Cakacaka 27 - Vakavakadewa Vou kei na iVola tale eso

Sa Soko ki Roma o Paula

¹ Ena gauna sa lewai mai kina me keimami soko ki Itali, era sa qai soli Paula yani kei ira tale eso na kaivesu vua na turaganivalu o Jiuliasi, na i vakailesilesi ena dua na matasotia ni Roma ka yacana na “Matasotia ni Tui”.

² Keimami a vodo ki waqa ena koro o Adramitiumi mai Misia ka vakarau tiko me soko ki na veivanua eso ena baravi kei Esia, ka keimami sa mai vakarewa laca sara ka soko yani. A lako vata tiko kei keimami o Arisitako, e dua na kai Masitonia mai na koro o Cesalonaika.

³ Keimami a curu yani ki Saitoni ena siga ka dua. A sa lomani Paula o Jiuliasi, ka laivi koya me lako vei ira na nona i tokani ka me la'ki vakacegu kina.

⁴ Keimami sa qai biuta e kea ka soko ravita na yasa i Saipurusi e rurugu, ka ni a saqati keimami toka mai na cagi.

⁵ Keimami a soko kosova na wasawasa donui rau na yasana o Silisia kei Pamifilia ka yaco ki na koro o Maira mai na yasana o Lisia.

⁶ A kunea e kea na turaganivalu e dua na waqa ni koro o Alekisadria mai Ijipita ka vakarau soko tiko ki Itali, ka sa mani vakavodoki keimami kina.

⁷ Sa berabera dina na neimami soko ena vica vata na siga, ka sa bau dredre sara toka ga na neimami donuya yani na koro o Nito. Ia me vaka ni a sega ni laivi keimami na cagi me keimami ia tikoga ki na vanua keimami mua tiko kina, keimami sa qai sokota sobu na yasana malumu ni yanuyanu o Kiriti, ka soko sivita na ucuna o Salimoni.

⁸ Keimami sa ravita toka ga na baravi ka dredre sara toka na neimami qai yaco rawa yani ki na dua na vanua e yacana o Toba Vinaka, ka sega soti ni yawa mai na koro o Lasea.

⁹ Ia ni balavu na nodra tiko, a sa dredre na soko, ka ni sa la'ki sivi tale na Siga ni Veisorovaki, a sa qai vakasalataki ira o Paula,

¹⁰ ka kaya, “Oi kemuni na turaga, au sa raica rawa ena noda soko, mai na gauna oqo ka lako yani, ni sa na yaco kina na leqa; e levu na ka ena vakacacani kina, ka sega walega ni na yaco ena i usana kei na waqa, ena yali sara talega kina na bula.”

¹¹ Ia o koya na turaganivalu sa vakabauti rau ga na kavetani kei na i taukei ni waqa, ka sega ni via rogoca na ka e kaya o Paula.

¹² E sega talega ni toba vinaka me caka tu kina na kele ena vula i liliwa na toba o ya. A sa mani yaco ga na nodra i le na lewe levu me ra sa tomana tale na nodra soko yani, ka ra nuitaka ni ra na yaco rawa ki Finiki me ra kele tu kina ena vula i liliwa. O Finiki e dua na toba kei Kiriti ka qara vaka ki na ceva-i-ra kei na vua-i-ra.

Na Cava e Loma ni Wasawasa

¹³ A liwa malua toka na ceva, ka ra sa nanuma sara ni sa na rawa na nodra i naki. Era sa cavuikelekele kina ka soko ravita toka ga na baravi kei Kiriti.

¹⁴ Ia e sega ga ni dede ni sa laba mai e dua na cagi kaukauwa e muria sobu mai na yanuyanu, ka yacana na “Vua-i-cake.”

¹⁵ Sa qai tabaka na cagi ki na waqa, sa sega ni rawa ni sokoti cake tikoga na mata ni cagi, keimami sa mani laiva me sa savu tu ga yani.

¹⁶ Keimami a bau via vakaruru vakalailai ni keimami sokota na ceva ni yanuyanu lailai o Kuta ka a vovoleka sara ni keimami sega ni vesuka rawa na velovelo.

¹⁷ Era sa qai vakarewataka cake ki waqa na velovelo ka vakadretaka matua ena dali. Ia ni ra sa rere de keimami kasa ena nuku cere o Siratisi, era sa qai uruca na laca ni waqa, ka keimami sa qai savu muria tu ga na cagi.

¹⁸ Ena siga ka tarava ni sa kaukauwa vakalevu sara na cava era sa tekivu biuta na i usana ki wai.

¹⁹ Ena i katolu ni siga keimami sa talaca ki wai na i yaya ni waqa.

²⁰ E vica vata na siga keimami sega tu kina ni raica na matanisiga se na kalokalo. Sa kaukauwa tikoga na cagi, ka sa oti mai vei keimami na vakanuinui ni keimami na bula.

