Cakacaka 25 - Vakavakadewa Vou kei na iVola tale eso

Era sa Beitaki Paula na Jiu

¹ Ni sa oti e tolu na siga mai na gauna ka yaco yani kina o Vesito, sa qai cavutu mai Sisaria o koya ka lako cake ki Jerusalemi.

² E kea era sa qai beitaki Paula vua o ira na bete levu kei ira na nodra i liuliu na Jiu, ka masuti koya

³ me bau lomani ira ka me talatala me lako yani ki Jerusalemi o Paula, ka ni ra a sa bukia tiko na kena vere o ya me ra na vakamatei koya e gaunisala.

⁴ Sa qai kaya o Vesito, “E se vesu tikoga mai Sisaria o Paula, ka'u sa na vakarau lesu tale tikoga kina oqo oi au.

⁵ Me ra lako mai na nomuni i liuliu me keimami mai lako vata sobu, ka me ra na beitaki koya, kevaka e tu na ka me beitaki kina.”

⁶ Ia ni sa oti e walu se tini na siga na nona tiko vei ira, sa qai lako sobu ki Sisaria. Ena siga ka tarava sa la'ki dabe sara ena i tikotiko ni veilewai, ka vakarota me kau yani o Paula.

⁷ Ni sa yaco yani o Paula era sa qai tu vakavolivoliti koya o ira na Jiu ka ra lako mai Jerusalemi, ka beitaki koya ena vuqa na cala lelevu, ia era a sega ga ni vakadinadinataka rawa.

⁸ Ia sa qai sauma na veibeitaki o ya o Paula, ka kaya, “Au sa sega ni cakava e dua na cala me saqati kina na nodra Lawa na Jiu, se na Valenisoro, se kivei Sisa.”

⁹ Ia ena nona via vakayalovinakataki ira ga na Jiu o Vesito, a sa qai tarogi Paula kina vakaoqo: “O vinakata li mo lako cake i Jerusalemi mo la'ki lewai kina e mataqu ena vuku ni veika oqo, se segai?”

Sa Kerea o Paula me Rogoci Koya o Sisa

¹⁰ Sa qai kaya o Paula, “Au sa tu sara tu ga oqo ena mata ni tikotiko ni veilewai nei Sisa, ka sa dodonu me'u lewai kina. Au sa sega ni vakayacora e dua na cala vei ira na Jiu, me vaka o ni sa kila vakavinaka.

¹¹ Kevaka au sa tamata i valavala ca, se'u a kitaka e dua na ka sa dodonu me'u vakamatei kina, au sega ni via kerea me'u vakabulai mai kina. Ia ke sega ni dina na ka era beitaki au tiko kina, e sega ni dua ena soli au rawa vei ira. Au sa kerea kina me la'ki rogoci na noqu kisi vei Sisa!”

¹² Ni sa oti na veivosaki i Vesito kei iratou na nona matabose ni veivakasalataki, sa qai kaya vua o Vesito, “O sa kerea vakaoqo me rogoci iko o Sisa; o sa na lako vakaidina vei Sisa.”

Sa Tukuna o Vesito vei Akariva na veika e Baleti Paula

¹³ Ni oti tale e vica na siga, e rau sa qai lako yani na tui o Akariva kei Verenaisi me rau la'ki veikidavaki kei Vesito.

¹⁴ Ia ni sa oti e vica na siga na nodrau tiko e kea, a mani tukuna na veika me baleti Paula o Vesito vua na tui, ka kaya, “E tiko voli oqo e dua na tamata ka a biuti koya tu mai vakavesu o Vilikesa.

¹⁵ Ena noqu a lako ki Jerusalemi, era sa qai mai tukuni koya vei au o ira na bete levu kei ira na nodra qase na Jiu, ka kerei au me'u vakatauca vua na lewa me vakamatei.

¹⁶ Ia au sa qai tukuna vei ira ni sega ni noda i vakarau na kai Roma me da vakatauca e dua na lewa vua e dua sa beitaki ena dua na cala ni se bera mada ni sota o koya sa beitaki kei ira era veibeitaki ena mataveilewai, ka vakamacala talega ena ka sa beitaki kina.

¹⁷ Era sa mani lako vata mai ki ke, ka'u a sega tale ni vakaoti gauna ni'u sa cakava sara na kena veilewai ena siga ka tarava, ka vakarota me la'ki kau mai na tamata oqo.

¹⁸ Era sa qai tucake o ira ka beitaki koya, ia era a sega ga ni beitaki koya ena mataqali cala bibi ka'u a nanuma ni ra na beitaki koya kina.

¹⁹ Na leqa walega e tiko kina sai koya na nodra veiletitaka na veika eso e baleta na nodra lotu, kei na ka e baleta e dua na tamata sa mate, o ya o Jisu. Ia e kaya tiko o Paula ni se bula tikoga o koya.

²⁰ A leqa na lomaqu ni'u sega ni kila se me'u na vaqaqa vakacava na veika oqo, ka'u sa mani tarogi Paula kina se na via lako cake ki Jerusalemi me la'ki lewai kina se sega.

²¹ Ia ni sa mani kerea o Paula me sa tu vakawawa mada ga na nona kisi me na qai vakataulewa kina o Sisa Akusito, ka'u sa mani vakarota kina me sa tiko vakavesu tiko mada ga me yacova ni'u sa na vakauti koya rawa vei Sisa.”

²² Sa mani kaya vei Vesito o Akariva, “Au via rogoci koya sara ga vakai au na tamata oqo.” Sa qai kaya o Vesito, “O ni na rogoci koya ni mataka.”

O Paula ena Matadrau o Akariva kei Verenaisi

²³ Ena siga ka tarava, e rau sa ukucavu mai o Akariva kei Verenaisi, ka la'ki curu ki na vale ni soqo kei ira na turaganivalu lelevu kei ira na turaga dokai ena koro o ya. Sa qai vakarota o Vesito me kau yani o Paula.

²⁴ Sa qai kaya o Vesito, “Kemuni Akariva, na tui, kei kemuni kecega ka da soqoni vata tiko oqo, o ni sa raica na tamata oqo, sai koya era sa cikevi au kina o ira kecega na Jiu mai Jerusalemi, ka vakakina eke, ka ra kaya ni sa sega ni dodonu me bula tiko o koya.

²⁵ Ia ni'u a sega ni kunea e dua na cala e cakava ka dodonu me tau kina vua na i totogi mate, ka ni sa kerea talega me la'ki lewai koya o Akusito, au sa lewa kina me'u sa na vakauti koya vua.

²⁶ Ia e sega ni tiko e dua na ka me'u vola vua na tui me baleti koya. Sa i koya ga oqo au sa kauti koya mai kina eke, ka vakabibi e matamuni Akariva na tui, mo ni mai vaqaqa, ka me rawa ni dua kina na ka me'u vola vua na Sisa.

²⁷ Ni sa dua na ka lialia me'u vakauta tu e dua na kaivesu ka sega ni lako vata kei na dua na i vakamacala matata ni veika e beitaki kina.”