na tiki ni vale era soqoni tiko kina, ka ra sa vakasinaiti kece ena Yalo Tabu, ka vosataka vakadoudou na vosa ni Kalou.

Era Wasea Vata na Veika Kecega

³² Era sa lomavata ka yalovata o ira na lewe vuqa ka ra sa vakabauta. E sega ni dua e kaya me nona duadua tikoga na veika e tu vua; ia era sa taukena vata na veika kecega.

³³ A ratou sa tukuna ena kaukauwa levu na i apositolo na tucake tale mai na mate ni Turaga o Jisu, ka sa vakalougatataki ira vakalevu kece sara na Kalou.

³⁴ A sega ni dua vei ira me leqa ena dua na ka ni ra sa volitaka na nodra tiki ni qele o ira na vaqele kei na nodra vale o ira na vakavale, ka ra kauta na kedra i sau,

³⁵ ka la'ki tauca e yavadratou na i apositolo me veivotayaki vei ira kecega me vaka na ka e dui ganiti ira.

³⁶ E a mani vaka talega kina vei Iosefo, o koya e ratou a vakatoka na i apositolo me o Panapasa (a kena i balebale, o koya sa dau veivakayaloqaqataki). O koya e dua na kawa i Livai, ka a sucu mai Saipurusi.

³⁷ E taukena o koya e dua na tiki ni vanua, ia e qai volitaka, ka kauta na kena i sau ka la'ki solia vei iratou na i apositolo.