Sa Vosa o Paula vei Ira na Kaiwaqa

²¹ Ni sa dede na nodra sega tu ni kana na kaiwaqa, sa qai tu cake o Paula ena kedra maliwa ka kaya, “Oi kemuni na turaga, e dodonu mo ni a rogoca na noqu vosa ka a kakua ni biuti Kiriti mai. Ke o ni a vakarorogo vei au, ke a sega ni yacovi keda na leqa oqo, ka sega talega ni vakacacani na i usana.

²² Ia oqo au sa vakamasuti kemuni, mo ni yalodei! Ena sega ni dua vei kemuni me vakaleqai na nona bula; ia ena vakaleqai ga na waqa oqo.

²³ Ena bogi, sa lako mai kina vei au e dua na nona agilosi na Kalou ka'u sa qarava, ni'u sa nona tamata oi au,

²⁴ ka sa kaya vei au, ‘I Paula, mo kakua ni rere. E dodonu mo na tucake ena mata i Sisa ena mataveilewai. Na Kalou, ena nona yalololoma vei iko, sa ia na veimaroroi vei ira na tamata kece era sa soko vata tiko oqo kei iko.’

²⁵ Kemuni na turaga, mo ni yalodei tiko kina! Ni'u sa vakabauta na Kalou, ni na yaco dina na veika sa tukuni oqo vei au.

²⁶ Ia eda sa na la'ki takasa ga ena dua na yanuyanu.”

Era sa Via Dro na Kaimua

²⁷ Sa yacova yani na i katinikava ni bogi na neimami veisavuyaki voli ena Wasawasa e Loma. Ni rauta na lomaloma ni bogi, era sa vakila na kaimua ni keimami sa volekata e dua na vanua.

²⁸ Era sa mani vakarautaka na wai ka ra kunea ni katu ruasagavulu; ia vakalailai tale ki liu era a vakarautaka tale na wai ka ra kunea ni sa katu tinikalima.

²⁹ Ia ni ra sa rere de keimami kasa ena dua na baravi veivatu, era sa qai biuta e va na i kelekele ena muaimuri, ka gadreva me siga totolo na vanua.

³⁰ Era sa qai via tovolea me ra dro tani mai waqa o ira na kaimua; ka ra sa mani vakalutulututaka sobu na velovelo ki wai, me vaka era sa vakarau la'ki biuta eso na i kelekele ki muailiu ni waqa.

³¹ Sa qai tukuna o Paula vua na turaganivalu kei ira na sotia, “Kevaka era na sega ni tiko ga e waqa o ira na kaimua, o ni sa na sega ga ni bula.”

³² Era sa qai tagutuva na dali ni velovelo o ira na sotia, ka biuta me ciri yani.

Era sa Qai Kana Tale na Kaimua

³³ Ni sa voleka mai na siga, sa cikevi ira kecega o Paula me ra bau kana mada, ka kaya, “E daidai sai katinikava ni siga o ni wawa tu ga kina ka lolo; o ni sega ni bau kania e dua na ka.

³⁴ Au sa vakamasuti kemuni kina mo ni kana mada; mo ni na bulabula kina. Ena sega ni dua vei kemuni me na vakayalia e dua na drauniuluna.”

³⁵ Ni sa kaya oti oqo, sa qai taura e dua na i buli madrai ka vakavinavinakataka vua na Kalou ena matadra kecega, a sa dovia, ka tekivu me kana.

³⁶ Era sa vakayaloqaqataki kece ena ka o ya ka ra sa qai kana talega.

³⁷ Keimami sa lewe 276 taucoko na tamata ka tiko e waqa.

³⁸ Ia ni ra sa kana ka mamau, era sa qai tekivu vakamamadataka na waqa ni ra sa biuta kece na witi ki wasawasa.

Voca na Waqa

³⁹ Ni sa siga mai na vanua, era a sega ni kila na kaiwaqa na vanua o ya, ia era a raica ga e dua na toba e vakamatasawa, ka ra lewa me ra sa na tovolea me ra vakasa kina na waqa.

⁴⁰ Era sa qai tagutuva na i kelekele, ka laiva na waqa me savu yani; era a sereka talega na i vesu ni uli, ka vakarewataka na laca levu me rawa ni yaco kina na waqa ki matasawa.

⁴¹ Era sa mani ciri yani ki na dua na vanua e sota vata kina e rua na kui, ka ra vakasara kina na waqa. A coba sara ki na nuku na muailiu ka mai sega tu yani ni yavalati rawa, ia na muaimuri sa qai kasere tikoga vakamalua ena kaukauwa ni ua.

⁴² Era sa qai nakita na sotia me ra vakamatei ira na kaivesu, de ra na qai qalo eso ka dro bula.

⁴³ Ia ni vinakata na turaganivalu me vakabulai Paula, sa mani tarovi ira kina na sotia mai na ka era via cakava, ka a vakarota ga me ra rika e liu ki wai o ira era rawa ni qalo, me ra liu ki vanua.

⁴⁴ Ia o ira na kena vo, me ra na qai vakayagataka na kau ni waqa raraba eso kei na so tale na gacagaca ni waqa me nodra i qaqalo ki vanua. E a vaka o ya na neimami cabe bula ki vanua.