Cakacaka 26 - Vakavakadewa Vou kei na iVola tale eso

Sa Taqomaki Koya o Paula ena Mata i Akariva

¹ Sa qai kaya vei Paula o Akariva, “Sa rawa ni o vakamacalataki iko mai ena gauna oqo.” Sa qai dodoka na ligana o Paula ka vakatekivu me tukuni koya:

² “Au nanuma ni'u sa kalougata oi au, kemuni Akariva na tui, ni'u sa na tukuni au edaidai e matamuni ena vuku ni veika kecega era beitaki au kina na Jiu,

³ vakabibi ni o ni sa rui kila vinaka kece sara na nodra i valavala na Jiu kei na veika era dau veiletitaka. Au sa kerei kemuni kina mo ni rogoci au ena yalo vosota.

⁴ “Era sa kila kece sara na Jiu na i tovo ni noqu bula mai na gauna ni noqu gone ka yacova mai oqo. Era kila ni'u a dau tu ga e liu mai na noqu vanua, ka vakakina na noqu bula mai Jerusalemi.

⁵ Era sa kila makawa tu mai, kevaka e lomadra, sa rawa ni ra vakadinadinataka vei kemuni, ni'u a bula tu mai ena i vakarau ni bula vaka-Farisi, o ya na taba ni neimami lotu ka dau muria vakamatailalai sara na kena lawa.

⁶ Ia au sa mai tu oqo me'u lewai ena vuku ni noqu nuitaka na vosa ni yalayala ka a solia na Kalou vei ira na neimami qase,

⁷ sai koya oqo na ka sara ga era a nuitaka me ra na taukena o ira na neimami yavusa e tinikarua ena nodra dau qarava tiko na Kalou ena siga kei na bogi. Ia sai koya na vakanuinui oqo kemuni na tui, era sa vakacalai au tiko kina na Jiu.

⁸ A cava soti beka e dredre kina vei kemuni na tiko oqo mo ni vakabauta ni sa rawa vua na Kalou me vakaturi ira cake tale na mate?

⁹ “Oi au vakai au, au a nanuma ni sa dodonu me'u cakava na veika kecega au rawata me'u saqata kina na yaca i Jisu na kai Nasareci.

¹⁰ Ka sai koya sara ga na ka o ya au a cakava mai Jerusalemi. A soli vei au na kaukauwa mai vei ira na bete levu, ka'u a biuti ira kina e lewe vuqa na tamata ni Kalou ki na valeniveivesu; ia ni sa lewai me ra vakamatei, au a tokona na lewa o ya.

¹¹ Au a dau vakaitotogitaki ira vakavuqa ena veivalenilotu, ka vakasaurarataki ira me ra cakitaka na nodra vakabauta. Na kena levu na noqu rarawataki ira, au a lako sara kina ki na veikoro lelevu eso mai na veimatanitu tani ka la'ki vakacacani ira kina.”

Sa Tukuna o Paula na Nona Veisau

¹² “Sa i koya sara talega na i naki o ya au a lako tiko kina ki Tamasiko. Au a lako tiko ena nodra lewa kei na nodra veitalai na bete levu mai Jerusalemi.

¹³ Ia ni keimami sa lako tiko ena gaunisala ni rauta na sigalevu tutu, kemuni na tui, au a qai raica e dua na rarama mai lomalagi, e kaukauwa cake na kena i serau mai na i serau ni matanisiga, ni sa cila vakavolivoliti au kei ira keimami lako vata tiko.

¹⁴ Keimami a bale kece ki na qele, ka'u a qai rogoca e dua na domo ni kaya mai vei au ena vosa vakaiperiu, ‘I Saula, I Saula! A cava o vakacacani au tiko kina? Me vaka ni na mavoa na manumanu e tekea na matanimoto, na kena i uso, ena vaka talega kina vei iko; na levu ga ni nomu vakacacani au, na levu ni nomu mavoa!’

¹⁵ Au sa qai kaya, ‘O cei o kemuni, Turaga?’ Sa qai kaya na Turaga, Oi au o Jisu, o koya o sa vakacacana tiko.

