Cakacaka 24 - Vakavakadewa Vou kei na iVola tale eso

Era sa Beitaki Paula na Jiu

¹ Ni sa oti e lima na siga, sa qai lako sobu o Ananaiasa na Bete Levu kei ira na qase ni Isireli kei na dua na loya o Teritulu ki Sisaria. Era sa la'ki tu ena mata ni Kovana o Vilikesa, ka ra sa qai beitaki Paula vua.

² Sa qai kacivi yani ki loma o Paula, ka sa vakatekivu me beitaki koya vakaoqo o Teritulu: “Kemuni saka na Turaga na Kovana! Ena nomuni veiliutaki vinaka keimami sa kune vakacegu tiko kina ena dua na gauna balavu, ka sa yaco talega e levu na veisau vinaka ena loma ni vanua oqo.

³ Keimami sa rekitaka dina na veika oqo ena veivanua kecega kei na veigauna kecega, ka keimami sa vakavinavinaka vakalevu kina vei kemuni.

⁴ Au sega ni via taura vakabalavu tale na nomuni gauna, ia au sa masuti kemuni ga mo ni yalovinaka ka rogoci keitou mada vakalailai.

⁵ Keitou sa kunea ni sa dua na tamata dauveivakacalai na tamata oqo; sa dau vakatubu ca vei ira na Jiu ena veiyasa i vuravura kecega, ka sa dua sara ga o koya na nodra i liuliu na i lawalawa ni kai Nasareci.

⁶ E a tovolea talega o koya me vakadukadukalitaka na Valenisoro ka keimami a mani vesuki koya, [ka via veilewaitaki koya me vaka na neimami Lawa.

⁷ Ia sa qai lako yani o Laisiasa, na komada, ka kaliraki koya vakaukauwa mai na liga i keimami.

⁸ A qai vakarota vei ira ka beitaki koya me ra lako mai vei kemuni.] Ni o ni sa na vaqaqai koya o ni sa na qai kila rawa ga mai vua na veika keimami beitaki koya kina.”

⁹ Era a tokona na Jiu na veibeitaki o ya ka ra kaya ni sa dina kece sara.

Na i Vakamacala i Paula vei Vilikesa

¹⁰ Sa qai deguvacu na kovana vei Paula me vosa, ka sa qai kaya o koya, “Ena noqu kila ni sa balavu na gauna o ni turaganilewa tu kina ena vanua oqo, sa ka ni marau kina vei au me'u vakamacalataki au vei kemuni, ka sauma na veika au beitaki tiko kina.

¹¹ Sa rawa ni o ni vakadinadinataka ni se qai sivia walega oqo e tinikarua na siga na noqu a lako cake kina ki Jerusalemi me'u la'ki sokalou kina.

¹² Era a sega ni kunei au na Jiu ni keirau veileti tiko kei na dua na tamata, se ni'u vakatubu ca tiko vei ira na lewe vuqa ena Valenisoro, se ena veivalenilotu ni Jiu, se ena loma ni koro.

¹³ Era sega ni vakadinadinataka rawa talega na veika era sa beitaki au tiko kina ena gauna oqo.

¹⁴ Na ka ga ka'u via tusanaka vei kemuni me baleti au sai koya oqo: au sa qarava dina tiko na nodra Kalou na neimami qase ena noqu sa muria tiko oqo na Sala, ka ra kaya voli ni dua na i soqosoqo lotu vakatani. Ia au sa vakabauta talega na veika kece sara sa volai ena Lawa i Mosese kei na nodra i vola na parofita.

¹⁵ Na i nuinui vata ga vua na Kalou e tiko vei iratou oqo sa tiko talega vei au, o ya ni ra na tucake tale mai na mate o ira na yalododonu kei ira sa sega ni yalododonu.

¹⁶ Au sa dau tovolea tale tikoga ena noqu i gu taucoko me'u yalosavasava ena mata ni Kalou ka vakakina vei ira na tamata ena veigauna kece sara.

¹⁷ “Sa oti oqo e vica na yabaki, au sa qai lesu mai ka kauta mai na i solisoli vei ira na dravudravua ena noqu vanua, ka me'u mai vakacabo i madrali talega.

¹⁸ Ia ni'u se la'ki qarava tiko na i tavi o ya, era sa mani kunei au ena Valenisoro ni sa oti na cakacaka ni noqu vakasavasavataki. A sega ni dua na i binibini tamata me keimami tiko vata ka sega talega ni dua na tiko yavavala.

¹⁹ Ia eso ga na Jiu mai Esia era a tiko kina; e dodonu ga me ra a lako mai e liu ki ke, e matamuni, o ira ka mai veibeitaki, kevaka e tu na ka me ra beitaki au kina.

²⁰ Se me ratou tukuna o iratou sa tiko oqo na cala era sa kunea vei au ena noqu a tu e matadra na lewe ni Matabose,

²¹ vakavo ga na noqu a kailavaka ni'u sa tu ena kedra maliwa, ‘O ni sa veilewaitaki au tiko edaidai ni'u sa vakabauta ni o ira na mate era na vakaturi cake tale ki na bula.’ ”

Ena Qai Tau Malua na Lewa Baleti Paula

²² Ia o Vilikesa, ni sa kila vinaka tu na veika me baleta na Sala, sa qai vakarubeca na rogoci ni mataveilewai ena vosa oqo, “Ni sa lako sobu mai o Laisiasa na komada, au sa na qai vakatauca na noqu lewa me baleta na kisi oqo.”

²³ Sa qai vakarota vua na turaganivalu me vakatawani tiko o Paula, ia me soli talega vua eso na galala ka me kakua ni tarovi e dua vei ira na wekana e via veisiko yani vua.

O Paula ena Mata i Vilikesa kei Tarusila

²⁴ Ni sa oti e vica na siga, e rau sa qai lako yani o Vilikesa kei na watina o Tarusila, e dua na marama ni Jiu. A talatala o Vilikesa me lako yani vua o Paula, ka sa vakarogoci koya ena nona i vakamacala me baleta na bula ni vakabauti Karisito Jisu.

²⁵ Ia ni sa la'ki yacova o Paula na i vakamacala me baleta na i valavala dodonu, na yalomalua, kei na veilewai ka se bera mai, a sa domobula o Vilikesa, ka kaya, “O iko mo sa lesu tale ena gauna oqo. Au na qai kacivi iko tale mai kevaka ena dua na noqu gauna galala.”

²⁶ E a nuitaka voli o Vilikesa me na qai solia vua o Paula e dua na i lavo, o ya na vuna sa dau talatala vakawasoma kina vua o koya ka veitalanoa kaya.

²⁷ Ni sa oti tale e rua na yabaki, sa qai la'ki sosomitaki Vilikesa ena i tutu ni Kovana o Porisiu Vesito. Ia na nona via vakayalovinakataki ira na Jiu o Vilikesa, sa mani biuti Paula tu ga kina ena valeniveivesu.