¹⁶ Ia mo duri cake ka tu e yavamu. Au sa rairai oqo vei iko me'u lesi iko mo noqu tamata. O iko mo na dautukuna vei ira na tamata kecega na veika o sa vakadinadinataka ena siga edaidai kei na veika ka'u na vakatakila vei iko ena veigauna ki liu.

¹⁷ Au na vakabulai iko mai vei ira na Isireli kei ira na kai matanitu tani, o ira ka'u sa na talai iko kina.

¹⁸ O iko mo na la'ki dolava na matadra, me ra saumaki mai na butobuto ki na rarama, mai na kaukauwa i Setani ki vua na Kalou; me bokoci kina na nodra i valavala ca, ka ra na okati vata kei ira era sa vakasavasavataki me ra nona na Kalou ena nodra sa vakabauti au.’

Sa Tukuna o Paula na Nona Cakacaka

¹⁹ “O koya oqo, kemuni Akariva, na tui, au a sega ni talaidredre kina ki na raivotu sa vakaraitaki vei au mai lomalagi.

²⁰ Au a tekivu vei ira mai Tamasiko, ka qai tarava o Jerusalemi kei na loma ni yasana kece o Jutia, ka vakakina vei ira talega na kai matanitu tani. Au a vunautaka kina me ra veivutuni ka saumaki mai vua na Kalou, ka cakava na cakacaka e vakaraitaki kina ni ra sa veivutuni.

²¹ O ya na vuna era a tauri au kina na Jiu mai na Valenisoro ka saga me ra vakamatei au.

²² Ia sa vukei au tikoga na Kalou me yacova mai na siga oqo, ka'u sa tu kina oqo me'u vakadinadinataka vei kemuni kece, se o ni tamata lalai se o ni ka lelevu. E sega ni dua na ka tani au kaya tiko oqo, na ka ga era a tukuna na parofita kei Mosese ni na yaco e muri:

²³ o ya ni sa dodonu ga me mate na Karisito, me i sevu ni tu cake tale mai na mate, ka me vakatakila na rarama ni veivakabulai vei ira na Isireli, kei ira talega na kai matanitu tani.”

Na Ka e qai Yaco ena Vuku ni Vosa i Paula

²⁴ Ni sa tukuni koya tikoga vaka o ya o Paula, sa kaya mai o Vesito ena domo levu, “Sa ca na ulumu o iko, Paula. Sa vakalialiataki iko na levu ni nomu kila-ka!”

²⁵ Sa qai kaya o Paula, “Au sega ni lialia, kemuni, Vesito, na turaga dokai, ia au sa cavuta ga na vosa dina ka dodonu.

²⁶ E kila tu na tui na veika oqo, ka'u sa vosa doudou tiko kina e matana; ni'u sa kila dina ni sega na ka e vuni vua, ni a sega ni caka na ka oqo ena dua na yasana vuni.

²⁷ I kemuni Akariva, na tui, o ni vakabauti ira li na parofita se sega? Au kila ni o ni vakabauti ira!”

²⁸ Sa qai kaya vei Paula o Akariva, “Ena gauna lekaleka ga oqo, o sa nanuma li ni o rawa ni veisautaki au kina me'u lotu Vakarisito?”

²⁹ Sa qai kaya o Paula, “Se gauna lekaleka se gauna balavu, sa noqu masu ga oqo vua na Kalou me baleti kemuni kei ira kece sara era sa vakarogoci au tiko edaidai mo ni yaco mo ni vakataki au, ia me kakua ga ni o ni vesu tu ena sinucodo me vakaoqo!”

³⁰ E ratou sa qai tu cake na tui, kei koya na kovana, kei Verenaisi, kei ira era dabe vata tiko kei iratou,

³¹ ka ra sa qai lako vakatikitiki ka veivosaki vakai ira ka kaya, “Na tamata oqo sa sega ni cakava e dua na ka me dodonu me mate kina se me biu tiko kina ena valeniveivesu.”

³² Sa qai kaya vei Vesito o Akariva, “Kevaka me a sega ni kerea na tamata oqo me vakataulewa vua o Sisa, ke a sa sereki sara ga.”